Протест за случајот Онкологија: Како пациенти, најважно ни е да се добијат имиња и презимиња

Како онколошки пациенти, најважно ни е да се добијат имиња и презимиња на инволвираните лица, беше истакнато на вечерашниот протест пред Обвинителството во Скопје.

-Како онколошки пациенти, најважно ни е да се добијат имиња и презимиња на инволвираните лица, беше истакнато на вечерашниот протест пред Обвинителството во Скопје, откако по наводите во јавноста за злоупотреба на лекови на Клиниката за онкологија беше отворена предистражна постапка.

Онколошки пациенти на вечерашниот протест информираа дека денеска, како што тврдат, „на Клиниката за онкологија не им било овозможено да добијат упат за на ехо“, како што им било кажано, процедурата била тоа да оди преку матичен лекар.

- А, тоа оди бавно зашто нема термини, па мора да се закажува на приватно, појасни пациентка, учесник на протестот.

Ана Марјановиќ, пациентка на Клиниката за онкологија во Скопје, рече дека веќе подолго време зборуваат за нивните барања и очекувања од предистрагата.

- За нас како онколошки пациенти, најважно е да се добијат имиња и презимиња на инволвираните лица, сѐ со цел да знаеме кои се и како да го продолжиме нашето лекување. На Онкологија, проблемот со терапии и термини е веќе долго време зборуван и потенциран од страна на пациентите, во последните недели добиваме информации од медиумите дека новата директорка и министерот веќе работат на одредени проблеми, но, само времето ќе покаже дали тоа навистина ќе се случи, изјави Марјановиќ.

Во однос на пред истрагата, додаде таа, најзначајно е да се испрати апел до пациентите, како и до блиските на веќе починатите онколошки пациенти, да пријавуваат во ОЈО секаков сомнеж што го имаат или имале за терапиите, како и да истапат сите оние пациенти, на кои им била скратена, или биле одбиени, за одредена терапија.

- И се разбира, доколку има пациенти на кои им биле побарани пари за одреден лек или услуга на Клиниката за онкологија, тоа да го пријават во ОЈО, сѐ со цел ефективно разрешување на овој скандал, подвлече Марјановиќ.

Во исчекување на октомври, светскиот месец на болните од рак на града, исто така, додаде таа, сакаме да пратиме порака до сите организации, институции и медиуми, дека треба малку посериозно да се преземат мерки за поттикнување на свеста кај луѓето за оваа болест, како и огромната важност на самодијагнозата.

- Во исто време, Онкологија и Фондот за здравство да направат напори за да се донесат нови лекови на позитивната листа, бидејќи повторно заостануваме од светските трендови и поновите лекови што се користат за третман на онколошките пациенти, апелираше Марјановиќ.

На протестот беше нагласено дека собирите пред ОЈО ќе продолжат, сѐ со цел да се мотивираат поголем број на онколошки пациенти, да ги споделат своите искуства од оваа клиника и истовремено, да бидат потсетени обвинителите, кои работат на овој случај, дека онколошките пациенти имаат потреба од брза и ефективна истрага.

Најголемите гробишта на автомобили во светот

Во Америка се наоѓаат најголемите гробишта за автомобили, 300.000 автомобили, кои се отфрлени како последица на аферата „Фолксваген“ „Дизелгејт“се „погребани “на овие гробишта.

Големите гробници за автомобили не се само сцена од пост-апокалиптични филмови, тие се реалноста на нашето време.

Едноставно низ годините на економски кризи, војни, природни катастрофи и промени во индустријата, многу возила остануваат напуштени и заборавени во отпади.

Сигурно барем еднаш сте се запрашале како изгледа да видите неколку илјади автомобили паркирани еден до друг, во овој случај 300.000.

Ова се гробиштата на 300.000 автомобили кои беа отфрлени како резултат на скандалот „Дизелгејт“ на Фолксваген.

За време на оваа афера и откупувањето на своите автомобили, со спорни дизел мотори во САД, „Фолксваген“ потрошил околу 7,4 милијарди долари.

Од 500.000 дизели, дури 350.000 такви автомобили биле купени од нивните сопственици и паркирани на импровизирани депонии во САД. Според некои информации, на американско тло има околу 37 големи депонии на кои може да се најдат уредно паркирани 300.000 автомобили.

„Фолксваген“ ги паркирал таму и чека одобрение од американската влада за да изврши дополнителни тестови и поправки на овие возила за да се исполнат моментално важечките еколошки стандарди за издувните гасови.

Сепак, големо прашање е дали за тоа ќе добијат дозвола, а и да добијат, сосема е извесно дека нема да смеат да ги продаваат тие автомобили на територијата на САД, па „Фолксваген“ ќе мора да ги транспортира во некоја друга земја во светот. Како и да е, како и да е решението, потребни се многу пари.

За купување на овие возила, плаќање казни и обештетување, „Фолксваген“ потрошил повеќе од 25 милијарди долари вкупно во САД за аферата „Дизелгејт“.

Вкупно „Фолксваген“ требаше да купи околу 500.000 спорни дизел автомобили. Во текот на 2017 година се купени околу 335.000 возила, од кои само 13.000 се предадени, а 28.000 се уништени. Значи, во моментов има 294.000 преостанати автомобили на гробиштата на Америка.

Скандалот со емисиите на гас „Фолксваген“, познат како „Дизелгејт“ или „Емисинсгејт“ започна во септември 2015 година, кога Агенцијата за заштита на животната средина на САД издаде известување за прекршување на Законот за чист воздух до германскиот производител на автомобили „Фолксваген груп“.

Ли: Австралија треба да ги остави настрана несогласувањата со Кина

Премиерот на Кина, Ли Кечијанг денеска вети нова двојка џиновски панди за зоолошка градина и ја повика Австралија да ги остави настрана несогласувањата со Пекинг.

Ли доцна синоќа пристигна во главниот град на сојузната држава Западна Австралија, Аделаида. Во Западна Австралија се произведува најголемиот дел од австралиското вино извезено во Кина, откако во март беа укинати царините, поради кои беше прекината трговијата во 2020 година.

Посета на Ли во Австралија е фокусирана на дипломатијата на пандите, обновувањето на трговските и дипломатските врски откако Кина ги рестартираше односите во 2022 година. Билатералните односи помеѓу Пекинг и Канбера беа нарушени за време на деветгодишното владеење на претходната конзервативна австралиска администрација.

Шефицата на австралиската дипломатија, Пени Вонг истакна дека посетата на Ли е резултат на „двегодишната многу фокусирана и трпелива работа на оваа влада за стабилизирање на односите и отстранување на бариерите во трговијата“.

- Ќе соработуваме кога можеме, нема да се согласуваме кога треба и ќе работиме на заштита на нашите национални интереси, посочи Вонг.

Ли синоќа по пристигнувањето во Австралија потенцира оти односите помеѓу Кина и Австралија по период на подеми и падови се вратиле на правиот пат.

- Историјата докажа дека заемното почитување, барањето заеднички јазик и ставањето настрана разликите, како и заемно корисната соработка се вредни искуства во развојот на кинеско-австралиските односи, наведе Ли.

Додека премиерот на Австралија, Ентони Албанез најави дека со Ли ќе разговара за неодамнешните судири меѓу воените сили на двете земји во Јужно Кинеско Море и Жолто Море.

Ли во Австралија допатува од Нов Зеланд, а неговата турнеја низ регионот ќе заврши во Малезија.

Зеленски: Путин нема да стави крај на војната

 Киев утре ќе одржи мировни преговори со Русија ако Москва се повлече од целата украинска територија, изјави претседателот на Украина, Володимир Зеленски по завршувањето на дводневната мировна конференција во Швајцарија.

- Но, Владимир Путин нема да стави крај на војната. Затоа, мораме да го спречиме со какви било средства, било воени или дипломатски. Западната помош не беше доволна за да се добие војната, но самитот покажа дека меѓународната поддршка за Украина не слабее, посочи Зеленски.

притисни ентер