Четири од петте партии избрани во парламентот на Гренланд се согласија да формираат коалиција која ќе има 23 од вкупно 31 место во законодавниот дом.

Договорот треба да биде потпишан денеска, пишува весникот „Сермитсијак“, повикувајќи се на Јенс-Фредерик Нилсен, лидер на Демократите, најголемата партија во парламентот.

Договорот доаѓа во време кога претседателот Трамп ги засили своите напори да добие контрола над Гренланд.

Американскиот потпретседател Џеј Ди Венс денеска пристигнува на Гренланд каде ќе ја посети американската вселенска база Питуфик.

По изненадувачката победа на неговата централнодесничарска партија на изборите на 11 март, Нилсен рече дека сака да формира најширока можна коалиција за да помогне во отпорот на притисокот на САД. Конечниот договор исклучува само една партија, Налерак, која во понеделникот излезе од преговорите за коалиција.

Гренланд има богати наоѓалишта на минерали и се протега на стратешки воздушни и поморски патишта во време кога САД, Русија и Кина се обидуваат да позиционираат на Арктикот.

„Мислам дека самитот беше многу мотивирачки... Мислам дека мојот дијалог со лидерите е мотивирачки. Мислам дека сите лидери се полни со енергија. Мислам дека лидерите не не напуштаат, туку ќе ја поддржат Украина. Ова е лош сигнал за (рускиот претседател Владимир) Путин“, рече Зеленски на прес-конференцијата по лидерската средба за поддршка на Украина и безбедноста во Европа, пренесува украинскиот Интерфакс.

Тој рече дека Украина е силна земја која навистина сака мир.

„Нема да се предадеме, да се откажеме од нашата земја, од нашата независност. Путин едноставно не може да го направи ова со нас... Ние не сме сами“, нагласи Зеленски.

Тој посочи дека за него е важно Украина да е во силна позиција во мировните преговори и дека и се потребни гаранции од САД дека Русија нема да започне нова војна.

„За мене е важно Украина да има силна позиција во преговорите. За да имаме шанса да ја завршиме војната преку преговори - и не само да ја завршиме, туку да имаме праведен, траен мир, за утре повторно да нема војна - сакам гаранции од САД“, рече Зеленски.

Според него, овие гаранции не треба да зависат од тоа кој е моментално во Белата куќа. Зеленски додаде дека на вчерашната средба лидерите на земјите од „Коалицијата на подготвените“ изразиле едногласна одлука дека нема да има укинување на какви било санкции наметнати кон Русија.

„Додека оваа војна не заврши со праведен мир, тоа нема да се случи. Ова е сигнал од европските земји“, нагласи тој, додавајќи дека Вашингтон треба да биде „построг“ кон Москва.

„Ние навистина сакаме американскиот претседател Доналд Трамп да биде посилен од шефот на Кремљ, Владимир Путин“, нагласи тој, истакнувајќи дека за тоа е потребна соработка со Белата куќа, особено на ниво на лидери, официјална дипломатија и други „канали“.

Зеленски им рече на новинарите дека не планира посета на САД во блиска иднина, бидејќи ова прашање не е на дневен ред.

Тој оцени дека на преговарачката маса за прекин на војната, покрај Киев, Европа треба да ја претставуваат и неколку земји.

„Европа е многу голема и мора да има јасна застапеност на оваа преговарачка маса. Денеска сите се согласивме дека Европа ќе ја претставуваат Франција и Велика Британија - (Емануел) Макрон и (Кир) Стармер. Ова е заеднички став на сите лидери“, рече тој за самитот во Париз.

Технолошкиот милијардер Илон Маск, кого американскиот претседател Доналд Трамп го ангажира за да ја намали бирократијата на владата, синоќа изјави дека најголемиот дел од работата за намалување на федералните трошоци за 1 трилион долари ќе биде завршена до крајот на неговиот мандат, односно за 64 дена.

Маск за Фокс њуз изјави дека верува дека неговиот Оддел за владина ефикасност (ДОГЕ) може да заштеди 1.000 милијарди долари, намалувајќи го сегашното вкупно ниво на федерални трошоци, што е приближно 7.000 милијарди долари, на 6.000 милијарди.

Маск, најбогатиот човек на светот, беше назначен од Белата куќа за „специјален вработен во владата“, што го ограничува неговиот мандат на 130 дена, што значи дека неговото раководство во операциите на ДОГЕ би можело да заврши најрано на крајот на мај.

- Мислам дека ќе завршиме најголем дел од работата потребна за да го намалиме дефицитот за трилион долари во таа временска рамка. Владата е неефикасна и има многу расипништво и измами, така што ние сме уверени дека може да се направи кратење од 15 проценти без да влијае на ниту една од критичните владини служби, рече Маск.

ДОГЕ проценува дека веќе им заштедил на американските даночни обврзници 115 милијарди долари со намалувањата што ги направи од 24 март, преку мерки кои вклучуваат намалување на работната сила, продажба на средства и откажување на владини договори. Сепак, според светските агенции, вкупните заштеди пријавени на веб-страницата на ДОГЕ не се проверливи и неговите пресметки се преполни со грешки и корекции.

Експертите за буџет, сепак, велат дека Маск не може да ја постигне својата цел за намалување на трошоците без да навлегува во програмите за права, како што е социјалното осигурување, за кои Трамп вети дека нема да ги намалува.