Градоначалникот Иван Јорданов на денешната прес-конференција информираше дека дефектот се случил во вечерните часови на главната водоводна линија, која е стара 33 години.
Големите цевки попуштаат под притисок на водата која доаѓа од Хидросистемот „Злетовица“ и зголемената потрошувачка на вода во текот на летото. Постојано на удар и без вода за пиење се домаќинствата во високите зони на градот, кога се случуваат вакви дефекти. Овие населби вода имаа само во текот на вчерашниот ден, а претходно два дена се соочуваа со суви чешми.
-Нашите екипи работат на отстранување на овој дефект, очекувам жителите во високите зони вода за пиење да добијат во доцните вечерни часови, рече Јорданов.
Во текот на денот населбите со вода ќе се снабдуваат со цистерни, а општинската администрација на населението им дели и флаширана вода. Јорданов се извини за дефектите и проблемите со водоснабдувањето и порача дека проблемот ќе се реши со пренамена на средствата од самопридонесот за изградба на брана на река Козјак.
Штипјани на референдум ќе излезат за овие средства да се пренаменат за санација на старата водоводна мрежа. По вчерашниот апел на Јорданов до ТАВ и Владата да се избере економски оператор за изградба на Водоводна линија два, веднаш го контактирале од ТАВ и го известиле дека се преговара со економски оператор и се очекува за неколку недели да почнат и градежните работи. Изградбата на оваа линија ќе овозможи непречено водоснадување на населбите во високите зони на градот Штип.