12 часа беа на маса со европско посредништво, го усогласија текстот за анекс на договорот за нормализација на односите, но на крај политичките лидери Вучиќ и Курти не ставија потпис за документот официјално да стапи на сила- вака завршија маратонските преговори меѓу Белград и Приштина во Охрид. Според оценката на шефот на европската дипломатија Борел, по тешки преговори има напредок, а двете страни се обврзани да ги исполнат обврските од анексот.
-Можам да соопштам дека Косово и Србија се согласија за имплементација на анексот на договорот за нормализација на односите меѓу нив. -Жозеп Борел – висок претставник на ЕУ за надворешна политика .
Текстот на Анексот интергрално утрово го објави Европската комисија. Како важни елементи се издвојуваат точките кои предвидуваат Србите на Косово ќе треба да добијат „соодветно ниво на самоуправа“, што е некаков вид на Заедница на српски општини, но детали за моделот нема. Иако не потпишани, двата документи ќе станат формални услови за патот на Србија кон ЕУ, преку вклучување во поглавјето 35, а ќе бидат услов и за напредокот на Косово. Доколку пак, доследно го спроведат, ќе добијат финансиска помош која ќе се обезбеди со донаторска конферецнија за 5 месеци..
Претпладнево на прес-конференција српскиот претседател Вучиќ рече дека иако не ги потпишува, ќе работи на спорведување на договореното до нивните црвени линии- нема признавање на независност на Косово, ниту одобрување за нивно членство во Обединетите нации.
-Подготвен е да потпише (Курти) затоа што оттаму формално би произлегла правна обврска за Република Србија да се согласи за независност на Косово. Сакам луѓето во Србија да знаат дека за ова и тоа како водиме сметка, и кога ме слушаат мене дека повторувам некои работи како папагал, да знаат дека не го правам тоа бидејќи сум глуп или не знам што правам, туку бидејќи добро знам што правам. - Александар Вучиќ – претседател на Србија.
Зошто договорот за анексот не заврши со потпис, за косовскиот премиер Курти виновник е само Вучиќ. Како обврските од анексот да станат задолжителни, рече дека сега е работа на ЕУ.
-Постигнавме јавен договор за анексот што ќе го води спроведувањето на основниот договор. Другата страна, како и на последната средба во Брисел на 27 февруари, бега од потпишување. Останува на ЕУ да најде механизам статусот на овој договор да го направи правно обврзувачки.- Албин Курти – премиер на Косово.
Иако не е јасно како ќе се формализираат постигнатиот Договор и Анексот, Белград и Приштина веќе добиваат честитки од многу европски метрополи, а постигнатото уште синоќа го поздрави и САД преку специјалниот претставник Ескобар кој беше во Охрид.. Честитки добија и од нивниот домаќин, премиерот Ковачевски..
-Сакам да им честитам на претседателот Вучиќ и премиерот Курти за храброста и визионерството, и да им посакам напредок и успех. -Димитар Ковачевски – претседател на Влада.
Постигнатото во Охрид го поздрави и албанскиот премиер Рама, кој на твитер напиша: „Да се надеваме дека ѓаволот не е во деталите и дека договорениот, но непотпишан договор, не е уште една балканска измама!
Со Анексот и двете земји се обрзани на спроведување на Договорот од февруари во Брисел, кој има 11 точки, од кои клучни се третата и четвртата кои де факто предвидуваат независност на Косово, преку признавање на сите нејзини државни атрибути, како и можноста за зачленување во сите меѓународни организации.