Македонија

Петровска на средба со претставници со „ЛОМ-Прага“

Навремената испорака на хеликоптерите која ќе се реализира оваа пролет е добар знак и ја потврдува добрата соработка и позитивни релации меѓу нашите две земји.

Министерката за одбрана Славјанка Петровска денеска во воздухопловниот ВИНГ оствари средба со извршниот директор на Воздухопловно-ремонтниот завод „ЛОМ-Прага“, Јири Протива и со амбасадорот на Чешката република Јарослав Лудва.

„По долги години имаме партнер за соработка кој ја гарантира оперативноста и одржувањето на нашите воздухоплови. Ние сакаме опрема која ќе биде оперативна и токму благодарение на двата договори влада со влада, за ремонт, за набавка на резервни делови и за обука на персонал за одржување на воздухопловите сега имаме партнер на кој можеме да се потпреме“, истакна министерката Петровска.

Таа ја потенцира важноста од исполнувањето на договорот што ќе значи и подигнување на капацитетите на Воздухопловниот ВИНГ.

„Навремената испорака на двата хеликоптери е добар знак и ја потврдува добрата соработка и позитивни релации меѓу нашите две земји. Реализацијата на овој договор претставува позитивен пример за продолжување на нашата добра одбранбена соработка“, рече Петровска.

Извршниот директор на „ЛОМ-Прага“, Јири Протива најнапред упати благодарност за денешната средба и потенцира дека двата договори се исполнуваат во целост. Тој додаде дека испораката ќе биде навремена и во следните фази согласно договорите е и обука на персонал за одржување на воздухопловите.

Амбасадорт Лудва на средбата потенцира дека двете страни од самиот почеток работеа напорно за да се реализира овој проект со цел да се стигне до финалната фаза.

На денешната средба во Воздухопловниот ВИНГ присуствуваа и државниот секретар во Министерството за одбрана, Владимир Анчев, Конзулот на Чешката Република Давид Чернохорски, командантот на Воздухопловниот ВИНГ, полковник Игорчо Стоименовски и претставници од Министерството за одбрана и Воздухопловниот Винг.

Двата договори потпишани Влада со Влада придонесуваат за системски да се решат предизвиците и истите овозможуваат брза и навремена испорака на резервни делови потребни за целосна функционалност на воздухопловите на македонската Армија. Испораката на двата ремонтирани хеликоптери ќе се реализира во првата половина на 2024 година.

Свет

Американец е пронајден како оди бос во близина на Дамаск, со месеци бил во притвор (ВИДЕО)

Американец, кој тврди дека со месеци бил држен во сириски затвор откако влегол во земјата пеш, опиша како го ослободиле луѓе со чекани откако бунтовниците го собориле режимот на Башар ал Асад.

Човекот, кој се претставил како Тревис Тимерман за американскиот партнер на Би-Би-Си, ЦБС, бил пронајден од жителите во близина на Дамаск. Скај њуз објави дека бил бос.

Тимерман изјави за NBC News дека бил приведен во мај откако ги преминал планините во Сирија како дел од верски аџилак.

Еден ден откако бунтовниците ја презедоа контролата врз Дамаск и го соборија Асад, Тимерман рече дека двајца мажи ја скршиле вратата од неговиот затвор со чекани.

„Кога излеговме немаше отпор, немаше вистинска борба“, рече тој. Тој додаде дека од затвор излегол со поголема група луѓе.

Тимерман изјави за NBC News дека слушнал за други луѓе кои биле мачени во затвор, но дека тоа не било случај со него.

„Ме хранеа и ми даваа вода. Единственото нешто беше што не можев да го користам тоалетот кога сакам“, изјави за Ал-Арабија.

„Не ме тепаа, а чуварите се однесуваа пристојно со мене“, рече тој.

Тој додаде дека користел мобилен телефон за време на притворот и дека разговарал со семејството пред три недели. Тој не сакал да стапи во контакт со американските власти.

Инаку, Тимерман бил пријавен за исчезнат во мај, а последен пат е виден во Будимпешта. Американскиот државен секретар Антони Блинкен рече дека Вашингтон „работи на враќање на Тимерман дома“.

Инаку, по веста дека Американецот е ослободен, многумина помислија дека станува збор за новинарот Остин Тајс, кој исчезна во Сирија во 2012 година. Сепак, човекот им кажал на новинарите дека се вика Тревис Тимерман и негирал дека е новинар.

Да потсетиме дека илјадници затвореници беа ослободени по падот на Асад. На бројни слики се гледаат мажи и жени, а во некои случаи и деца, кои излегуваат од пренатрупаните ќелии, честопати несвесни за она што се случува во надворешниот свет.

Бунтовниците велат дека имаат намера да ги затворат озлогласените затвори на Асад и да ги пронајдат оние кои се вклучени во мачењето или убивањето на затворениците.

„Ќе ги бараме во Сирија и бараме од земјите да ги предадат оние што избегале за да можеме да ја постигнеме правдата“, изјави лидерот на бунтовниците Мохамед Ал Голани.

Шоу биз

Лепа Брена ја објави снимката од концертот во Загреб, кога ја скрши ногата (ВИДЕО)

Лепа Брена на социјалните мрежи објави видео во кое го сумира својот трет концерт овој месец во Арената во Загреб.

На тоа видео се прикажува како изгледаат подготовките во бекстејџот пред излегување на сцената и дел од концертот на Брена, а на крајот од видеото може да се види моментот кога снимателот паѓа додека снима девојка како танцува на свила.

Во тој момент камерманот паѓа во лифтот и точно врз ногата на Брена. Видеото завршува со звукот на толпата која ја пее песната на Брена, Внимавај кому завидуваш.

„Ќе продолжи. Ваша Брена“, напиша таа во описот на снимката.

Во видеото зборуваа и гостите на Брена на концертот, Сенида и Ана Бекута. „Голем работник и уште поголема дива“, рече Сенида, а Бекута додаде: „Таа што победува“.

Пејачката вчера беше пуштена од загрепската клиника за трауматологија, каде што по концертот заврши на операција.

Концертите што таа требаше да ги одржи на 10 и 16 декември се одложени. Новите датуми се 21 и 22 март.

„За жал, синоќа во еден од незаборавните моменти на концертот на половина концерт се случи несреќа кога снимателот падна врз мене и како последица на тој пад ја скршив ногата. Не сакав да застанам, но за љубовта на сите вас во Арената, продолжив да пеам. Добрата вест е дека сѐ ќе биде во ред, но во моментов ми треба малку време да закрепнам, вашата љубов, поддршка и трпение во овој период. Ви благодарам од сѐ срце“, изјави претходно Брена на своите социјални мрежи.

„Несреќата се случи кога член на техничката екипа случајно паднал од бината во лифтот за спуштање на сцената и се здоби со полесни повреди, токму во моментот кога Лепа Брена го чекаше своето појавување пред публиката и така беше повредена.

И покрај големата болка, Лепа Брена уште еднаш покажа неверојатна професионалност и беспрекорно го изведе концертот со многу напор до крај, носена од еуфоријата на публиката и желбата да не ги разочара своите фанови. Овој храбар чин е само уште еден доказ за нејзината големина, посветеноста на музиката и љубовта кон нејзините фанови“, изјавија од Екстра ФМ.

Свет

Научниците загрижени: 2024. беше најтопла година, 2025. ќе го собори рекордот

2024 година е најтоплата година досега.

Ова го објави Службата за климатски промени Коперник, а со проценката се согласуваат и други научници. Меѓутоа, Метеоролошката служба на Велика Британија наведува дека овој рекорд би можел да биде соборен веќе во 2025 година.

Според податоците на британската метеоролошка служба, 2025 година ќе биде најмалку 1,29 степени потопла отколку во прединдустриската ера, а можно е просечната глобална температура да се искачи до 1,53 степени, објави Sky News.

Научниците истакнуваат дека 2025 година ќе биде многу топла, иако феноменот Ел Нињо, кој доведе до зголемување на температурите во 2023 и 2024 година, се намалува.

Причината за оваа глобална топлина е долгорочниот тренд на климатските промени, кои се резултат на емисијата на гасови со ефект на стаклена градина, главно од фосилните горива.

Метеорологот Адам Скеиф објасни дека Ел Нињо привремено ги зголеми глобалните температури, но дека климатските промени продолжуваат да ја прават секоја година потопла. Научниците истражуваат и други фактори кои би можеле да придонесат за зголемување на температурите, како што се вулканските ерупции.

притисни ентер