Пелоси одби двајца Републиканци за комисијата за истрага, Мекарти ги повлече сите кандидати

Лидерот на Републиканците во Претставничкиот дом на САД, Кевин Мекарти ги повлече сите пет кандидати за специјалната комисија што го истражува нападот на Конгресот на 6 јануари.

Тој тоа го стори откако спикерот на Долниот дом на Конгресот, Ненси Пелоси, одби да ја прифати кандидатурата на двајца од нив, пренесува Глас на Америка.

Пелоси ја отфрли препораката конгресмените Џим Џордан и Џим Бенкс, двајцата енергични приврзаници на поранешниот американски претседател Доналд Трамп, да работат во комисијата за истрага на приврзаниците на Трамп кои упаднаа во Конгресот, со цел да се спречи потврдата за изборната победа на претседателот Џо Бајден.

„Со оглед на интегритетот на истрагата, инсистирањето на вистината и загриженоста за изјавите и некои потези на овие членови на Претставничкиот дом, мора да го отфрлам предлогот конгресмените Бенкс и Џордан да бидат членови на комисијата", рече Пелоси.

Таа изјави дека „природата на настаните на 6 јануари, кои беа без преседан, ја бараше и оваа одлука без преседан".

Мекарти рече дека „Републиканците нема да бидат учесници во овој лажен процес" и наместо тоа ќе спроведат „истрага за утврдување на фактите".

Пелоси формираше 13-члена комисија откако Републиканците во Претставничкиот дом го отфрлија претходниот обид за формирање двопартиска комисија за истражување на насилството во Капитол.

Таа претходно номинираше една Републиканка, Лиз Чејни, за член на комисијата и рече дека ќе прифати тројца кандидати на Мекарти – Родни Дејвис, Кели Амстронг и Трој Нелс, по што побара од него да избере двајца нови членови на комисијата.

Во немирите на 6 јануари загинаа четири лица.

Руски „Иљушин-76“ пристигна на помош во Турција за гаснење на пожарите (ВИДЕО)

Авион на руската служба за итни случаи Иљушин-76 слета денеска во Турција за да им помогне на тамошните власти во гаснењето на пожарот што беснее во околината на Анталија.

Три авиони што Русија ги испрати во Турција, од типот Б-200, веќе се во акција и го гаснат пожарот во околината на Анталија.

Еден од авионите денеска го гаснел огнот неколку часа на потегот помеѓу градовите Анталија и Манавгат, објави ТАСС .

Турските власти побарале помош за гаснење на пожарите во близина на населбите и туристичките зони каде што се руските туристи.

Руското Министерство за одбрана и Руската служба за вонредни ситуации одлучиле да одговорат на барањето на Турција за помош со испраќање 11 авиони за гаснење на пожарите.

Пожарите избувнале во средата, недалеку од одморалиштето Манавгат, јужно од регионот Анталија, поради екстремно високите температури, а во четвртокот огнот се проширил и на други области, вклучително и одморалиштата во Ајдин и Мугла.

Со БМВ блокирала противпожарно возило, па добила лекција (ВИДЕО)

Несовесна жена возач можела да биде среќна поради трпението на пожарникарите.

Видеото објавено на Редит уште еднаш покажува колку краткото застанување на патот е непромислен потег. Вклучувањето на сите четири трепкачи не значи дека сте семоќен, особено на улиците каде што автомобилите се веќе паркирани странично, па паркираниот автомобил им пречи на возилата што се обидуваат да го поминат патот.

Оваа жена возач одлучила да го паркира БМВ -то на патот, веројатно мислејќи дека може да се паркира на неколку минути, бидејќи тоа никому нема да му пречи. Токму тогаш, минувале пожарникари, со вклучени сигнални светла и сирена.

Спротивно на очекувањата, пожарникарите одлучиле да почекаат некое време и да ја повикаат сопственичката со сирена, да го отстрани автомобилот и да им дозволат да поминат непречено. По околу една минута, сопственичката, оди спокојно за да седне во автомобилот. Пожарникарите одлучија да ја почестат со соодветна мелодија. Со оглед на сите работи, таа можела да биде среќна за минималното предупредување.

Патем, во претходните случаи, сопствениците на БМВ кои што биле неправилно паркирани и спречиле пожарникарите да пристапат до хидрантот,останале без стакло.

Полицијата се судри со демонстрантите во Париз на протест против ковид-пропусниците (ВИДЕО)

Илјадници луѓе во Франција протестираа денеска против воведувањето на специјални ковид-пропусници, при што дојде до судири со полицијата.

Демонстрантите маршираа низ Париз, а француската полиција, целосно опремена за немири, турна некои од демонстрантите со тупаници и употреби солзавец против некои од нив, објави АП.

Околу 3.000 припадници на безбедносните сили биле распоредени во француската престолнина за време на третата сабота од протестите.

Полицијата зазеде позиции долж Елисејските полињата за да ја заштити таа авенија од демонстранти.

Четири протести биле одржани во Париз, а маршеви имало и во други градови низ земјата.

Додека учесниците на маршот се движеле кон исток, полицијата истрелала солзавец врз толпата, а облаците чад го исполнија небото.

Во настанатиот хаос беше виден маж демонстрант со крвава глава.

Втората група демонстранти била предводена од лидерот на ултрадесничарската партија Национално собрание, Марин Лепен, додека третата група, која марширала кон Министерството за здравство, ја предводел Флоријан Филипо од партијата Патриот.

Пратениците донеле закон за коронавирусот според кој од 9 август ќе бидат потребни пропусници за движење на повеќето места, бидејќи бројот на заразени лица се зголемува, како и бројот на хоспитализации.

Анкетите покажуваат дека повеќето Французи го поддржувале усвојувањето на законот, но некои Французи се силно против.

За добивање на пропусниците е потребен доказ за вакцинација или брз негативен тест или доказ за неодамнешно закрепнување од „Ковид-19“.

Вакцинацијата на сите здравствени работници е наредено да заврши до средината на септември.

притисни ентер