Од „Вреди“ и денеска ги прозваа „интегративците“ дека на кукавички начин, како што велат, ја лажат јавноста дека корумпираните се во другите партии и сакаат да се претстават како жртва за да ги заштитат своите криминали. Правосудната одговорност за политичка корупција не може да биде меѓународен проблем, реагираат од Вреди, тоа според нив е домашна задача за државниот систем.
- За прво место во категоријата “најсмешни моменти” може да конкурира барањето на ДУИ за меѓународен ветинг. Постои ли покредибилен меѓународен ветинг за некој политичар од црната листа на САД? Да го имаш еден Рамиз Мерко во своите редови, главен политички емисар да ти е Мендух Тачи и да зборуваш за меѓународен ветинг е дрско потценување на Албанците од кои 22 години си барал поддршка на избори, велат од коалицијата.
Од ДУИ, пак, се изненадени и загрижени од реакцијата, како што велат, против барањето за меѓународно надгледуван ветинг кој според нив ќе ставел крај и на урбаниот криминал.
-Дали е ова очигледен страв поврзан со криминалната активност на олигарсите на урбаната мафија во општините, создавајќи ги најбогатите олигарси збогатени на незаконски начин? Време е за правда, преку меѓународно надгледуван ветинг, реагираат од Мала Речица.
Од интегративците нема став за алтернативниот предлог на кој инсистира Вреди - уставен амандман за борба против корупција наместо меѓународен ветинг, но од ВМРО-ДПМНЕ веќе соопштија дека нема да го поддржат.
Во меѓувреме продолжуваат партиските прозивки меѓу ВМРО-ДПМНЕ и СДСМ околу најавите за можна дестабилизација на државата.
Од ВМРО-ДПМНЕ прашаа: „Кога ќе се охрабри Венко Филипче и ќе ги осуди ДУИ? Или се надева дека тие ќе креваат протести кога ќе треба да одговараат и тој и неговите корумпирани функционери? Дали СДС е до толку безидејна?, велат од владејачката партија.
Одговорија од СДСМ. Стравот од Венко Филипче кај ВМРО-ДПМНЕ е голем, а Владата разочарува во секој поглед, реагираат оттаму.
„Наместо ВМРО-ДПМНЕ да глуми таблоид кој сее шпекулации и апелира, повелете докажете си ги сите обвинувања. Кога владеачка партија која има двотретинско мнозинство само апелира наместо да делува, тоа само ја потврдува нејзината неспособност“, стои во реакцијата од социјал демократите.