Продолжениот притвор е на барање на Обвинителството за гонење на организиран криминал и корупција. Обвинителката Лиле Стефанова предлогот до Кривичниот суд го доставила во петокот, неколку дена пред истек на првично определениот за случајот со плацовите на Водно.

Според судот се уште постои можност Камчев да се даде во бегство.

Истрагата за случајот Плацови на Водно, Обвинителството ја отвори во октомври лани, а Камчев како еден од осомничените беше притворен пред еден месец, откако белешка дека се подготвува за бегство до обвинителството достави АНБ. Токму за оваа белешка неговата одбрана ќе поведе постапка пред Кривичниот суд од кој ќе бараат да утврди дека била незаконита. Според адвокатот Тони Менкиноски, АНБ делувала надвор од своите овластувања.

За одбраната е спорно определувањето на притворот без, како што тврди, докази, па затоа до Судскиот Совет ќе поднесе и претставка за нестручно и несовесно работење на судијата на претходна постапка. Менкиновски и денеска тврдеше дека врз Камчев во притворското одделение во Шутка, каде што е сместен, се вршело тортура, што претходно беше демантирано од затворската управа.

Во истрагата за случајот Плацовите на Водно, покрај Камчев, меѓу осомничените се и експремиерот Никола Груевски и поранешниот директор на УБК, Сашо Мијалков. Предметот се однесува на тоа дека со пари од членарина и партиски донации за ВМРО-ДПМНЕ биле купувани атрактивни плацови на Водно. Станува збор за земјиште од 11 000 квадратни метри и сума од 1,3 милион евра. За ова неодамна, обвинителството вршеше претрес и во станови што се поврзуваат со Груевски.