Францускиот претседател Емануел Макрон, синоќа пред Елисејската палата испрати јасна порака дека Македонија повеќе не треба да остане во чекалната на Европската Унија. Во изјавата пред средбата со премиерот Заев, нагласи дека активно ќе го поддржи изнаоѓањето решение со Бугарија.
-Ние одлучивме да ги отвориме преговорите за членство со вашата земја во месец март 2020, но, сега дојдено е време да се конкретизира таа одлука, а покасно ќе зборуваме за начините како да се постигне тоа. Јас сум подготвен активно да го поддржам изнаоѓањето на компромис со Бугарија. Во однос на вашите реформи кои беа спроведени под ваше водство од 2017 година, вашата земја заслужува да ги почне без чекање преговорите за членство. Франција ќе биде внимателен партнер и одблиску ќе ги следи работите. , изјави Емануел Макрон, претседател на Франција
Премиерот Заев од своја страна повтори дека предлозите на португалското претседателство се добра основа за решение, потенцирајќи дека верува оти Франција може да биде мотор на проширувањето на земјите од Западен Балкан.
-Пред нас е самитот на Европскиот Совет во јуни што е вистинска шанса да се отргне блокадата на нашиот европски пат. С.Македонија е подготвена за дијалог кој ќе ни донесе прифатливо решение во рамките на Договорот за пријателство со Бугарија. Тоа значи дека прашањето за македонскиот јазик и македонскиот идентитет не треба да се најдат на преговарачката маса, нагласи Зоран Заев, претседател на владата
Дали и колку изјавите на Макрон се вовед во засилен дипломатски притисок врз Софија, останува да се види во деновите што претстојат до 22 јуни. Случајно или не, неколку часа по ставот на францускиот лидер, со експлицитна порака на Твитер се огласи портпаролот на Стејт Департментот, Нед Прајс.
-Поддржуваме отворање преговори за членство во ЕУ со Македонија и Албанија без одложување. Се ангажираме на највисоки нивоа во Владата, за да ја демонстрираме нашата посветеност кон европскиот пат на земјите аспиранти, напиша Прајс. За поранешниот амбасадор, Благој Зашов, ваквиот след на настани, не можат да се протолкуваат само како коинциденција.
Но, од Бугарија дуваат старите ветришта. Шефот на дипломатијата Светлан Стоев, како што пренесоа бугарските медиуми, денеска му предочил на чешкиот колега Кулханек дека позицијата на Софија кон земјава останува непроменета, откако чешкиот дипломат ја истакнал позицијата дека Македонија треба да ги почне преговорите уште месецов.