Тропската бура Иан вчера полека почна да се движи северозападно кон Куба со постојани ветрови од 60 милји на час, според NHC. Куба вчера евакуираше туристи од југозападниот брег на Островот на Младоста (Исла де ла Хувентуд), како и работници од блискиот Кајо Ларго, една од најпознатите туристички дестинации во земјата, објавија државните медиуми.
Пристаништата низ западната половина на Куба веќе се затворени во петокот навечер, додека рибарите се вратија во пристаништето пред претстојното невреме, кое се очекува да донесе обилни врнежи. Кубанските власти ја следеа бурата додека таа се движеше поисточно отколку што претпоставуваа претходните прогнози, поблиску до главниот град Хавана.
НХЦ соопшти дека се очекува Иан да се развие во голем ураган во источниот Мексикански Залив до средината на неделата, но истакна дека „неизвесностите во прогнозното движење и интензитетот остануваат поголеми од вообичаеното“.
Синоќа тропската бура Иан беше оддалечена 695 километри од Кабо Сан Антонио, најзападната точка на Куба. Центарот објави дека се издадени предупредувања за урагани за кубанските провинции Исла де Хувентуд, Пинар дел Рио и Артемиса.
„Налетите на бура и опасни по живот ветрови со урагански сили се очекуваат во делови од западна Куба доцна во понеделник“, соопшти NHC.
Исто така, се предвидува дека бурата Иан ќе предизвика обилни врнежи, поројни поплави и можни лизгања на земјиштето на некои места. До средината на неделата, бурата може да предизвика поплави низ Флорида, додаде NHC. Официјални лица од Флорида ги предупредија жителите да се подготват за невремето со складирање на храна, вода, гориво, батерии и лекови.
Гувернерот Рон Де Сантис прогласи вонредна состојба во сите 67 окрузи на Флорида. „Патот на тоа невреме се уште е неизвесен“, рече тој на прес-конференцијата.