Нападот го снимиле полицајците со нивните телесни камери кога пристигнале во домот на Пелоси на 28 октомври 2022 година, кога тој бил нападнат. Видеото покажува момент на хаос во кој вооружениот напаѓач Дејвид ДеПејп со чекан го напаѓа сопругот на Ненси Пелоси.

На видеото се гледаат Пол Пелоси и Дејвид ДеПејп како го држат чеканот, а вооружениот напаѓач ја држи Пелоси за рака додека полицајците ја отвораат вратата.

„Спушти го чеканот“, вели полицаецот. „Ух, не“, одговара ДеПејп, кој потоа го грабнува чеканот од раката на Пелоси и го напаѓа. Полицајците потоа влетале во куќата, го совладале ДеПејп и му ставиле лисици на рацете.

Покрај снимката од камерите на телото, судот објави датотеки кои вклучуваат аудио од полициските разговори со ДеПејп, јавува Си-Ен-Ен, повикот на Пол Пелоси на 911 додека ДеПејп бил во домот и видеото од надзорот.

Одлуката на судот во Калифорнија со која се наредува јавно објавување на материјалот уследи по барањето на коалицијата на новински организации, вклучително и CNN.

Адвокатите на ДеПејп се спротивставиле на јавното објавување на снимките, велејќи дека тоа „непоправливо ќе му наштети“ на неговото право на правично судење. ДеПејп се изјаснил за невин за голем број државни и федерални злосторства поврзани со нападот, вклучително и напад и обид за убиство.

Да потсетиме дека ДеПејп упаднал во куќата на Пелоси и наводно извикал „Каде е Ненси?“. Во разговор со полицијата тој признал дека имал намера да ја пронајде претседателката на Претставничкиот дом и да ја држи како заложник.

„Ни кажа дека планира да ја киднапира. Ако му ја кажеше „вистината“, ќе ја пуштел да си оди, а ако „лажеше“, ќе и ги скршел колената“, се вели во извештајот на ФБИ.

„Беше сигурен дека Ненси нема да ја каже „вистината“, додаваат тие. Понатаму, ДеПејп наводно ѝ кажал на полицијата дека Ненси Пелоси е „водачот на глутницата“ за лаги што ги продава Демократската партија. Тој изјави на полицијата дека другите членови на Конгресот ќе увидат дека има последици за нивните постапки доколку „Пелоси биде одвлечена во комората со скршени колена“.

Неодамна е објавено дека ДеПејп ѝ открил на полицијата список на негови цели, освен оние за Пелоси. Планирал да го нападне Хантер Бајден, синот на претседателот Џо Бајден, гувернерот на Калифорнија Гевин Њусом и актерот Том Хенкс, изјави полицаец кој разговарал со него во болницата веднаш по нападот.

Во претходното судско распрашување се вели дека ДеПејп како други цели именувал неколку истакнати државни и федерални политичари, нивни роднини и локален професор, но не идентификувал ниту еден од нив.

Полицаецот рече дека ДеПејп зборувал и за теории на заговор што го поттикнале нападот. Една од целите на ДеПејп бил Њусон, демократ и гувернер на Калифорнија почнувајќи од 2019 година. Неговата друга цел беше синот на Бајден Хантер.

Бајден беше политичка цел на десницата во последниве години, особено откако Њујорк пост објави во октомври 2020 година дека има инкриминирачки мејлови меѓу синот на претседателот Хантер и украински бизнисмен.

Актерот Том Хенкс, во меѓувреме, го поддржа Џо Бајден, појавувајќи се покрај него на масовно собирање средства во 2020 година.