Нотарите лути на Филков, го оправдуваат зголемувањето на тарифите оти имале зголемени обврски

Ни ги зголемуваат обврските, вработуваме луѓе, а нотарската тарифа не го следи порастот на платите и животните трошоци, се жалат од Нотарската комора.

Ни ги зголемуваат обврските, вработуваме луѓе, а нотарската тарифа не го следи порастот на платите и животните трошоци, се жалат од Нотарската комора по најавата на министерот за правда Филков дека ја повлекува одлуката на неговиот претходник Кренар Лога, нотарските тарифи да поскапат од први септември. Во реакцијата од комората се посочува дека е подготвена подетално да ги презентира анализите и аргументите за потребите од измените на тарифата и дека истата во ниеден случај не може да биде скриен процес.

„ Нотарската тарифа не само што не го пратеше трендот на пораст на платите, животните трошоци, стапката на инфлација и вредноста на правната работа, туку напротив во овие 25 години, истата во континуитет е намалувана во 2010, 2016 и 2019 година. Влијание на измените на Нотарската тарифа има и фактот што од воведувањето на нотаријатот, донесени се низа закони со кои се зголемуваат обврските на нотарите, што само по себе повлекува нови вработувања во нотарските канцеларии, а нотарската тарифа паралелно се намалува. Што значи, нема никаков рационален сооднос и економска исплатливост за функционирање на нотаријатот како независна и самостојна јавна служба.“ - Нотарска комора.

Министерот Филков вчера обвини дека Лога десет дена пред да ја напушти функцијата ги покачил нотарските тарифи до десет пати. Оваа одлука кажа била донесена во февруари, а објавена во Службен весник на 12 јуни, но ниту Владата, ниту Министерството не ја информирале јавноста.

Лога, пак во писмен одговор за Канал 5 тврди дека немало ништо скришно во процесот, и посочува доколку новата влада не се согласува со оваа одлука може слободно да ја укинат иако има многу аргументи во корист на барањата на Нотарската комора..

-Напротив, процесот траеше минимум шест месеци и повеќе состаноци и барања од страна на Нотарската комора, има и објава од официјалната средба кога се дискутирани сите предизвици на нотаријатот заедно за работна група за законски измени. Во февруари по барање на Комората беше прв пат ставен на дневен ред, но се бараше повеќе време да се разгледа подетално и после неколку недели и ја доби поддршката од Влада. Непопуларно е кога тарифите се покачуваат и ниту еден министер нема да е среќен со ваков потег, но три пати тие тарифи се намалени.“ Кренар Лога – Поранешен министер за правда.

Според анализата на порталот „Пари“, објавена во јуни годинава, десетмината нотари кои имале најмногу или најголеми предмети, лани заедно оствариле промет од 4,6 милиони евра. Откако ги намириле своите трошоци – им останал нето-приход пред оданочување од околу 1,5 милиони евра.

Саркози ќе се жали до Европскиот суд за човекови права- осуден е на 3 години поради корупција

Поранешниот француски претседател Никола Саркози, осуден за корупција и трговија со влијание во врска со случајот познат како прислушување, рече дека пресудата е „неправедна“ .

Поранешниот француски претседател Никола Саркози, осуден за корупција и трговија со влијание во врска со случајот познат како прислушување, рече дека пресудата е „неправедна“ и најави дека ќе се повлече од своите „јавни активности како поранешен претседател“ и ќе поднесе жалба до Европскиот суд за човекови права.

Касациониот суд во Париз го осуди Саркози на три години затвор, од кои една година беше условна со електронски мониторинг уред и тригодишна забрана за кандидирање за јавна функција.

Во соопштението објавено на неговиот профил X, Саркози најави дека ќе ги „замрзне (своите) јавни активности како поранешен претседател“ и рече дека нема да се рекламира во медиумите, пренесува порталот BFM TV.

„За мене нема никакви изненадувања и новости. За да не оставам впечаток дека барам некакви привилегии, доброволно се откажав од дел од поволностите на кои имав право. Поднесов жалба до Европскиот суд за човекови права, кој ќе одлучи дали сум жртва на неправда. Жалбата ќе биде поднесена пред крајот на месецот.

Со електронската нараквица, поранешниот француски претседател ќе може да го напушти својот дом само меѓу 8 и 20 часот во вторник, петок, сабота и недела и до 21:30 часот во понеделник, среда и четврток.

Мајмун остави 22 милиони луѓе без струја- цела држава во темнина поради колапс на системот

Прекинот на струја што се случил во Шри Ланка е предизвикан на многу необичен начин - мајмун влегол во трафостаница.

„Мајмунот дошол во контакт со трансформатор, предизвикувајќи прекин во системот за снабдување со електрична енергија“, рече во изјавата министерката за енергетика на Шри Ланка, Кумара Јајакоди.

Министерката Јајакоди наведува, како што пренесува Le Figaro во Париз, дека инцидентот се случил во јужните предградија на главниот град Коломбо. Проблемот сè уште не е целосно решен, иако потрошувачите во некои области ја вратија струјата. Засега не е јасно уште колку време ќе биде потребно за сите да добијат струја.

„Инженерите се на местото на прекинот и работат на што поскоро враќање на струјата“, изјави министерот Јајакоди.

Фигаро потсетува дека Шри Ланка со месеци страдаше од недостиг на електрична енергија во летото 2022 година, кога земјата западна во економска криза, а жителите тогаш имаа струја само 13 часа на ден.

Шри Ланка има население од околу 22 милиони жители.

Примерок од првото издание на книгата за Хари Потер на аукција е продаден за 18.000 фунти

Реткото прво издание на романот на Џ.К.Роулинг, Хари Потер и каменот на мудроста, е продадено на аукција за 18.000 фунти( околу 22.000 евра) , пренесуваат денеска британските медиуми.

Овој примерок е дел од првото издание објавено во 1997 година, пишува весникот Стандард.

Се очекувало примерок од романот да се продаде за 20.000 до 30.000 фунти (24.000 до 36.000 евра).

Ова е копија која е наменета за библиотеки, а на една од првите страници има ознака за библиотека.

Копијата е исто така единствена по тоа што содржи три грешки при печатењето.

Серијата романи за Хари Потер, која вклучува седум книги подоцна адаптирани во блокбастер филмови, стана една од најпопуларните во светот.

притисни ентер