Ниту половина од ваучерите за туризам не се искористени

Ниту половина од ваучерите за туризам не се искористени а важат уште 30 дена. 

Од околу 110 илјади граѓани кои ги добиле, само 43 илјади отишле на одмор на државна сметка. Министерот за економија Бектеши сепак е задоволен од резултатите кои ги дала мерката.

Прашан за објавите по социјалните мрежи каде наголемо се препродаваат ваучери за кеш а хотелиерите наводно букирале гости со ваучери кои не биле на нивно име, Бектеши вели дека досега не регистрирале злоупотреби.

„Во месец август имаме зголемување на бројот на домашни туристи споредено со 2019 година од 8,9% а во септември имаме зголемување на домашните туристи со 33,7 отсто. Секојдневно ја праќаме листата на ваучери кои се користат во истиот ден до Држвниот пазарен инспекторат со што го имаме и извештајот онлајн а тие вршат теренски контроли.“, изјави министерот Крешник Бектеши.

Од денес стартува пријавувањето за грантови за туристичките агенции, повраток на таксата од 2019 година како и еднократна помош од три просечни плати за туристичките водичи - како дел од четвртиот антикризен пакет мерки. Ќе трае до 27 месецов а ќе се врши на платформата „Дома си е дома“ каде е наведено што се е потребно за аплицирање. Парите ќе се исплатат до крајот на годината.

Стопанската комора ја поздравува сегашната државна помош за туризмот но сметаат дека само делумно ќе ги ублажи негативните ефекти. Фокусот, според нив, треба да бидат странските туристи, а за таа цел државата да им овзоможи бесплатни ПЦР тестови. Како најголем проблем ја посочија неможноста на хотелиерите да ја искористат помошта за исплата на плати.

БАРАЊА НА СТОПАНСКА КОМОРА ЗА ПОДДРШКА НА ТУРИЗМОТ

1. Законот за финансиска поддршка за платите безусловно да важи за сите компании од овој сектор.

2. Бесплатни ПЦР тестови за странските државјани кои ќе престојуваат во Македонија

3. Поголеми напори за промоција на туристичките потенцијали во земјава

Освен за туризмот, аплицирањето за грантови започнува и за игротеките и рестораните за свадби, но од Независната угостителска комора негодуваат дека можност да добијат помош ќе имаат само мал дел до рестораните, бидејќи најголем дел од нив не се регистрарани само за свадби, како што се бара со условина од огласот. Помошта за петте мерки „тежи“ 7,5 милиони евра.

Американска медицинска сестра одбила да се пензионира, се заразила со корона и починала

По повеќе од 50 години како медицинска сестра, Бети Гриер Галагер (78) имала право на пензија. Но, таа решила да остане и да работи за време на пандемијата за да помогне во критичната ситуација.

Галахер работела во ноќна смена во Медицинскиот центар во Алабама за да може да им предава на помладите медицински сестри. Таа се грижела за своите пациенти на ист начин како што се грижела за семејството и за колегите. Таа, според нејзините најблиски, била омилена медицинска сестра.

Кога започнала пандемијата на ковид-19 во март, колегите на Галагер биле загрижени за нејзиното здравје и ја замолиле да остане дома. Но, таа сметала дека им е потребна на пациентите и на соработниците, па продолжила да работи сè додека не се заразила со коронавирус во декември.

Таа починала од ковид-19 на 10 јануари, ден пред нејзиниот 79-ти роденден, во истата болница во која работела поголемиот дел од нејзината кариера, пишува Си-Ен-Ен.

"Таа не го стори тоа за да се истакне. Го стори тоа затоа што ова беше нејзината професија", рече нејзиниот син Карсон Гриер.

Медицинската сестра Џо Хатен, која работела со Галагер, забележала на 19 декември дека инаку неуморната Бети има проблеми со дишењето. Галахер рекла дека станува збор за истоштеност, но следниот ден завршила во болнички кревет.

Ја тестирале и била позитивна на коронавирус. Хатен и другите колеги се обиделе да и направат на Галахер да и биде што е можно поудобно. Откако го обиколувала одделот, Хатен застанувала покрај нејзината соба и и покажувала слики од своето куче.

Пред да почине, Галахер испратила порака до еден нејзин колега и напишала дека ќе се повлече кога ќе се излекува од болеста.

Во Египет се откриени најстарите саркофази и досега изгубен храм (ВИДЕО)

Египетските археолози откриле изгубен погребен храм во областа Сакара со најстари саркофази некогаш пронајдени на тие древни гробишта.

Египтологот Захи Хавас и неговите колеги го ископале погребниот храм на кралицата Неарит, една од сопругите на кралот Тетис, првиот фараон на Шестата египетска династија. Откриле и 52 гробни места со повеќе од 50 дрвени саркофази. Овие дрвени ковчези се стари околу 3000 години и се најстарите саркофази пронајдени во Сакара.

"Овие се дрвени ковчези. Тие прикажуваат многу богови на кои што им се поклонувале во тоа време, заедно со разни упатства од Книгата на мртвите за кои се сметало дека им служи на мртвите за да го пронајдат вистинскиот пат кон другиот свет", се вели во соопштението на египетското министерство за туризам и антиквитети.

Археолозите пронашле стотици ковчези на разни високи функционери и свештеници во Сакара во изминатите неколку месеци, кои датираат од доцниот период на древен Египет и периодот на Птоломеидите, пишува ABC News.

Во најновото ископување биле пронајдени постари саркофази од периодот на Новото египетско кралство што траело од 16 век п.н.е. до 11 век п.н.е.

„Ова откритие потврди дека Сакара се користела како некропола и за време на Новото Кралство“, се вели во соопштението на Министерството.

Експертите пронашле уште едно светилиште направено од тули од кал на длабочина од 24 метри. Хавас вели дека работата ќе продолжи се додека не се достигне гробната комора.

„На гробните места, пронајдовме голем број археолошки артефакти и статуи што ги претставуваат боговите како Озирис и Птах-Сокар-Озирис“, додаде Министерството.

Сакара се наоѓа на околу 25 километри јужно од пирамидите на платото во Гиза, и таму е познатата скалестата пирамида на фараонот Џозер, прва од фараонската ера. Додека Мемфис бил главен град на древен Египет, Сакара служела како негова некропола.

Египќаните ги закопувале своите мртви пред 3000 години. Но, таму биле погребани не само благородниците, туку и граѓаните од средната и работничката класа.

Влада: Пензиите повисоки во просек за 185 денари, ќе се исплаќаат од 26 јануари

Владата на денешната седница ја разгледа и усвои Информацијата за исплата на пензии за месец јануари 2021 година

Согласно законското усогласување што се врши според движењето на индексот на трошоците на животот, пензиите бидат повисоки и тоа најниските пензии за 134 денари, а просечната пензија ќе биде повисока за 185 денари и со нив ќе можат да располагаат преку мрежата на банкомати и во трговската мрежа од 26.01.2021 година.

– Пензиите за граѓаните кои не користат картички ќе бидат исплатени во четири групи според следниот распоред согласно висината на пензијата: За пензии со висина до 11.000 денари, исплата да се изврши на 26.01.2021 година (вторник), за пензии со висина 11.001 – 14.000 денари, исплата да се изврши на 27.01.2021 година (среда), за пензии со висина 14.001 – 18.000 денари, исплата да се изврши на 28.01.2021 година (четврток), и за пензии со висина над 18.001 денари, исплата да се изврши на 29.01.2021 година (петок), соопштија од владината прес – служба.

притисни ентер