Секој што мисли дека Агро советот ќе биде место на кое ќе се бара се и сешто и дека ќе има други влијанија, веднаш ќе му се заблагодариме. Овде нема да се крои политика, туку секој со својот ум, концепт и идеи ќе разговара и ќе нуди предлози и решенија, порача министерот за земјоделство, шумарство и водостопанство Љупчо Николовски на денешната конститутивна седница на Советот за земјоделство и рурален развој што се одржа во Владата.
Приоритет на Советот, потенцира Николовски, ќе биде домашното производство и обезбедувањето храна.
Министерот најави дека следуваат нови мерки со кои ќе се предвиди поддршка за есенската седиба. Мерките ќе ги креира Агро советот во текот на летото.
Пред членовите на Советот Николовски се осврна на сработеното во изминатите месеци, потсетувајќи дека е донесен Националниот план за поддршка на производството на храна.
Според него, земјава, како и останатите држави во светски рамки, е исправена пред голем предизвик – кризата која се продлабочи со руско-украинскиот конфликт.
-Максимална е мобилноста во светот за обезбедување храна. Ние преземаме навремени чекори за поддршка на земјоделството, во соработка со сите засегнати страни и релевантни чинители. Во тој контекст и Агро советот има обврска, пред се кон државата, да предлага, дискутира и изнаоѓа реални решенија. Убеден сум дека ќе го дадеме својот максимум. Наша задача ќе биде да ги мотивираме земјоделците целото домашно производство да биде предадено, пред се, во домашните преработувачки капацитети, истакна Николовски.
Тој, како што напомена, од Советот очекува широка, конструктивна дебата.
На предлогот на Министерството за земјоделство, Владата донесе Одлука за повторно активирање на Советот за земјоделство и рурален развој кој првпат е основан во 2012 година, но ниту еднаш досега не заживеа во формата за која беше креиран со Законот за земјоделство и рурален развој.
Во Агро советот учестуваат претседателите на постојаните потсекторски групи, претставници на здруженија на производители, преработувачи, стопански комори, претставници на науката, на потрошувачите и претставници од здруженијата на единиците на локалната самоуправа и здруженијата за заштита на животната средина.
Со ребалансот на Буџетот се обезбедени околу четири милијарди денари плус за земјоделството кои ќе бидат дел од Интервентниот фонд за креирање нови мерки, но и за целосно расчисување на сите долгови по секоја основа и кон кој било корисник. Се надевам дека нема да има ретроградни сили кои ќе се обидат да ја закочат оваа работа, туку напротив, дека сите ќа дадат поддршка во Собранието, рече денеска министерот за земјоделство, шумарство и водостопанство Љупчо Николовски.
Во обраќањето на конститутивната седница на Советот за земјоделство и рурален развој што се одржа во Владата, Николовски порача дека секој денар обезбеден од парите на граѓаните преку Буџетот, мора транспарентно и рационално да се искористи, а воено профитерство не смее да има.
-Даваме финансиска поддршка за производство дома. Испраќам јасна порака дека ќе ја следиме секоја компанија, секој трговец, зашто не може од парите на граѓаните во ваква светска криза и војна некој да прави воено профитерство и да тера бизнис. Не, сега е време да се обезбеди храна и затоа, за секој денар како инпут во земјоделството обезбеден од парите на граѓаните преку Буџетот, со ребалансот, секој ќе треба етички, морално и одговорно да се однесува. Имаме мандат да предложиме одлуки во секој момент доколку увидиме дека постојат загрозувачки елементи во нечие однесување, подвлече министерот.