Македонија

Николовски: Со Планот за борба против корупцијата нема недопирливи функционери

Општина Струга е средно транспарентна општина, каде имаме необјавени документи и информации што граѓаните треба да ги знаат.

Ќе продолжиме да правиме притисок, да разговараме, да работиме макотрпно во правец на подигање на свеста, но и на законските обврски на сите институции, истакна вицепремиерот задолжен за борба против корупцијата и криминалот, одржлив развој и човечки ресурси, Љупчо Николовски.

Одговарајќи на новинарско прашање за потрошените околу 30.000 евра за ручеци и други репрезентации на Струшкиот градоначалник Рамиз Мерки минатата година, по денешната посета на граничниот премин Ќафасан, Николовски рече дека на средбата со градоначалникот било посочено кои документи треба да се објават јавно за да се подобри транспарентноста на Општината.

– При сите посети на општините го презентираме Планот за борба против корупција и препораките што Владата ги има за општините и следењето на транспарентноста. Ги следиме сите општини во делот на објавување на 22 типа информации од јавен карактет согласно членот 10 од Законот за информации од јавен карактер. На денешната средба со градоначалникот Мерко воочивме кои документи треба да бидат јавно објавени да се подобри транспарентноста на општината, рече Николовски.

Општина Струга, додаде, изготви антикорупциска програма, која ги детектира ризиците, мерките и активностите што треба да ги преземе. Првпат, подвлече, општините изработуваат вакви програми и со тоа се јакне свеста и кај институциите и кај граѓаните, кои треба да се насочат во тој правец.

– Ние не работиме по предмети. Се држиме до кодексот, кој се однесува за сите именувани функционери во Владата и преку кои праќаме порака дека нема недопирливи, дека во секој еден случај се постапува. Санкционирањето и носењето одлуки е поздравено и од ГРЕКО, бидејќи мора еднаш за секогаш да си ги средиме состојбите и законите, со сите правни норми да се однесуваат за сите, а институциите се тука да си ја вршат работата. Ние мораме да се држиме до тоа што е наша надлежност во рамките на Владата, реализацијата и следењето на реализацијата на Планот за борба против корупцијата, нагласи Николовски.

Тој изрази задоволство од реализацијата на Планот за борба против корупцијатаи и оти на секоја владина седница се следи и се прават средби и проверки до каде се општините за спроведување на мерките, вклучувајќи ја и Општина Струга.

Свет

Руски воен репортер загина во Украина

Воениот известувач на рускиот весник „Известија“ Семјон Еремин, загинал во напад на украинско беспилотно летало во југоисточна Украина, објави весникот.

Нападот се случил вчера кога 42-годишниот Еремин и неговата екипа се враќале од снимање од селото Прјутне, во близина на линијата на фронтот во регионот Запорожје.

Украина досега не го коментираше настанот.

Најмалку 15 новинари се убиени од почетокот на руската инвазија на Украина во февруари 2022 година, според Комитетот за заштита на новинарите, непрофитна организација која се залага за слобода на медиумите ширум светот. /МИА

НБА

Леброн: Јокиќ е еден од најдобрите на сите времиња

Првата ѕвезда на Лос Анџелес лејкерс, Леброн Џејмс искажа комплименти за центарот на Деневер, Никола Јокиќ.

Лејкерси ќе се сретнат со Нагетс во 1. коло од плејофот, а дуелот Џејмс – Јокиќ предизвикува големо внимание кај светската кошаркарска јавност.

- Еден од најдобрите досега. Едноставно е таков. Јокиќ може се. Што е најважно, тој го менува начинот на кој неговите соиграчи размислуваат за сопствената игра. Кога некој може да ги инспирира другите да играат на ниво на кое не ни знаеле дека можат, тоа е доказ дека зборуваме за навистина одличен играч, рече Џејмс.

Првата средба во плејоф пресметките меѓу Лос Анџелес лејкерс и Денвер нагетс е закажана за утре. /МИА

Свет

Претставничкиот дом на САД треба да гласа за големиот пакет помош за Украина, Израел и Тајван

По неколкумесечно одложување, Претставничкиот дом на американскиот Конгрес денеска треба да гласа за големиот пакет помош за Украина, Израел и Тајван, вреден 95 милијарди долари, како и за евентуалната забрана на ТикТок во САД.

Предлог-законите се резултат на повеќемесечни тешки преговори меѓу демократите и републиканците, како и притисокот од сојузниците на САД и постојаните молби за помош од украинскиот претседател Володимир Зеленски.

Законите, сепак, сè уште имаат гласни противници во Конгресот, а надежите за усвојување зависат од кревката двопартиска коалиција која се обидува да ги надмине големите процедурални и законодавни пречки, пренесува Би-Би-Си.

Спикерот на Претставничкиот дом Мајк Џонсон изјави дека е решен да ги поднесе законите на гласање, и покрај фактот што радикалните републиканци може да побараат негово разрешување.

Предлогот предвидува 60,8 милијарди долари помош за Украина, 26,4 милијарди долари за Израел и 8,1 милијарди долари за индо-пацифичкиот регион, вклучувајќи го и Тајван.

Претставничкиот дом ќе гласа за секој предлог-закон поединечно, што значи дека некои може да поминат, а некои не.

Претседателот Џо Бајден и демократските пратеници во Конгресот со месеци се залагаат за нов голем пакет оружје за Украина, но републиканците под влијание на нивниот претседателски кандидат Доналд Трамп, ја условуваа помошта.

Со усвојување на законите, исто така, ќе му се овозможи на Бајден да конфискува и продава руски имот, а средствата да ги намени за помош на Украина, потег што беше прифатен и од другите земји од Г7.

Претставничкиот дом ќе ја разгледа и предложената законска одредба со која треба да се принуди ТикТок да се откаже од кинеската матична компанија ByteDance или ќе се соочи со забрана во САД, каде што има околу 170 милиони корисници.

Белата куќа соопшти дека „силно го поддржува“ вкупниот пакет помош и оти Бајден ќе ги потпише законите веднаш штом бидат усвоени од двата дома на Конгресот.

Тоа би можело да се случи за неколку дена, бидејќи лидерот на мнозинството во Сенатот, Чак Шумер, вети дека Сенатот со мнозинство од демократите брзо ќе преземе мерки штом бидат усвоени од Претставничкиот дом.

Сепак, политичките аналитичари во САД оценуваат дека усвојувањето на законите во Претставничкиот дом, би можело да го чини спикерот Мајк Џонсон губење на спикерското место. Неколку екстремно десничарски републикански пратеници предупредија дека може да го соборат Џонсон поради поддршката на нацрт-законите. /МИА