Македонија

Несторовска на Регионална конференција за реадмисија

Државната секретарка во МВР, Несторовска на Регионална конференција за реадмисија.

Државната секретарка во МВР Магдалена Несторовска денеска учествуваше и имаше воведно обраќање на Регионалната конференција за реадмисија, организирана од Регионалниот центар на Регионалната иницијатива за миграции, азил и бегалци (МАРРИ), како дел од проектот „Намалување на илегалната миграција кон Европската унија преку зајакнување на капацитетите на структурите поврзани со миграцијата во Западен Балкан".

Конференцијата, информираат од МВР, на која присуствувале претставници на државите од регионот, била одлична можност на едно место да се соберат сите релевантни чинители, експерти за реадмисија, регионални и меѓународните партнери, претставници на земјите на потекло на илегалните мигранти и баратели на азил.

Во воведното обраќање Несторовска констатирака дека кога зборуваме за реадмисија, не мислиме само на едноставна постапка на враќање на лицата во нивните земји на потекло.

– Напротив, концептот реадмисија опфаќа одржливо враќање и реинтеграција на лица во нивните земји на потекло. Без разлика дали станува збор за доброволно или присилно враќање истото мора пред сè да се реализира со целосно почитување на фундаменталните права и да биде реализирано на безбеден и достоинствен начин. Од тие причини и во интерес на самите лица кои треба да бидат вратени, соработката меѓу земјите од засегнатите региони би требало да се интензивира на начин што ќе овозможи реализирање на процесот на враќање во што е можно пократок рок и на што е можно похуман начин за засегнатите лица. Во таа насока, подобрувањето на соработката би требало да се насочи не само кон потпишување на договори за реадмисија (или други договори кои го регулираат и прашањето на реадмисијата) туку и нивна практична имплементација, како и овозможување на платформа за брза комуникација и соработка и во фазата на враќање и во подготвителната фаза, навела Несторовска, државен секретар во МВР.

Конференцијата имала за цел подигање на свесноста за проблемите и предизвиците, како и можност за размена на искуства и добри пракси во однос на договорите за реадмисија и нивното практично спроведување. /МИА

Формула

Хамилтон: Ќе се тркам долго откако ќе наполнам 40 години, Ферари не е нешто краткорочно

Британскиот пилот, Луис Хамилтон најави учество во трките во Формула 1 уште неколку сезони откако ќе наполни 40 години.

Во пресрет на кинеското Гран при, возачот на Мерцедес, Луис Хамилтон, изјави дека не е загрижен за коментарите за неговиот „доцен“ трансфер во Ферари во 2025 година.

- Мислам дека мојата одлука не треба да биде оправдана. Знам дека ова е вистинскиот избор за мене и откако ја донесов одлуката, ситуацијата не се промени. Никогаш немало момент да се посомневам, а туѓите коментари не ме тераат да се двоумам. И денес има луѓе кои се уште зборуваат глупости и тоа ќе продолжи до крајот на годината. И само ќе треба да го направам она што го направив минатиот пат. Ме чекаат возбудливи времиња. Ќе се тркам добро откако ќе наполнам 40 години. Ферари не е нешто краткорочно. Јас не сум најстариот пилот. Ќе се тркам подолго време и прекрасно е што Алонсо е сè уште тука, рече седумкратниот шампион во Формула 1.

Ф1 трката во Кина ќе се вози в недела (21 април).

Регион

Во тек преговори за формирање нова хрватска Влада, Пленковиќ најавува парламентарно мнозинство

Во Хрватска денеска се очекува да започнат преговорите за формирање на владејачкото мнозинство, бидејќи ниту една партија на вчера одржаните парламентарни избори, не освои доволно мандати самостојно да формира влада.

Владејачката Хрватска демократска заедница (ХДЗ) освои најмногу гласови, што на таа партија и дава најголеми шанси да формира ново мнозинство, но изборните резултати сугерираат дека ќе има тешки преговори за тоа.

„Наскоро ќе дознаете со кого ќе го формираме мнозинството во Саборот. Со некои колеги разговаравме во изборната ноќ, разговорите ги продолжуваме денеска“, објави на Фејсбук премиерот и претседател на ХДЗ, Андреј Пленковиќ.

Според последните податоци на Државната изборна комисија речиси од сите обработени избирачки места, ХДЗ освоила 61 мандат, односно 58 мандати во десет изборни единици во Хрватска и три во посебната 11-та изборна единица за дијаспората.

Тоа е вкупно пет мандати помалку отколку на последните парламентарни избори, кога Пленковиќ брзо дојде до мнозинство од 76 гласа во Парламентот со поддршка од осум претставници на националните малцинства, меѓу кои и тројца од Независната демократска српска партија (СДСС) и двајца претставници на мали либерални партии.

Коалицијата на левиот центар предводена од опозициската Социјалдемократска партија (СДП) освои 42 мандати, еден мандат повеќе отколку на изборите во 2020 година Таа партија немаше листа во 11-тата изборна единица.

На трето место е десничарското Движење Татковина со 14 мандати, Мост освои 11, а зелено-левичарската партија Можемо десет мандати.

Во Саборот ќе влезат и неколку помали партии од левиот центар, регионалниот Истарски демократски сабор и Независната платформа Север имаат по два мандата, а еден има коалицијата Фокус-Република.

Автомобилизам

„Гугл мапс“ ќе може да го посочува најблискиот полнач за електромобили

Апликацијата „Гугл мапс“ за „Андроид“ и „Андроид авто“ доби надградба што со помош на вештачката интелигенција, ќе нуди попрецизни насоки како да се дојде до најблискиот полнач за електрични автомобили.

Се работи за функции што, според познавачите, ќе овозможат полесна навигација, како и безгрижно и лесно планирање на долги патувања.

ВИ-алгоритмот собира кориснички коментари што содржат точни податоци за локацијата на полначот и како да се стигне до него. Описот може да содржи и дополнителни информации околу времето на чекање итн.

Додека електромобилот е во движење, „Гугл мапс“ ќе може да му предложи на возачот и други станици за полнење во близина. „Гугл мапс“ ќе може да нуди и план за долги патувања, на пр. со повеќе застанувања. Станиците за полнење електрични возила ќе бидат предложувани врз основа на нивото на батеријата, брзината на полначот и достапноста - сѐ тоа во реално време.