Нема договор за датумот на изборите, но партиите влегоа во кампања

Власта за избори на 21 јуни, опозицијата предупредува дека тие нема да можат да се одржат пред 30 јули.

Изборите се решение, а не проблем, порача претседателот на СДСМ Заев од Струмица по денешната средба со кандидатите за пратеници од четвртата изборна единица каде што е носител на листа. Заев го повтори ставот дека се потребни избори пред почетокот на летото и очекува опозицијата да учествува на нив. Вели дека немаат директна комуникација со лидерот на ВМРО-ДПМНЕ Мицкоски за датумот за избори, но верува дека ќе се одржи нова лидерска средба. Според Заев, се што може да се направи околу договор е до 30 мај и доколку нема прогласување нова вонредна состојба од 31 мај, како што вели, почнуваат да течат 22 преостанати денови од изборните рокови за да се одржат изборите на 21 јуни.

,, Изборите треба да се одржат во првиот можен термин, согласно законските можности и според состојбата со епидемијата. Се разбира, доколку ВМРО ДПМНЕ одлучи да го кочи овој неопходен демократски процес ние нема да имаме избор освен да ги почитуваме законските рокови за изборниот процес, рече Заев.

Од ВМРО-ДПМНЕ остануваат на ставот дека избори не може да се одржат пред 30 јули. Реагираат дека Заев ја става својата политичка кариера пред здравјето на граѓаните. „Заев и натаму се залага за брзи корона избори на кои наместо да броиме гласови ќе ги броиме новозаразените и починати од корона вирус. Не може да бидат решение избори на кои здравјето и животот на граѓаните ќе биде доведено во опасност“, велат од партијата.

Иако нема поместување на ставовите на власта и опозицијата околу термините за избори, а датумот останува неизвесен, партиите почнаа неформална кампања,со  засилено темпо на терен. Додека од СДСМ одат на средби со кандидатите за пратеници од повеќе изборни единици, носителите на листи од ВМРО- ДПМНЕ снимаат спотови во рамки на кампањата „Летувајте во Македонија“, што ја почна партискиот лидер Мицкоски,  пред неколку дена.

притисни ентер