Македонија

На меѓувладината седница во Софија потпишани неколку договори, меѓу нив за железничкиот Коридор

Неколку билатерални договори за соработка во различни области потпишаа денеска ресорните министри во рамки на заедничката седница на владите на Македонија и Бугарија, која се одржува во Софија.

Министрите за транспорт и врски Благој Бочварски и Николај Сабев потпишаа два документа со кои се зајакнува инфраструктурното поврзување меѓу двете земји – за железничкиот Коридор 8 и за директната авио-линија Софија – Скопје.

Поконкретно потпишани се Меморандум за развој на железничкото поврзување Скопје-Софија, преку формирање на заедничка работна група, со цел забрзување на изградбата на железничкиот Коридор 8 и Иницијатива за воспоставување на авиолинија – Софија – Скопје.

Коридорот 8 ќе биде една од главните теми на кои престојниот период ќе работи конкретната работна група, во чиј делокруг е инфраструктурата, а како што најави денеска премиерот Димитар Ковачевски на отворањето на меѓувладината седница, ќе се работи на сите делови на овој коридор и на патниот и на железничкиот, но и во делот на телекомуникациите.

Бочварски претходно ијзави дека Коридорот 8 од наша страна, односно експресниот пат Ранковце- Крива Паланка, третата лента кон Деве Баир и целосната рехабилитација на постоечкиот пат треба да бидат завршени кон средината на 2023 година со што ќе имаме комплетно нов Коридор 8, од Скопје до границата со Бугарија. Тоа ќе биде инвестиција од 100 милиони евра. Министерот најави и дека новиот начин на соработка ќе ја забрза и динамиката на железницата кон Бугарија.

Директната авиолинија, бугарскиот премиер Петков ја најави уште за време на посетата на Скопје, нагласувајќи дека во период од еден месец ќе се направат сите анализи и проценки, а веќе за 60 овој проект ќе биде реализиран.

Бочварски претходно изјави дека ќе се бара компанија која ќе спроведува исплатливи рути, како на пример Скопје-Софија-Атина, со цел да се избегне нејзино субвенционирање.

Се споменува бугарската компанија „Гуливер", како и тоа дека станува збор за нискобуџетни летови кои понатаму ќе прават примамлива интерконекција за летови за Канада и САД, но Бочварски не наведува конкретни имиња и вели дека се отворени сите опции. Нагласува дека прво ќе разговара со оператори коишто треба да имаат финансиска исплатливост.

Бочварски и Сабев денеска во Софија потпишаа и Меморандум за либерализација на стоки за и од трети земји.

Земјоделството и економијата се меѓу секторите, на кои интензивно ќе се работи претстојниот период. Меморандум за разбирање и соработка во областа на земјоделството, аграрните науки, селските реони и шумското стопанство потпишаа денеска министрите за земјоделство на Северна Македонија и Бугарија, Љупчо Николовски и Иван Иванов.

Министрите за економија на двете земји Крешник Бектеши и Даниел Лорер, пак потпишаа Меморандум за разбирање помеѓу ИАНМСП и Агенцијата за поттикнување на претприемништвото на Република Македонија.

Свет

Конференција во Брисел: Проширувањето на ЕУ е геополитички императив

„Она што треба да го направиме во наредните години е постепено да ги интегрираме оние земји кои се на пат кон европска интеграција.

Проширувањето на ЕУ е геополитички императив, но мора да се заснова на заслуги, се согласија денеска учесниците на конференцијата „Проширување и продлабочување на Унијата: Што е влогот за ЕУ и граѓаните на ЕУ на следното свикување на Парламент“, што се одржа во Брисел во организација на Европскиот парламент и на Европскиот универзитетски институт од Фиренца.

Учесниците на дискусијата за очекувањата од процесот на проширување во периодот од 2024 до 2029 година се залагаа за постепена интеграција на земјите кандидати во ЕУ и ја истакнаа важноста од целосно усогласување со надворешната и безбедносната политика на ЕУ.

„Она што треба да го направиме во наредните години е постепено да ги интегрираме оние земји кои се на пат кон европска интеграција. Тоа значи дека целта е да се подобри политичкото здружување и економската интеграција на земјата што е можно повеќе пред формалниот пристап“, рече претседателот на Комисијата за надворешни работи на Европскиот парламент, Дејвид Мекалистер.

Тој посочи дека токму тоа е целта на Инструментот за реформи и раст за Западен Балкан, на кој на регионот му се нудат шест милијарди евра дополнителна финансиска помош.

Регион

Вучиќ со Лајчак за зголемените предизвици со кои се соочува Србија

Српскиот претседател Александар Вучиќ денеска во Мостар, каде што е во посета, се сретна со специјалниот пратеник на ЕУ за дијалог меѓу Белград и Приштина, Мирослав Лајчак, со кого, како што рече, имал „отворен и конкретен разговор“.

Српскиот претседател Александар Вучиќ денеска во Мостар, каде што е во посета, се сретна со специјалниот пратеник на ЕУ за дијалог меѓу Белград и Приштина, Мирослав Лајчак, со кого, како што рече, имал „отворен и конкретен разговор“ за растечките предизвици со кои се соочува Србија, јави дописникот на МИА од Белград.

-Уште еден отворен и конкретен разговор со Мирослав Лајчак за растечките предизвици пред нас, положбата на српскиот народ, настаните на Косово и Метохија и се помалиот простор за решавање на отворените прашања преку конструктивен дијалог и почитување на меѓународното право, напиша Вучиќ на неговиот Инстаграм профил.

Вучиќ повторил оти Србија „упорно продолжува да води одговорна и сериозна политика на зачувување на мирот и стабилноста“, како и нагласил дека за Србија „нема повлекување или компромис“ кога станува збор за безбедноста на српската народот и заштитата на националните интереси.

Живот

Британците планираат трајно да забранат купување цигари

Членовите на британскиот парламент денеска ќе гласаат за предлогот на премиерот Риши Сунак за трајна забрана за купување цигари на сегашните 15-годишници и помлади.

Иако се очекува мерката да помине, планот на Сунак да наметне едно од најстрогите правила против пушењето налути некои членови на неговата владејачка Конзервативна партија, вклучително и поранешните премиери Борис Џонсон и Лиз Трус, кои тврдат дека државата не треба да диктира како луѓето треба да го водат својот живот.

Пратениците ќе гласаат за предлог-законот како што сакаат, што значи дека не треба да гласаат по партиска линија. Сличен закон во Нов Зеланд беше отфрлен од новата коалициска влада пред да стапи на сила оваа година.

Силното противење на најавената мерка во рамките на конзервативците ќе му нанесе уште еден удар на Сунак, кој веќе е на удар на критиките од сопствената партија за прашања кои се движат од климатските промени до одбранбената политика.

Според предлог-законот, на децата родени во 2009 година и подоцна ќе им биде забрането легално да купуваат тутунски производи бидејќи, како што тврди Сунак, „може да се спречи единствената најголема причина за лошо здравје, инвалидитет и смрт“.

Планот на Сунак има поддршка од медицински експерти и добротворни организации кои велат дека 80.000 луѓе годишно умираат од пушење и многу повеќе од болести поврзани со пушењето.

Конзервативниот пратеник Сајмон Кларк верува дека забраната може да се покаже како контрапродуктивна.

„Се плашам дека забраната ќе го направи пушењето уште попривлечно и секако постои ризик од создавање црн пазар и незамислив предизвик за властите“, рече Кларк.

И покрај критиките, се очекува предлог-законот да помине. Лабуристите најавија дека ќе го поддржат.