МЗ: Обезбедна е современа терапија за пациентите со малигни заболувања

За пациентите со малигни заболувања, инфламаторни и автоимуни болести, од минатата година, обезбедена е современа биолошка терапија, која придонесува за зголемување на успешноста во лекувањето и значително подобрување на квалитетот на живот.

За таа цел, Министерството за здравство, со централизирана набавка обезбеди 30 нови видови биолошки лекови за третман на рак на дојка, рак на бели дробови, метастазиран меланом, хематолошки болести, лимфоми, мултиплекс склероза, ревматоиден артритис, васкулитис и други заболувања, со кои се опфаќаат голем број пациенти.

Иновативната биолошка терапија е достапна за сите пациентите во нашата држава на кои им е неопходна. Овие лекови делуваат така што поттикнуваат малигното заболување да се трансформира во хронично, со кое пациентите ќе може да живеат како со секое друго хронично заболување. На тој начин терапијата го продолжува, но истовремено и го подобрува и квалитетот на животот.

Оваа биолошка или таканаречена иновативна терапија е дел од стандардните протоколи во европските земји, а се користи во раните фази на болеста, но и кога станува збор за понапредна фаза. Сега постојат многу прецизни дијагностички анализи, како геномското профилирање на туморите, со кои прецизно се одредува дали одреден пациентот ќе има полза од одредена таргетирана и биолошка терапија, за да може полесно да се насочи и модифицира третманот.

Министерството за здравство води вистинска грижа за здравјето на секоја жена. Оттсега, пациентките имаат можност за двојно читање на мамографските слики од двајца независни читачи-радиолози. Тие треба да имаат искуство од читање на мамографии од минимум 800 пациенти.

Во Клиничката болница во Битола се формираше Центар за дојка. Во оваа установа пациентките можат на едно место да направат мамографија, ехо преглед и магнетна резонанца.

Исто така, за првпат се обезбеди и психолошка поддршка на онколошките пациенти. Оваа поддршка е значајна и најважна за успешно лекување на болестите, соопшти Министерството за здравство

Гир за МИА: Нема план Б, целта е пристапување на Македонија во ЕУ

Нема план Б, целта е пристапување на Македонија во Европската Унија. 

Оптимист сум. Сега следува усогласување на Преговарачката рамка и одржување на првата меѓувладина конференција, што всушност ќе го отпочне самиот процес на преговори, изјави амбасадорот на Европската Унија во земјава Дејвид Гир во интервју за МИА.

– Овие разговори продолжуваат во Брисел и навистина португалското претседателство се обврза дека ќе го помогне и ќе го турка процесот. Во меѓувреме, она што е важно, е Македонија, заедно со Бугарија, билатерално да се ангажираат во обид да изнајдат решение што е прифатливо за двете страни, коешто ќе овозможи ситуацијата да оди напред, подвлече Гир.

На прашањето на МИА дека очигледно за ЕУ е хендикеп вклучувањето на билатералните спорови во процесот на проширување, а особено е опасно историјата да стане предуслов за членство, Гир вели дека во овој случај важен е фокусот на две работи – Македонија и Бугарија да го решат спорот на билатерална основа и земјава да ги забрза реформите.

– Нема да одам во детали за тоа што е дискутирано. Важно е да се фокусираме на она што е важно во овој случај. Две работи се неопходни – првата е Република Македонија и Бугарија да продолжат да се ангажираат да ги решат своите прашања на билатерална основа и второ – во меѓувреме Владата тука да го имплементира и да го забрза реформскиот процес. Зошто тоа е важно – прво, заради тоа што е од најголема важност за граѓаните, но второ реформите, и реформите поврзани со ЕУ се најбрзиот начин да се приближите и да се приклучите кон европското семејство, дециден е Гир.

Со евроамбасадорот разговаравме и за можното членство во Европската економска зона, за пристигнувањето на вакцините, КОВАКС механизмот, помошта на Европската Унија за санирање на последиците од Ковид кризата врз економијата…/МИА

Османи: Без разлика на предизвиците интеграцијата во ЕУ нема алтернативa

Покрај билатералните односи, на средбата во Подгорица, биле отворени и темите за соработката во рамки на НАТО сојузништвото.

Соработката во економијата, туризмот и трговијата како и таа која произлегува од интегративниот процес за Европската унија ги утврдува Македонија и Црна Гора на курсот на традиционално добрите пријателски односи во рамките на кои денешната посета на шефот на Македонската дипломатија Османи на официјална Подгорица е реафирмација на тој курс.

-Се согласивме дека Црна Гора и Македонија имаат одлична соработка која доликува на високиот степен на политичкиот дијалог . Нашите две држави и народи ја препознаваат важноста од соработката имајќи го во предвид историското наследство на Западниот Балкан. Тоа е наш заеднички успех и достигнување кое мораме уште еднаш да го потенцираме. Црна Гора како пријател сосед и како држава која ги поддржува сите аспирации на сите земји во регионот и која ги почна најрано преговорите со ЕУ е подготвена е да овозможи техничка и секаква друга поддршка на Македонија за остварување на целите од европската агенда. Исто така констатиравме дека инфраструктурното поврзување меѓу двете земји е од клучна важност за развој на нашите економски односи.- Ѓорѓе Радуловиќ -Министер за надворешни работи на Црна Гора

Министерот за надворешни работи Османи од своја страна нагласи дека е секогаш добро да се биде меѓу пријателите од регионот кој се соочува со низа предизвици на патот на европската перспектива.

Покрај билатералните односи, на средбата во Подгорица, биле отворени и темите за соработката во рамки на НАТО сојузништвото. Посетата на министерот Османи во Подгорица,вклучува средби со претседателот на државата Мило Ѓукановиќ, претседателот на црногорскиот Парламент Алекса Бечиќ, премиерот Здравко Кривокапиќ и потпретседателот на Владата Дритан Абазовиќ.

Средба на координаторот на пратеничката група на ВМРО-ДПМНЕ Мицевски со евроамбасадорот Гир

„На оваа средба разговаравме и стана збор за лошата економска состојба во Република Македонија“.

Денес, имавме средба со неговата екселенција, евроамбасадорот Дејвид Гир со кој што разговаравме за актуелните случувања и предизвици со кои што се соочува Собранието на Република Македонија, ние како пратеничка група во овој Парламентарен дом, но и државата во целост.

На оваа средба разговаравме и стана збор за лошата економска состојба во Република Македонија, задолжувањето на државата, КОВИД кризата и предизвиците од неа односно лошото справување на Владата со последиците од КОВИД кризата.

Исто така, разговаравме за пописот и други актуелни теми во самото Собрание, злоупотребата на европското знаменце, како и скратената постапка на законските решенија кои што стигнуваат во Собранието на Република Македонија.

На самата средба беше изразена желба да се помогне во одредени процеси со нивна поддршка за придвижување на дијалогот помеѓу политичките субјекти од власта и опозицијата и надминување на проблемите по одредени состојби кои што ги имаме. Дадовме свои видувања и укажавме дека досега дадовме целосна поддршка за многу важни законски решенија кои што влегоа во Собранието од делот на економијата, мерките кои што беа во интерес на граѓаните и на стопанството, како и поддршка за законите за решавање на проблемите со пандемијата, но од друга страна укажавме и дека нема да седиме со скрстени раце кога во Собранието на Република Македонија влегуваат сомнителни, неквалитетни и коруптивни законски решенија за кои што опозицијата има свои забелешки.

Сметам дека средбата помина во најдобар ред, ова е прва официјална средба со неговата екселенција, амбасадорот Дејвид Гир. Се надеваме на понатамошна заедничка и плодна соработка во сите сегменти.

Изјава на Никола Мицевски, координатор на пратеничката група на ВМРО-ДПМНЕ

притисни ентер