Муцунски: Билатералните односи со посебен акцент на економската соработка

Билатералните односи со посебен акцент на економската соработка во фокус на првите денови од посетата на САД.

Посетата на владината делегација предводена од премиерот Христијан Мицкоски на САД, покрај учеството на НАТО Самитот, има и билатерален карактер, вели во изјава за МТВ министерот за надворешни работи и надворешна трговија Тимчо Муцунски, соопшти МНР.

Муцунски посочува дека билатералните односи со посебен акцент на економската соработка биле фокусот на првите денови од посетата на САД.

- Од страна на премиерот Мицкоски најавена е нова инвестиција, што претставува еден од првите големи економски успех на новата Влада. „Ваптек“ ќе инвестира дополнителни 35 милиони евра, а ќе се отворат нови 100 работни места во земјава, истакна Муцунски, потенцирајќи дека одлуката е донесена за време на нивната посета на Вашингтон.

Тој информира и за бројни средби со влијателни конгресмени на кои станало збор за зајакнување на стратешкото партнерство со САД, како и за улогата на земјава на меѓународната сцена.

- На средбите беше потврдена улогата на земјава како афирмиран член на НАТО Алијансата, што континуирано придонесува за зајакнување на целокупната трансатлантска безбедност. Исто така, беше истакнато дека новата македонска Влада е поддржувач и ќе продолжи со политиката на 100% усогласеност со заедничката надворешна и безбедносна политика на ЕУ, што е значајно за стабилноста на земјава и регионот, подвлекува Муцунски.

Во однос на проширувањето на Министерството за надворешни работи со ресорот надворешна трговија, шефот на дипломатијата вели дека е потребен поинаков фокус во надворешната политика.

- Активностите за заштита и промоција на политичките интереси треба да биде продлабочена со еден концепт што е многу повеќе од економската дипломатија. Промовирање на извозот, но исто така и промовирање на државата како добра локација за нови директни инвестиции ќе биде голем предизвик, со кој можеме да се справиме за да ја направиме државата поубаво место за живеење, истакнува Муцунски

Министерот за надворешни работи и надворешна трговија додаде дека во следниот период во рамки на Министерството за надворешни работи, низ транспарентна и законска процедура, ќе бидат преземени сите неопходни чекори за утврдување на евентуални пропусти и грешки во работењето на дипломатско-конзуларните претставништва, примарно во оние каде постојат сериозни сомнежи за несоодветно постапување, надвор од законските и подзаконските акти, а со крајна цел транспарентно работење и заштита на угледот на државата.

Муцунски посочува дека следуваат уште низа средби и активности кои имаат за цел апострофирање на нашиот придонес кон зајакнување на НАТО Алијансата, како и продлабочување на билатералните односи и соработката со САД.

Муцунски е дел од владината делегација предводена од премиерот Христијан Мицкоски, која е во посета на САД, каде се одбележува 75 годишнината од основањето на НАТО Алијансата.

Реал и Менди се договорија за соработка до 2027 година

 Ферланд Менди и Реал Мадрид се согласија за нов договор. Дваесет и деветгодишниот дефанзивец ќе потпише нов договор со мадридскиот клуб до 2027 година со опција за продолжување на уште една година, пренесува „Marca“.

Една од главните точки на договорот е бројот на натпревари што ги игра фудбалер во секоја сезона. Од ова зависи и финансиската компонента на зделката.

Минатата сезона, Ферланд Менди забележа 23 настапи во Ла Лига и 37 настапи вклучувајќи ги сите натпреварувања.

Фудбалерот игра за Мадрид од 2019 година.

Тошковски: Кривична пријава против три лица за „предизвикување на општа опасност“

Одделот за внатрешна контрола, криминалистички истраги и професионални стандарди ќе поднесе Предлог за поведување на постапка за утврдување на дисциплинска одговорност против полицискиот службеник Ј.Б.

Одделот за внатрешна контрола, криминалистички истраги и професионални стандарди при МВР до надлежното Основно јавно обвинителство за гонење на организиран криминал и корупција - Специјализирано одделение за гонење на кривични дела сторени од лица со полициски овластувања и припадници на затворска полиција поднесе кривична пријава против А.Д., полициски службеник во Полициско одделение Теарце, Д.Д., полициски службеник во Полициско одделение Теарце и Ј.Б., полициски службеник во Полициската станица за граничен премин Јажинце при Регионалниот центар за гранични работи Север, поради постоење основи на сомнение дека сториле кривично дело „предизвикување на општа опасност“ по член 288 став 1 од Кривичниот законик.

Имено, првопријавениот А.Д. на 23.05.2022 и второпријавениот Д.Д. на 24.05.2022 во текот на работното време додека биле ангажирани во шумски предел кај место викано „Ѓинов Камен“, без да бидат исполнети законските услови за употреба на огнено оружје, пукале со службена автоматска пушка, која ја задолжиле пред излегувањето на смена, во присуство на други полициски службеници кои заедно со нив биле работно ангажирани. Исто така, првопријавениот А.Д. на 29.02.2024 и третопријавениот Ј.Б. на 08.03.2024, во време кога не биле работно ангажирани, во шумски предел во близина на место викано „Ѓинов Камен“, во присуство на неколку лица, рафално пукале со автоматска пушка.

Одделот за внатрешна контрола, криминалистички истраги и професионални стандарди ќе поднесе Предлог за поведување на постапка за утврдување на дисциплинска одговорност против полицискиот службеник Ј.Б. и ќе изрече задолжителни мерки за отстранување од работното место до завршување на дисциплинската постапка. За полициските службеници А.Д. и Д.Д., поради изминување на роковите за водење на дисциплинска постапка, нема да биде поднесен предлог за поведување на постапка за кршење на работниот ред и дисциплина, објави министерот за внатрешни работи Панче Тошковски.

Димитриеска Кочоска: Со ребалансот обезбедуваме средства за се она што било предвидено со закон

Со ребалансот обезбедуваме средства за се она што било предвидено со закон, а немало планирани средства.

Собраниската комисија за финансирање и буџет денеска ја започна расправата за Предлогот за изменување и дополнување на Буџетот за 2024 година. Во експозето министерката за финансии Гордана Димитриеска Кочоска посочи дека со ребалансот се предлага најоптимално решение, имајќи ги во предвид состојбите кои се затекнати, ресурсите со кои се располага, малиот простор за маневар и макроекономската состојба.

Со ребалансот вкупните приходи се планирани на ниво од 318,2 милијарди денари и бележат зголемување за 8 милијарди и 22 милиони денари, а расходите на ниво од 362,8 милијарди денари, односно на расходна страна има зголемување од 19,2 милијарди денари. Растот на БДП е проектиран на 2,1 процент и е ревидиран во однос на првично планираниот 3,4 проценти, а инфлацијата е проектирана на ниво од 3,5 проценти и во втората половина од годината се очекува забавување на растот на инфлацијата, односно стабилизирање на цените на храната и енергенсите. Буџетскиот дефицит е планиран на 44,7 милијарди денари или 4,9 проценти и ќе се финансира од домашно и странско задолжување. Капиталните расходи се планирани во висина од 45 милијарди денари. Бруто инвестициите се очекува да забележат раст од 10 проценти, јавната потрошувачка раст од 3,3 проценти, а извозот раст од 2,5 проценти, додека увозот раст од 5,4 проценти.

-Со ребалансот обезбедуваме средства за сите оние и за се она што било предвидено со закон, а немало планирани средства, односно средства за вработените, пензионерите, студентите, компаниите, како и за плаќање на обврските по основ на камати, заеми и слично. Се обидовме и направивме максимални заштеди од се она што немаше динамика на реализација и средствата кои што стоеја неискористени од се она што претставува несуштински расход и успеавме да најдеме заштеди од 20 милијарди денари и да ги употребиме онаму каде што беа потребни, рече Димитриеска Кочоска.

Нагласи дека економската активност во првиот квартал од 2024 година забележа реален раст од 1,2 проценти што се должи исклучиво на позитивните остварувања во услужниот сектор. Во првите пет месеци од 2024 година, како што кажа, трговскиот дефицит е зголемен за 34,1 процент во споредба со истиот период од 2023 година. Во првиот квартал од 2024 година тековната сметка на платниот биланс има дефицит од 105 милиони евра наспроти суфицитот од 92,2 милиони евра во истиот квартал од 2023 година. Инфлацијата забележува забавување на растот во првата половина од годинава и стабилизирање на ниво од 3,7 проценти, а базичната инфлација изнесува 4,9 проценти.

-Во првите шест месеци од 2024 година вкупните реализирани расходи на Буџетот се на ниво од 168,2 милијарди денари и се за 8,6 проценти повисоки во однос на вкупните расходи реализирани во истиот период од 2023 година. За тековни расходи потрошени се 155,3 милијарди денари или 16,8 проценти повеќе во споредба со истиот период лани. Платите и надоместоците се реализирани во износ од 21 милијарда денари и се повисоки за 22,7 проценти во споредба со првите шест месеци од 2023 година. За стоки и услуги се реализирани 10,3 милијарди денари или за 7,7 отсто повеќе отколку во 2023 година, трансферите до единиците на локалната самоуправа изнесуваат 14,7 милијарди денари по основ на дотации од ДДВ и блок трансакции што е зголемување за 11 проценти. Исплатени се и 11,2 милијарди денари за каматни плаќања по основ на користени кредити и издадени државни хартии од вредност што е за 67,8 проценти повеќе од реализираните каматни плаќања во 2023 година. Субвенциите и трансферите се реализирани во вкупен износ од 14,4 милијарди денари и се повисоки за 3,8 проценти отколку лани. За социјалните трансфери се исплатени 82,6 милијарди денари и нивната реализација е повисока за 16 проценти, појасни Димитриеска Кочоска.

Потенцира дека капиталните расходи во Буџетот во првите шест месеци од годинава биле реализирани во износ од 12,9 милијарди денари или само 28,62 проценти од планираните и се за 41 процент пониски отколку во првите шест месеци од 2023 година.

-Во првите шест месеци од годинава Буџетот оствари дефицит од 23,9 милијарди денари или 2,44 проценти од проектираниот БДП што претставува 71,38 проценти од планираниот дефицит за 2024 година, посочи Димитриеска Кочоска.

Со ребалансот, како што потенцира, фискалната политика се насочува кон враќање на макроекономската стабилност и поддршката на економската активност преку постепена фискална консолидација, подобрување на управувањето на јавните финансии и одржливо на ниво на капитални расходи.

-Измените и дополнувањата на Буџетот ги базиравме на реални макроекономски претпоставки и фискални проекции, обезбедувајќи ги на расходната страна потребните средства за сервисирање на обврските на државата, планирање на средства за кои имала обврска, а не биле предвидени, како и доспеани обврски кон граѓаните и бизнисот, порача Димитриеска Кочоска.

На расходната страна, прецизира, извршено е намалување кај несуштинските трошења и кај проектите со позабавена динамика на реализација.

-Едновремено се обезбедија средства за доспеаните законски обврски, како и за новите политики на Владата за линеарен пораст на пензиите и локални инфраструктурни проекти. Вкупните приходи се планирани на ниво од 318,2 милијарди денари, или зголемување за 2,6 проценти, односно за околу 8 милијарди денари повеќе во однос на иницијалните проекции со планот за 2024 година. Вкупните расходи се планирани на 362,8 милијарди денари или повисоко за 5,6 проценти, односно за околу 19,2 милијарди денари повеќе во однос на иницијалните проекции со планот за 2024 година. Врз основа на ревидираните проекции на приходи и расходи, дефицитот е планиран на ниво од 44,7 милијарди денари, односно од иницијално планираните 3,4 на 4,9 проценти од БДП, рече Димитриеска Кочоска.

Појасни дека растот на дефицитот и едновремено отстапувањето од фискалното правило се должи пред се на потребата за обезбедување на неопходни средства за непречено функционирање на институциите и сервисирање на обврските. Со него, додаде, се обезбедуваат дополнителни 4,1 милијарда денари за исплата на плати, 5,1 милијарда денари за исплата на пензиите, од кои 2,5 милијарди денари се за најавеното линеарно зголемување од 2.500 денари. За транзициски трошоци во вториот пензиски столб обезбедени се дополнителни средства во износ од 400 милиони денари, 0,8 милијарди денари за исплата на гарантирана минимална помош, 1,7 милијарди денари за здравствена заштита, една милијарда денари дополнителни средства за ТИРЗ зоните, 1,7 милијарди денари за земјоделски субвенции, 437 милиони денари за студентски оброк, 207 милиони денари за исплата на стипендии, 300 милиони денари за блок дотации, дополнителни средства за финансирање на радиодифузна дејност, за финансирање на изборните активности, како и за извршни исплати и за поврат на средства кон Европската комисија согласно наодите на ОЛАФ. Со Ребалансот се обезбедуваат 0,8 милијарда денари дополнителни средства за исплата на камати кон домашни и меѓународните кредитори, 5,1 милијарда денари за активирани гаранции по основ на задолжувања за ЈП и АД во државна сопственост и 6 милијарди денари за проекти за општините.

Развојот во Ребалансот, како што потенцира, ќе се финансира со планирани 45 милијарди денари за капитални расходи, при што е извршено ревидирање на капиталите проекти со позабавена динамика, особено кај капиталните проекти кои се реализираат на посебни сметки.

Општиот претрес во Комисијата за финансирање и буџет за ребалансот на Буџетот трае најмногу три дена, а амандманската расправа шест дена. На десеттиот ден Комисијата гласа за ребалансот во целост. На предлог ребалансот се поднесени 58 амандмани.

притисни ентер