Во краткото соопштение, невообичаено издадено навечер, се вели дека папата Франциско ја прифатил оставката на кардиналот Џовани Ангел Бечиу, шеф на одделот што одлучува за канонизација.
Но, позначајниот дел од изјавата е оној во кој се наведува дека 72-годишниот Бечиу се одрекол од „правата поврзани со функцијата на кардинал“.
Најважното право на кардиналот на возраст под 80 години е да учествува во конклавата што избира нов Папа. Таквото одрекување значи дека причината за оставката на Бечиу е веројатно сериозна.
Последен што го сторил тоа бил шкотскиот кардинал Кит О’Брајан, во 2013 година поради сексуален скандал.
До 2018 година, Бечиу бил заменик државен секретар, една од најмоќните позиции во Ватикан.
За време на неговиот мандат, тој бил дел од контроверзен договор според кој Секретаријатот на Ватикан користел црковни пари за да купи луксузна зграда во Лондон.
Истрагата за случајот минатата година доведе до суспендирање на пет претставници на Ватикан, оставка на началникот на полицијата во Ватикан и заминување на поранешниот шеф на Канцеларијата за финансии на Ватикан.
Бечиу тогаш ја негираше својата вина и го бранеше купувањето во Лондон, тврдејќи дека имотот добил на вредност.
Ватиканската полиција во јуни го уапси Џиналуиџи Торси, италијанскиот посредник во набавката, обвинувајќи го за изнуда, проневера, измама и перење пари.
Подоцна бил ослободен, но истрагата сè уште трае. Извори од Ватикан тврдат дека пресудите ќе бидат изречени наскоро.