Забава

Матурантите ќе играат салса и англиски валцер

Повеќе од 1.200 матуранти по седми пат денеска на градскиот плоштад „Македонија“ ќе танцуваат во рамки на „Матурската парада 2013“.

Новината, според МИА, е што годинава матурантите ќе играат салса и англиски валцер. Покрај скопските матуранти од 19 училишта, ќе танцуваат и матурантите од Куманово, Струмица, Гевгелија, Охрид и Струга.

Организатори на манифестацијaта се Дирекцијата за култура и уметност-Скопје и Танцовиот клуб „Ритам плус“ од Скопје. Покровители се Град Скопје и Агенцијата за млади и спорт, а поддржувач е Делегацијата на ЕУ во Македонија. Медиумски покровител и партнер е Македонското радио-Радио Скопје, кое ќе го преземе радио сигналот од Словенија. Медиумски партнер е и Радио МОФ, кое ќе врши интернет видео пренос од „Матурската парада“.

Предвидено е „Матурската парада“ да ја отворат скопскиот градоначалник Коце Трајановски, евроамбасадорот Аиво Орав и претставник од Агенцијата за млади и спорт.

Собирањето и подготовките со матурантите денеска ќе почне во 09 часот. Официјалниот дел на програмата е во 11:30 часот на плоштадот „Македонија“ во Скопје. Пред 11 часот матурантите ќе имаат дефиле низ центарот на Скопје. Од градскиот плоштад ќе се движат по кејот „13 Ноември“, пред хотелот „Холидеј Ин“, паркот Жена-борец и ќе поминат низ портата „Македонија“. Потоа ќе пристигнат на градскиот плоштад, каде ќе се одвива официјалниот дел од програмата.

Освен дружењето и танцувањето на младите, оваа манифестација има и натпреварувачки тек, да се постави Гинисов рекорд во категоријата истовремено синхронизирано одигрување на еден ист танц на различни места или во различни градови. Последните три години составен дел на оваа манигестација е и изјавата на матурантите за ненасилство.

Организаторите имаат идеја со матурантите на градскиот плоштад да излезат и матурантите од 1963 година, кои одбележуваат 50 години од својата матура.

Годинава, девојките ќе носат жолти маички, а момчињата темно сини со натписот „Матурска парада 2013“.

Свет

Северна Кореја тестирала тестирала „супер голема“ боева глава и противвоздушна ракета

Северна Кореја денеска соопшти дека тестирала „супер голема“ боева глава за крстосувачка ракета и нов противвоздушен проектил, пренесува ДПА.

Тестот на „супер-големата“ боева глава дизајнирана за стратешката крстосувачка ракета Хвасал-1 Ра-3 и пробното лансирање на противвоздушната ракета Пјољџи-1-2 се извршени во петокот, објавија државните медиуми.

- Преку пробното лансирање беше постигната зацртаната цел, објави агенцијата КЦНА.

Се наведува дека тестовите биле дел од редовните воени активности на Северна Кореја и дека немаат „никаква врска со ситуацијата во регионот“.

Резолуциите на ОН и забрануваат на Северна Кореја да тестира балистички ракети од кој било дострел, од кои некои се способни да носат нуклеарни боеви глави.

Како одговор на севернокорејската програма за нуклеарно оружје, Соединетите Држави и Јужна Кореја ја зајакнаа воената соработка, вклучително и одржување заеднички маневри. /МИА

Фудбал

Ајакс сака да го покани Чави за главен тренер

Раководството на Ајакс го смета тренерот на Барселона Чави како главен кандидат за тренерското место на тимот од Амстердам, објави „Sport.es“.

Холандскиот фудбалски гигант смета дека 44-годишниот шпански стручњак е способен да го врати клубот на претходното ниво и е подготвен да потпише договор со него до 2026 година.

Во јануари Чави најави дека ќе ја напушти Барселона на крајот на сезоната.

По јавно објавената одлука на Чави за заминување од Барса, тимот загуби само еден натпревар - во четвртфиналето на Лигата на шампионите против ПСЖ (1:4).

Чави за шеф на стручниот штаб на каталонскиот тим беше назначен во ноември 2021 година. /МИА

Култура

Награда во Калифорнија за најдобар долгометражен филм за „Бизнисот на задоволството“

„Бизнисот на задоволството“ на Гоце Цветановски ја доби наградата за најдобар долгометражен филм на „Риверсајд Филм фестивал“ во Калифорнија, САД.

Фестивалот што се одржа од 10 до 14 април, во своето 22-годишно постоење се залага за промоција на храбри филмови кои обработуваат општествени предизвици, но и говорат за смелоста на човековиот дух.

Цветановски го радува тоа што филмот по вторпат e наградeн во САД, откако минатиот месец беше прогласен за највпечатлив филм на 30. издание на „Седона интернешнал филм фестивал“ во Аризона.

- Калифорнија е центар на американската филмска индустрија, и секако дека како автор сум горд што добивме награда овде, и тоа во конкуренција со американски филмови со многу поголеми буџети. Едвај чекам да завршиме со оваа светска фестивалска турнеја и во септември да го презентираме пред нашата публика. Очекувам филмот да отвори теми за дискусија на повеќе нивоа, но пред се‘ сакам да го продолжиме трендот од последниве години, во кој на домашните гледачи им се враќа довербата и желбата да гледаат македонски филмови, вели Цветановски.

„Бизнисот на задоволството“ досега доби осум награди на филмските фестивали низ светот, од кои пет се за најдобар долгометражен филм.

Филмот ја следи приказната на новинарка, која опседната со исчезнувањето на нејзината најдобра пријателка, подготвува тајна операција со цел да разоткрие мрежа за трговија со жени. Но, како што нејзините соучесници се приближуваат до шефот, ситуацијата излегува од контрола.

Улогите ги толкуваат Муса Исуфи, Слаѓана Вујошевиќ, Исмаил Касуми, Дамјан Цветановски, Осман Ахмети, Елени Декидис, Мендим Муртези, Егзона Салиху, Авни Далипи и Катерина Коцевска, а Цветановски го потпишува и сценариото. Продуценти на филмот се Дритон Рамадани, Богдан Јончевски и Гоце Цветановски.

Филмот е снимен со поддршка на Агенцијата за филм. /МИА