Грчките плажи блиску, но истовремено мошне далечни за македонските граѓани. Базирано на пресметка со сегашните познати податоци, доколку заразата се шири со истиот фактор на преносливост, нереална е надежта во наредните две недели да имаме по околу 25 заразени дневно, односно четири пати помалку за разлика од сега, за да се бидеме оценети како „безбедни туристи“ од ЕУ.
Со моменталното ширење на заразата Македонија е далеку од исполнување на „основниот услов“ за да можат нејзините граѓани да патуваат во земји членки на ЕУ, меѓу кои е и Грција, што вообичаено е најчеста летна дестинација на Македонците.
Статистиката на новозаразени од коронавирусот за две недели на 100.000 жители треба да е близу или под просекот на ЕУ, а тоа е 16 заразени, а во моментов ние, во статистиката за 14 дена имаме околу 90 заболени на истиот број жители, што е околу шест пати повеќе.
На граѓаните што имаат намера да одат на плажа, засега како опција се плажите на море во Албанија, или во земјава, покрај езеро. Епидемиолозите велат дека граѓаните не треба да одат на плажа во време на пандемија, меѓутоа, ако сепак решат тоа да го сторат, треба да ги почитуваат мерките за заштита од ширење на вирусот.
Комисијата за заразни болести нема подготвено протоколи за плажите, иако дел од граѓаните веќе ги посетуваат. Оттаму за Канал 5 најавија дека протокол ќе се подготви, а членовите, за истиот ќе дискутираат наредната недела.
И покрај тоа што нема насоки од Комисјата, сепак, превентивните мерки остануваат. Да се држи рстојаниот од 2 метра, да се носи маска кога тоа не е возможно, и често да се мијат рацете.