Младите од плажата Градиште како да живеат во Виртуелен свет, па исто како и текстот на песната која ја пејат си поигруваат со ѓаволот.
Во време кога од коронавирусот во Македонија дневно умираат во просек по 10 луѓе - во овој летен камп во Охрид стотина млади лудо се забавуваат качени на маси без никаква дистанца и заштита. Видеата кои се појавија на социјалните мрежи предизвикаа револт кај граѓаните, кои стравуваат дека со ваквата неодговорност Охрид, но и цела Македонија, затоа што младите кои се на видеата најмалку се од Скопје, многу лесно може да стане новиот Вухан, а со тоа шансите за огромен број нови случаи и голем број починати лица се зголемува.
На угостителите на втората и третата плажа во Градиште од Државниот пазарен инспекторат веќе им подготвуваат кривични пријава за непостапување според здравствените прописи за време на епидемија. Прашање е зошто само за угостителите? Зошто се апстрахираат и крајно неодговорните гости?
Засега нема податок колку од посетителите добиле прекршочна пријава за непочитување на мерките. Од СВР Охрид велат дека полицијата извршила контрола на забавата, каде освен нарушување на протоколите пронашле и дрога.
“ Приведени се и околу десетина лица од Скопје но и од други градови поради пронајдена опојна дрога марихуана, истите се затекнати на плажата Градиште, но и на други плажи на охридксото крајбржје. “
По ова се поставува прашањето како локалните власти на чело со Градоначалникот на Охрид, дозволија вакво однесување и дали и кој ќе ја понесе одговорноста за одржувањето на овие забави, но и непочитувањата на мерките низ целиот град. Ние побаравме одговор и од охридскиот градоначалник Костантин Ѓеоргиески, кој не сакаше да даде изјава, но во телефонскиот разговор рече дека тие вршат инспекциски надзор заедно со институциите и апелираат да се почитуваат мерките.
“ Маса народ кога ќе имаш не можеш да ja контролираш. Разочаран сум од однесувањето на гостите, треба да се повеќе свесни за да го заштитат своето, но и туѓото здравје”, рече Ѓеоргиески во разговорот.
Но дали градоначалникот не е разочаран и од своите домаќини кои речиси во ниту еден објект кој не е угостителски не носат маски? Зошто Охрид како бисер на туризмот е крајно здравствено неподготвен за оваа туристичка сезона, за која се знаеше дека ќе биде прв избор за туристите, поради светската пандемија? Многу наскоро, доколку нагло рипне бројката на заразени, локалната но и дел од централната власт ќе треба да одговорат на сериозни прашања.