Двајцата пратеници од партијата поднеле предлог за измена на Законот за плата, но не очекуваат поддршка од останатите политички партии. Додека тие што активно работат земаат далеку пониски плати од избраните и именуваните лица, нејасно е зошто со години од буџетот се трошат пари за оние чиј мандат веќе завршил, вели пратениот Крмов.
-Да ги земеме последните два примери- Царовска и Шеќеринска, кои се милионерки по дефиниција, имаат пријавено имот поголем од милион евра, и во ситуација на здравствена, економска и енергетска криза, да барате апанажа е на ниво на перверзија, вели Борислав Крмов – пратеник од Левица.
Апанажата е во висина од платата која функционерите ја добивале за време на мандатот. Според законот за плати, зависно од тоа колку време биле на позиција, така им се одредува времетрањето на паричниот надомест. Радмила Шекеринска, Мила Царовска и Никола Димитров 12 месеци ќе добиваат пари на сметка, а во наредните девет месеци, од поранешниот владин состав ќе земаат плата и Арјанит Хоџа и Седат Сулејмани.
Дел од функционерите од претходната Влада се откажаа од оваа привилегија, а меѓу нив е и поранешниот премиер Зоран Заев. Тој за Канал 5 потврди дека веќе се вработил во семејните фирми, а од неколкуте законски права за екс премиери- побарал четири лица за обезбедување и автомобил Шкода, но не лично за него, туку за превоз на телохранителите.