Лавров: Подготвени сме со САД да разговараме за размена на затвореници

Русија соопшти дека е подготвена да преговара за размена на затвореници со Вашингтон преку постоечките дипломатски канали, еден ден откако кошаркарската ѕвезда Бритни Грајнер беше осудена на девет години затвор за поседување дрога.

„Подготвени сме да преговараме на таа тема, но во рамките на каналот што го договорија претседателите Путин и Бајден“, изјави министерот за надворешни работи Сергеј Лавров.

„Ако Американците решат уште еднаш да прибегнат кон јавна дипломатија, тоа е нивна работа и, дури би рекол, нивен проблем“, додаде тој.

Кремљ претходно ги предупреди САД дека се против прибегнувањето кон „мегафон дипломатија“ во случајот Грајнер, тврдејќи дека тоа може само да ги попречи напорите за обезбедување потенцијална размена.

Казната на Грајнер - која Џо Бајден ја нарече „неприфатлива“ - би можела да го отвори патот за размена на американско-руски затвореници во која ќе бидат вклучени 31-годишната кошаркарка и руски трговец со оружје.

Соединетите Држави веќе дадоа, како што рече државниот секретар Антони Блинкен, „значајна понуда“ за да се обезбеди ослободување на Американците притворени во Русија, вклучително и Грајнер и поранешниот маринец Пол Вилан.

Грајнер, двократна освојувачка на златен олимписки медал и ѕвезда на ВНБА, беше уапсена на 17 февруари на московскиот аеродром Шереметјево, откако во нејзиниот багаж биле пронајдени патрони со електронски цигари со масло од канабис.

Грајнер, на која во САД ѝ бил препишан медицински канабис за ублажување на болката од хроничните повреди, рече дека направила грешка што ненамерно ги спакувала во багажот затоа што брзала да го фати летот. Таа се изјасни за виновна, но инсистира на тоа дека немала намера да го прекрши рускиот закон.

Канабисот е нелегален во Русија и за медицински и за рекреативни цели.

Халанд беше опоменат поради пцуење, новинарот го цензурира (ВИДЕО)

Ерлинг Халанд ги постигна двата гола на Манчестер Сити во победата над Вест Хем (2:0) на отворањето на англискиот шампионат и со тоа на најдобар начин се претстави во новата лига, во која пристигна како голема ѕвезда од Борусија Дортмунд.

Зборувајќи со новинарот на Скај, Џеф Шривс, по натпреварот, тој двапати опцу.

„Добар почеток, нема што друго да се каже. Беше добро да се настрапи , да се добие минутажа во раната фаза, но ќе биде добро“, рече Халанд.

Тренерот Пеп Гвардиола го извади од игра во 78. минута. Тој беше запрашан дали се кае што не постигна хет-трик. Поради неговиот одговор, Скај мораше да ја цензурира изјавата. „Видовте што направи Илкај Гундоган откако излегов, требаше да бидам таму. Сра*е, но тоа е“, рече тој, што го поттикна Шривс да го замоли да внимава на речникот.

„Сра*е, извини. Не зборувам добро во оваа земја“, рече потоа Халанд и му се насмеа на репортерот. Првиот гол, норвешкиот напаѓач го постигна во 36. минута од пенал, кој сам го доби, додека вториот падна во 65. кога Кевин де Бруин му даде топка, а тој го намести на левата нога и погоди.

САД испраќаат досега најголем пакет оружје за Украина

Соединетите Американски Држави денеска ветија дека ќе ѝ испратат на Украина нов пакет оружје и воена опрема во вредност од милијарда долари.

Новиот пакет оружје ќе вклучува ракети за моќни повеќецевни ракетни фрлачи HIMARS, илјадници артилериски гранати, минофрлачи, рачни противтенковски ракети Javelin и друга муниција и опрема.

Така, вредноста на оружјето и опремата што Америка ги испратила или ќе ги испрати во Украина од почетокот на руската инвазија достигна 9,1 милијарди долари.

„Поминаа речиси шест месеци од почетокот на неиспровоцираниот и брутален напад врз Украина. Русите продолжуваат да ги уништуваат украинските градови и села. Претседателот Бајден јасно изјави дека САД ќе продолжат да го поддржуваат украинскиот народ во одбрана од руската агресија, без разлика колку долго е потребно “, изјави денеска американскиот шеф на дипломатијата Антони Блинкен.

„Како дел од тие напори, денеска, со одобрение на претседателот Бајден, го одобрив досега најголемиот пакет американско оружје и воена опрема за Украина“, рече Блинкен.

Локализиран пожарот кај Дојран и Богданци

Пожарот кај селото Фурка и браната Паљурци, помеѓу општините Дојран и Богданци е локализиран со здружени и координирани сили, со дејство и од земја и од воздух. 

Огнот е опкружен и догорува само во контролирани површини, соопшти вечерва Центарот за управување со кризи.

Со локализирање на пожарот се прегрупираат силите за негово догасување. Дел од луѓето на терен ќе дежураат до рано наутро кога е предвидено вработени од Јавно претпријатие Национални шуми (ЈПНШ) Подружница Кожув Гевгелија да ја проценат ситацијата на локализираниот пожар, по што ќе се одлучи како ќе се дејствува за негово догасување, велат од ЦУК.

За гасење на пожарот во текот на денот беа ангажирани еден полициски хеликоптер, еден армиски хеликоптер и авионот „ер трактор“ од Дирекцијата за заштита и спасување заедно со пожарникари и вработени во шумските стопанства и комунални претпријатија од Гевгелија, Дојран, Кавадарци, Валандово и Струмица, а помогна и дел од локалното население.

притисни ентер