Македонија

Ковачевски: Оваа криза заеднички ќе ја пребродиме

Ова не е време за политички поени, пратениците да ги усвојат законите за енергетиката и продолжувањето на кризната состојба, рече на вонредната прес конференција премиерот Димитар Ковачевски.

Економскиот енергетски совет што туку заврши и донесовме одлуки кои сакам да ги споделам со јавноста, а се однесуваат на сигурно, стабилно снабдување со енергенси во наредниот период.

За граѓаните на град Скопје.

1. На 15 октомври започнува грејната сезона. Парно за скопјани ќе има. Донесена е одлука за почнување на постапката за издавање на лиценца за производство на топлинска енергија од регулиран пазар согласно член 6 од законот за енергетика на ЕСМ. Ги повикувам Град Скопје, Регулаторна комисија за енергетика и Комисијата за заштита на конкурентност во најбрзо време да дадат позитивно мислење, со што ќе се створат условите за целосно функционирање на ЕСМ со топланите.

2. Обезбедени се финансиски средства за потребните енергенси за топлинска енергија.

Во однос на електрична енергија. Домаќинствата и малите потрошувачи ќе добијат сигурна, стабилна и континуирана испорака на електрична енергија. 80 % ја субвенционираме сметката за електрична енергија за 650 илјади домаќинства, а над 70 илјади компании и други правни субјекти (до 2 милиони евра годишен промет) ќе добијат субвенционира електрична енергија која е три пати пониска од берзанската.

Дополнително донесовме одлука, на регулиран пазар да бидат и основните и средни училишта на територијата на цела држава, без разлика што обврската за обезбедување на образовниот процес е на самите општини.

Исто така донесовме одлука со која сите јавни здравствени установи ќе бидат обезбедени со електрична енергија преку ЕСМ продажба по поволна цена од берзанската. Затоа што грижата за граѓаните и обезбедување на здравствена заштита е императив на оваа влада.

Владата се грижи за сите подеднакво.

Оваа криза рековме дека заеднички ќе ја пребродиме како што ја пребродивме и Ковид кризата.

Ја користам оваа прилика, покрај овие одлуки кои вечерва ги донесовме за справување со енергетската криза, да апелирам до сите граѓани да продолжиме со мерките за штедење. Секој киловат час заштеден значи заштеда на нашиот буџет и повеќе пари за инвестиција во нови енергетски и инфраструктурни проекти кои ќе го ,го подобрат во иднина снабдувањето со електрична енергија и ќе го подобрат квалитетот на животот.

Заврши времето на изобилие со електрична енергија во Европа. Сега е време на штедење и тоа штедиме за да имаме електрична енергија.

Утре како што знаете почитувани имаме седница за пратенички прашања.

Сакам да им укажам на Собранието и на пратениците од сите политичките партии да се одважиме заедно и конечно да се обединиме за интересот на граѓаните, и пред започнувањето на седницата да ги изгласаат Законот со кој се обезбедуваат финансиски средства од ЕБРД, пари одобрени од ЕБРД за справување со енергетска криза на РСМ по исклучителна каматна стапка, измените во Законот за енергетика и Законот за нафта и нафтени деривати и усвојување на кризна состојба.

Ова не време за политички поени, туку е време за разум, солидарност и социјална грижа.

Ова е само прв сет на одлуки на економско енергетскиот совет.

Како што ветивме, се грижиме за ранливи категории на граѓани кои ќе бидат подржани преку соодветен сет на дополнителни мерки кои што наскоро ќе бидат објавени.

На вонредната прес-конференција во Владата вечерва, покрај Ковачевски, присутни се вицепремиерот Фатмир Битиќи, министрите за финансии и за економија, Фатмир Бесими и Крешник Бектеши, министерката за труд и социјална политика Јованка Тренчевска, како и директорот на ЕСМ, Васко Ковачевски.

На новинарски прашања Ковачевски рече дека се преговара со Србија за набавка на гас за работа на нашата гасна централа, а тимовите се во тек на преговори. Тој рече дека не се работи за купопродажба на гас и дека Србија ќе треба финално да каже што може да реализира од претпоставената конструкција што се прави во однос на размена на гас за електрична енергија.

– Ние ги имаме донесено сите одлуки и одобрено меморандум за соработка. Не се работи за купопродажба на гас туку за размена на гас за електрична енергија зашто ние имаме когенеративна централа која работи на гас. Србија има резерви односно складишта на гас кои може да бидат искористени за производство на електрична енергија во нашата централа. Врз основа на договор, кој се преговара и не е се уште финален, зашто од Србија треба да се проверат сите претпоставки за негово успешно реализирање, ќе биде доколку за тоа постојат 100 проценти шанси да биде реализирано. Нашите тимови и во моментов преговараат, ќе продолжат и утре и штом ќе имаме резултат, ќе им биде соопштено на граѓаните, рече Ковачевски.

Во однос на денешната презентација на Мицкоски со понуда на контакти за набавка на енергенси и производство на двојно поевтина струја за стопанството, премиерот одговори дека опозицискиот лидер внимателно ги следел сите негови прес-конференции и на владиниот економски тим на оваа тема и дека денеска направил, како што рече, добар сублимат од тоа што тие го имаат кажувано.

Регион

Рама по средбата со Руте: НАТО ќе се ангажира во изградбата на воен терминал во Драч

Албанскиот премиер Еди Рама учествува на Самитот на НАТО, кој за првпат се одржува во Холандија, Хаг, со учество на шефовите на држави и влади на земјите-членки на Алијансата.

Во рамките на овој самит, Рама и албанската делегација, во која се и министерот за Европа и надворешни работи, Игли Хасани, министерот за одбрана Пиро Венгу, началникот на Генералштабот на вооружените сили Арбен Кинѓи, остварија средба со генералниот секретар на НАТО, Марк Руте.

Рама, преку објава на Фејсбук информираше дека тема на разговорите, меѓу другото, била и големата инвестиција во новото пристаниште Драч, каде што НАТО ќе биде ангажиран за изградбата на воениот терминал.

Исто така, објави дека на состанокот се разговарало и за подготовките за Самитот во Тирана во 2027 година.

„Беше задоволство да се сретнам со генералниот секретар на НАТО и мојот драг пријател, Марк Руте, со кого разговаравме за обврските на Самитот, Западниот Балкан, големата инвестиција во новото пристаниште Драч, каде што НАТО ќе биде ангажиран во изградбата на воениот терминал, како и за подготовките за Самитот во Тирана во 2027 година“, напиша Рама.

Како што и претходно беше најавено на самитот во Хаг треба да се потврди Албанија како домаќин на Самитот на НАТО во 2027 година.

Тагови: Еди Рама Марк Руте

Автомобилизам

Една држава воведе старосна граница за возачка дозвола- по 80 години нема да се продолжува

Министерството за транспорт и врски во Перу донесе одлука што предизвика жестока дебата низ целата земја.

Возачите кои ќе наполнат 80 години нема да можат да ги обноват своите возачки дозволи, со што Перу ќе стане првата земја во светот што воведува такво ограничување, објави Ауто Клуб.

Мерката, донесена со Врховниот декрет бр. 007-2016-MTC, е родена од потребата за подобрување на безбедноста на патиштата со фокусирање на физичкото и менталното здравје на постарите возачи.

Перуанските власти велат дека овој пристап е неопходен поради демографските промени.

Постепени промени за возачите на возраст од 70 до 80 години

Воведен е построг систем за контрола за возачите на возраст меѓу 70 и 80 години. Тие мора да поминат темелни медицински прегледи кои вклучуваат тестови за вид, слух, крвен притисок и когнитивни способности. Покрај тоа, нивните возачки дозволи имаат пократок рок на важење од помладите возачи.

Дефинирани се посебни услови за професионални и непрофесионални возачи. Медицинските и психолошките прегледи се задолжителни за сите возачи над 70 години, без оглед на видот на дозволата што ја поседуваат.

Иако перуанските власти ја претставуваат оваа мерка како неопходен чекор за прилагодување кон предизвиците на остареното население, многу експерти и граѓани го оспоруваат овој пристап. Критичарите истакнуваат дека ваквите правила би можеле да ја ограничат мобилноста на постарите лица и да влијаат на нивната независност.

Интересно е што слични идеи беа разгледани во Европската Унија, но беа отфрлени бидејќи таквите ограничувања би претставувале длабоко нарушување на правата на граѓаните. ЕУ заклучи дека само возраста не е доволно сигурен показател за способноста за возење.

Тагови: возачка дозвола

Свет

Над 40 деца и здравствени работници настрадаа во напад на болница во Судан

Во напад врз болница во Судан загинаа повеќе од 40 лица, вклучувајќи шест деца и пет здравствени работници.

Болницата „Ал-Муџлад“, која се наоѓа во државата Западен Кордофан, беше единствената функционална здравствена установа во областа и обезбедуваше нега на цивили, објави „Гардијан“.

Нападот се случил во саботата за што се обвинети две страни во конфликтот - Силите за брза поддршка (RSF) и Суданските вооружени сили (SAF).

Болницата „Ал-Муџлад“ обезбедувала витални услуги како што е дијализата и била клучна за лекување на цивили во погодената област од конфликтот. Според Мрежата на судански лекари, болницата била единствената функционална здравствена установа во поширокиот регион, што дополнително го нагласува обемот на загубата. Нападот остави многу мртви, како и десетици повредени.

RSF ја обвини војската за извршување на нападот, велејќи дека целта била елиминирање на нејзините членови наводно сместени во болницата. Војската сè уште не одговорила на обвинувањата. Ваквите меѓусебни обвинувања дополнително ја комплицираат веќе сложената безбедносна ситуација во Судан, каде што конфликтот трае речиси три години.

ОН и УНИЦЕФ предупредуваат дека ситуацијата со децата во Судан е критична. За време на граѓанската војна што започна во април 2023 година, еден милион луѓе беа погодени, а хуманитарните организации предупредуваат дека немаат доволно средства за да помогнат. Многу деца се изложени на ризик од неухранетост, напуштање на училиште и ризик од експлоатација и болести. Шефицата на УНИЦЕФ, Кетрин Расел, истакна дека најранливите деца се соочуваат со тешките последици од конфликтот, вклучително и ужасни случаи на сексуална злоупотреба.

Тагови: напади Судан