На маса, како што најави, планира да стави две теми - интеграцијата на Македонија во ЕУ и усогласување на ставови за односите со соседните држави. Кога би се одржала ваква средба детали не откри, единствено посочи дека поканата до Мицкоски ќе ја упати наредниве денови. Коментирајќи ги изјавите од ВМРО-ДПМНЕ дека нема да поддржат уставни измени и за наводна негова оставка, премиерот вели тоа се фикции на лидерот на ВМРО-ДПМНЕ во недостиг на концепт.
- Сега ги собрал кај него во Извршен комитет и им вика слушајте, Ковачевски дал оставка и овие викаат браво, доаѓаме на власт. После тоа јас излегувам на телевизија и велам не сум дал оставка и дека тоа е лага повторно на Мицкоски, овој ги собира во Извршен комитет и им вика – абе он дал ама му ја искинал Талат Џафери. Јас после излегувам и велам Талат Џафери јас го немам ни видено, ниту пак ако некој дава оставка може некој да му ја цепка. Кога се дава оставка – таа се дава, значи такво нешто нема. Тој прво мора да си ги среди своите ставови. Јас планирам да го поканам во наредните десет дена на средба на која што ќе разговараме за две теми, коишто ќе ги предложам како претседател на Владата. Првата тема - носењето на одлуки потребни за интеграцијата на Македонија во ЕУ и втората, усогласување на ставови за односи со сите соседни држави на Македонија, изјави Ковачевски.
Мицкоски е подготвен на лидерска кога станува збор за национални и државни интереси, но на неа треба да се разговара и што по неуспехот на уставните измени, одговорија од неговата партија.
-Кога станува збор за националните и државни интереси на Македонија, претседателот на ВМРО-ДПМНЕ Мицкоски е подготвен да разговара во било кое време. Доколку постои желба за национално единство и слушање на гласот на мнозинството, прифаќаме лидерска средба на која треба меѓудругото да се види што ќе се прави во периодот по неуспехот на тие уставните измени и иднината на граѓаните која треба да се обезбеди, соопштија од ВМРО-ДПМНЕ.
Откако работната група за уставни измени вчера ги формулираше предлог уставните амандмани, Ковачевски очекува од понеделник предлог-иницијативата од работната група да се најде на владина седница, па откако ќе се разгледа и усвои, да се испрати до Собранието. Не очекува албанските партии да ја откажат поддршката за предлогот откако не помина нивното барање за бришење на „20 отсто“ од Уставот во замена со албански јазик.
- И сите политички партии треба да бидат свесни дека ова е процес заради интеграција во ЕУ, а впрочем многу јасни пораки испрати вчера и сенаторот Крис Марфи од САД којшто кажа дека треба веќе да се определат политичките партии во државата – дали се за ЕУ и за НАТО и за САД или дел од нив ќе сакаат да останат заложници на Димитар Апасиев и на Русија, потенцира Ковачевски.
Според предлогот за уставни измени кои вчера ги презентираше претседателката на работната група Маргарита Цаца Николовска, ќе се интервенира во преамбулата на Уставот, за покрај бугарскиот да се додадат уште пет други народи, втората интервенција е во делот за дијаспората, а третата за Комитетот за односи меѓу заедниците.