Македонија

Ковачевски ќе го пречека Столтенберг, тет-а-тет средба и заедничка прес-конференција

Премиерот Димитар Ковачевски денеска попладне ќе го пречека генералниот секретар на НАТО Јенс Столтенберг, кој е во официјална посета на Република Македонија, што е прва посета откако државата е полноправна членка на НАТО.

Како што информираат утрово од владината прес - служба, според агендата генералниот секретар на НАТО Столтенберг, веднаш по церемонијата на пречекот ќе одржи тет-а-тет средба со премиерот Ковачевски, по што ќе следува билатерална средба на двете делегации.

Во составот на македонската делегација ќе бидат министерката за одбрана, Славјанка Петровска, министерот за надворешни работи, Бујар Османи, министерот за информатичко општество и администрација, Азир Алиу и амбасадорот на Македонија во НАТО, Дане Талески.

Столтенберг е во дводневна посета на Скопје во рамки на неговата турнеја во земјите од Западен Балкан.

Генералниот секретар на НАТО денеска попладне ќе има билатерална средба со претседателот на Собранието на Република Македонија, Талат Џафери, по што ќе се обрати пред пратениците во Собранието, во рамки на 132. седница. Столтенберг ќе биде примен и од претседателот Стево Пендаровски во неговиот Кабинет.

Утре во Скопје ќе се одржи неформалниот лидерски состанок на НАТО сојузниците од регионот.

Столтенберг и Ковачевски, како што е најавено, ќе ги пречекаат поканетите лидери од Република Албанија - премиерот Еди Рама, Република Хрватска - претседателот Зоран Милановиќ, Република Црна Гора - премиерот Милојко Спајиќ и Република Словенија - премиерот Роберт Голоб.

Турнејата низ регионот Столтенберг ја започне од Босна и Херцеговина во неделата, по што замина во посета на Косово. Од вчера Столтенберг престојува во Србија, од каде денеска попалдне ќе допатува во Скопје, како последна етапа од неговата турнеја низ земјите од Западниот Балкан.

Од МВР информираат дека поради пристигнувањето на поголем број на странски делегации денеска ќе има посебен сообраќаен режим на поширокото градско подрачје во Скопје. За таа цел Секторот за внатрешни работи Скопје апелира до граѓаните да ги почитуваат наредбите што ги издаваат полициските службеници по сообраќајниците.

Свет

Саркози ќе се жали до Европскиот суд за човекови права- осуден е на 3 години поради корупција

Поранешниот француски претседател Никола Саркози, осуден за корупција и трговија со влијание во врска со случајот познат како прислушување, рече дека пресудата е „неправедна“ .

Поранешниот француски претседател Никола Саркози, осуден за корупција и трговија со влијание во врска со случајот познат како прислушување, рече дека пресудата е „неправедна“ и најави дека ќе се повлече од своите „јавни активности како поранешен претседател“ и ќе поднесе жалба до Европскиот суд за човекови права.

Касациониот суд во Париз го осуди Саркози на три години затвор, од кои една година беше условна со електронски мониторинг уред и тригодишна забрана за кандидирање за јавна функција.

Во соопштението објавено на неговиот профил X, Саркози најави дека ќе ги „замрзне (своите) јавни активности како поранешен претседател“ и рече дека нема да се рекламира во медиумите, пренесува порталот BFM TV.

„За мене нема никакви изненадувања и новости. За да не оставам впечаток дека барам некакви привилегии, доброволно се откажав од дел од поволностите на кои имав право. Поднесов жалба до Европскиот суд за човекови права, кој ќе одлучи дали сум жртва на неправда. Жалбата ќе биде поднесена пред крајот на месецот.

Со електронската нараквица, поранешниот француски претседател ќе може да го напушти својот дом само меѓу 8 и 20 часот во вторник, петок, сабота и недела и до 21:30 часот во понеделник, среда и четврток.

Свет

Мајмун остави 22 милиони луѓе без струја- цела држава во темнина поради колапс на системот

Прекинот на струја што се случил во Шри Ланка е предизвикан на многу необичен начин - мајмун влегол во трафостаница.

„Мајмунот дошол во контакт со трансформатор, предизвикувајќи прекин во системот за снабдување со електрична енергија“, рече во изјавата министерката за енергетика на Шри Ланка, Кумара Јајакоди.

Министерката Јајакоди наведува, како што пренесува Le Figaro во Париз, дека инцидентот се случил во јужните предградија на главниот град Коломбо. Проблемот сè уште не е целосно решен, иако потрошувачите во некои области ја вратија струјата. Засега не е јасно уште колку време ќе биде потребно за сите да добијат струја.

„Инженерите се на местото на прекинот и работат на што поскоро враќање на струјата“, изјави министерот Јајакоди.

Фигаро потсетува дека Шри Ланка со месеци страдаше од недостиг на електрична енергија во летото 2022 година, кога земјата западна во економска криза, а жителите тогаш имаа струја само 13 часа на ден.

Шри Ланка има население од околу 22 милиони жители.

Живот

Примерок од првото издание на книгата за Хари Потер на аукција е продаден за 18.000 фунти

Реткото прво издание на романот на Џ.К.Роулинг, Хари Потер и каменот на мудроста, е продадено на аукција за 18.000 фунти( околу 22.000 евра) , пренесуваат денеска британските медиуми.

Овој примерок е дел од првото издание објавено во 1997 година, пишува весникот Стандард.

Се очекувало примерок од романот да се продаде за 20.000 до 30.000 фунти (24.000 до 36.000 евра).

Ова е копија која е наменета за библиотеки, а на една од првите страници има ознака за библиотека.

Копијата е исто така единствена по тоа што содржи три грешки при печатењето.

Серијата романи за Хари Потер, која вклучува седум книги подоцна адаптирани во блокбастер филмови, стана една од најпопуларните во светот.

притисни ентер