Затворени се денеска вратите на агенцијата Беса Транс која го организирала патувањето во Турција по кое враќајќи се во земјава, на магистралата Струма во Бугарија автобус се запали и загинаа 46 лица. Членови на семејствата на патниците и роднини останаа без одговори – дали нивните најблиски се меѓу загинатите или преживеаните. Потресени и револтирани, со часови се обидувале да стапат во контакт со Беса Транс, на телефон никој не им кренал а пред просториите на агенцијата разочарувањео им било уште поголемо.
Беким Алити и неговиот брат не слушнале ништо за нивните сопруги кои во четвртокот заминале кон Истанбул а ноќеска требало да пристигнат дома. Последен пат заборувале со нив синоќа пред тргнат назад.
Шокот и неизвесноста започнале од рано утринава кога од медиумите разбрале за трагедијата. Оттогаш се во потрага по одговори. Џелал Бакиу со часови сакал да дознае за неговиот братучед Енес Бакиу.
За среќа Џелал успеал да исконтактира со неговиот братучед кој патувал со еден од другите автобуси.
И додека полицијата од утринава ја обезбедува канцеларијата на Беса Транс во Скопје, каде не се појави ниту еден од сопствениците или вработените, попладнево единствено на својата фејсбук страница изразија сочувство до семејствата на настраданите.
„Компанијата во целост соработува со надлежните институции со Р.C. Македонија и Р. Бугарија се со цел да се утврдат причините за оваа страшна трагедија! Се извинуваме на сите што не сме во можност да одговориме на бараните информации, бидејќи сме во голем шок.
Беса Транс, како што јавија бугарските медиуми, имала седиште во Ќустендил, на чија што адреса биле регистрирани се уште 23 фирми, а канцеларии има во Скопје и во други градови низ државата. Против агенцијата годинава има четири кривични пријави за непочитување на Ковид протоколите, велат од Државниот инспекторат, додека од Обвинителството велат дека се постапувало против две пријави за кои предложиле казнен налог.
Од Министерството за транспорт и врски велат дека:
„Превозникот ги исполнил условите предвидени во Законот и му е издадена лиценца за вршење на меѓународен слободен превоз на патници. Со барањето за добивање на лиценца за вршење на меѓународен слободен превоз на патници, превозникот ги исполнил условите за добивање на лиценца со важност од 2018 до 08.08.2022 година. Од тој момент превозникот се нема обратено до Министерството за транспорт и врски, со поднесено барање за добивање на извод од лиценца за ново набавено возило.
Инаку Беса транс, најчесто вози туристички тури на релација Истанбул – Софија – Скопје. Според она што може да се најде како информација од фејсбук страницата на агенцијата, се поаѓа во четврток а враќањата се во понеделник.