Лаги и конструкции – вака копретседателот на македонско – бугарската комисија за историски прашања Драги Ѓоргиев ги коментира пишувањата на БГНЕС дека е постигнат договор за Цар Самоил да биде означен како бугарски цар и тоа да стои на спомен обележја, споменици или тврдини. Ѓоргиев вели дека постои текст за заедничко чествување на Цар Самоил усвоен во 2019 а кој од вчера се најде и во медиумите со препорака до владите во Скопје и Софија како таа држава да биде претставена во учебниците по историја.
-Не знам од каде се измислени тие конструкции таму, но апсолутно не е точно она што е наведено во некои медиуми со она што е усвоено од страна на самата комисија за заедничко чествување на Цар Самоил. Комисијата никогаш не усогласувала текстови за тие да бидат ставени на различни споменични обележја, споменици или тврдини. Комисијата усвојува заеднички текстови за заедничко чествување на одредени личности и тие личности се познати.изјави – Драги Ѓоргиев - Копретседателот на македонско – бугарската комисија за историски прашања.
Во врска со француски предлог кој се појави во јавност, Ѓоргиев вели дека не го прочитал. Но по она што се најде во медиумите, првиот човек од македонскиот тим историчари е дециден дека работата на историската комисија е поставена каде што не и е местото.
-Работата на историската комисија не може да биде дел од процесот на политичките преговори. Тоа мора да биде паралелен процес кој ќе тече паралелно со тој процес кој нема да биде ограничен со рокови ниту врзуван со одредени императиви како до тогаш таа личност да биде решена.изјави – Драги Ѓоргиев - Копретседателот на македонско – бугарската комисија за историски прашања.
Според професорката Маја Ангеловска Панова од Институтот за национална историја ако се прифати вака објавениот француски предлог ќе претставува сериозен проблем за земјава.
-Несомнено дека ова е преседан. Вакво нешто не постои во современите светски историографии на наметнување на нечиј наратив врз друг наратив, така што моето мислење е дека ова е едно агресивно однесување што не соодветствува со европските вредности, најмалку со вредностите што се применуваат во научно истражувачката работа,изјави – Проф. Д – р Маја Ангеловска Панова - Институтот за национална историја.
Во соопштението кое денеска до достави македонскиот тим од историската комисија освен што се демантираат наводите во бугарските медиуми, се наведува и дека во сите досегашни решенија нема ништо спорно и ништо со што би се загрозил историскиот идентитет на македонскиот народ и дигнитетот на македонските граѓани.