Македонија

Комисијата за европски прашања ги проследи измените на Кривичниот законик во натамошна постапка

Собраниската Комисијата за европски прашања денеска го проследи во натамошна постапка предлогот на Законот за изменување и дополнување на Кривичниот законик, по скратена постапка. 

Законските измени се на дневен ред на 125. седница.

Предложените измените на Кривичниот законик главно се однесуваат на измени на членови кои ги засегаат функционери, службени и одговорни лица во јавни претпријатија и установи, а се предлагаат и измени на кои се однесуваат на загрозување на животната средина.

Предложените законски измени пред членовите на комисијата ги образложи заменик мистерката за правда Викторија Аврамовска – Мадиќ, која рече дека намерата била да се обезбедат јасни, прецизни и цврсти описи на кривичните дела и дека предлог-измените ќе доведат до проширување на опфатот на дела за кои ќе се предвидува конфискација. За предлог-измените реагираа опозициските партии, но не поднесоа амандмани.

Во измените на Кривичниот закон се брише ставот 5 од членот 353 кој предвидуваше затворска казна од најмалку 5 години затвор за злоупотреба на службената положба и овластување при вршење на јавни набавки или на штета на средствата од Буџетот. Во измените на овој член новина има и со додавањето на став кој предвидува одземање на прибавената имотна корист.

Со измените во членот 353-в, кој се однесува на делото „несовесно работење во службата“, за кое досега беше предвидена казна од минимум три години затвор за службено или одговорно лице во јавно претпријатие или установа кое ќе прибави значителна имотна корист, казната е намалена на шест месеци до пет години.

Наместо максималните десет години затвор кои досега беа предвидени во членот 394 казните за „злосторничко здружување“, односно за тој што ќе создаде група или банда, со измените се предвидува максимална казна затвор до три години. Намалување има и за членовите на групата или бандата кои ќе извршат кривично дело, максималната казна затвор од 5 години се намалува на максимални 2 години. Токму со делото „злосторничко здружување“ беа опфатени и голем број на обвинетите во предметите од СЈО.

Целта на донесувањето на овој закон, како што се наведува во Предлогот, е усогласување на Кривичниот законик со меѓународните документи. Предлогот на законот се заснова врз истите начела врз кои се заснова Кривичниот законик.

Во денешната дискусијата за предлогот учествуваа пратениците Ели Панова, Александар Николоски, Снежана Калеска Ванчева, Бојан Стојаноски, Антонијо Милошоски, Гордана Силљановска Дафкова, Дејанчо Ефтимов, Миле Лефков, Рашела Мизрахи и заменик министерката за правда Викторија Аврамовска Мадиќ.

Свет

Иран ги откажува летовите поради заканите од израелски напад

Портпаролот на Иранската организација за цивилно воздухопловство потврди дека летовите на неколку аеродроми во земјата ќе бидат суспендирани од 21:00 часот вечерва до 5:00 часот утре наутро.

Портпаролот изјави дека се работи за „оперативни ограничувања“ без да наведе повеќе детали.

Во исто време, и тунелите Тохид и Ресалат во Техеран ќе бидат затворени.

Оваа одлука е донесена откако Израел најави напад врз Иран како одговор на лансирањето балистички ракети кон израелските воени бази од страна на Иран.

Претходно денеска, иранскиот министер за нафта Мохсен Пакнеџад ги посети најголемите нафтени постројки во земјата и се состана со највисокиот воен командант на Корпусот на гардата на Исламската револуција во областа за да разговара за безбедноста на локацијата. /МИА

Свет

Шолц: Германија никогаш нема да толерира антисемитизам

Германскиот канцелар повторно повика на прекин на огнот, за заштита на цивилите во Газа и за ослободување на преостанатите израелски заложници.

Германскиот канцелар Олаф Шолц денеска ја одбележа претстојната годишнина од нападите врз Израел на 7 октомври, ветувајќи дека Германија „никогаш нема да толерира“ антисемитизам, но истовремено се фокусира на постигнување прекин на огнот на Блискиот Исток, јави ДПА.

Во видео-обраќање објавено на интернет, Шолц изјави дека никогаш нема да ја заборави својата посета на Израел минатиот октомври, кога се сретнал со роднини на убиените или киднапираните од страна на палестинската милитантна група Хамас на 7 октомври.

Една година подоцна, Шолц рече дека е неприфатливо „граѓаните од еврејска вера да живеат во Германија во страв и терор“, да се плашат да носат кипа во јавност или да се воздржуваат да го откријат своето потекло пред своите соученици.

- Еврејскиот народ во Германија ја има целосната солидарност од нашата држава и од сите пристојни луѓе во нашата земја, додаде Шолц.

Германскиот канцелар повторно повика на прекин на огнот, за заштита на цивилите во Газа и за ослободување на преостанатите израелски заложници.

Тој предупреди дека конфликтот ризикува да се претвори во регионален пожар, но рече дека Германија координира со меѓународните партнери за да спречи понатамошна ескалација.

„На првата годишнина од терористичките напади на Хамас врз Израел, мирот и помирувањето се чини дека се подалеку од кога било во регионот. Но, знаеме дека одржливото решение на конфликтот зависи од кредибилен пат кон преговарано дво-државно решение,“ заклучи Шолц. /МИА

Технологија

„Волстрит Џурнал“: Кинески хакери упаднале во мрежи на американски интернет провајдери

Кинески хакери упаднале во супербрзите мрежи на американски интернет провајдери и собрале информации од системите што американската федерална влада ги користи за прислушување со судски одобренија, пренесе денеска „Волстрит Џурнал“.

Компаниите „Verizon Communications“, „AT&T“ и „Lumen Technologies“ се меѓу телекомуникациските фирми чии мрежи биле пробиени при неодамна откриениот хакерски напад, соопшти њујоршкиот весник, повикувајќи се на неименувани извори запознаени со ситуацијата.

Кинеското министерство за надворешни работи денеска се огласи по повод оваа вест, соопштувајќи дека не е запознаено со хакерскиот упад кој е опишан во извештајот.

Во соопштението се истакнува дека САД и во минатото „измислувале лажни наративи за да ја обвинат Кина“.

„Во време кога кибер безбедноста стана заеднички предизвик за сите земји во светот, ваквиот погрешен пристап на САД само ќе ги попречи напорите на меѓународната заедница да најде заедничко решение преку дијалог и соработка“, се вели во соопштението на кинеското Министерство за надворешни работи.

Пекинг претходно ги негираше обвинувањата на американската влада и други субјекти дека користи хакери за упади во странски компјутерски системи. /МИА

притисни ентер