Македонија

Кога спортот ја губи суштината – Млад борач избоден од конкурент за време на натпревар

Спортските терени како арена за физички пресметки.. Боречкиот клуб „Бучим“ бара суспензија за млад борач од ривалски клуб, кој минатата недела со нож ранил нивен малолетен борач за време на Меѓународен турнир во Скопје.. 

Доживотна суспензија за напаѓачот, како и казна за борачкиот клуб „Лирија“, бара радовишкиот борачки клуб Бучим-Радовиш, откако пред шест дена на меѓународен натпревар во Скопје нивниот млад борач Арон Николов, бил прободен три пати со нож во ногата, од борач - врсник од ривалскиот клуб „Лирија“.

Инцидентот се случил на трибините во спортската сала во Радишани, откако и двајцата борачи го завршиле својот настап на натпреварот. Претседателот на клубот „Бучим“ Владо Лазаров за Канал 5 раскажа за немилиот настан кој според него можел да биде кобен за младиот спортист и македонски репрезентативец.

Управниот одбор на „Бучим“, освен одговорност од организаторите како и соодветна реакција од Федарацијата, најавија дека ќе поднесат и приватни кривични пријави против напаѓачот. Според Лазаров недозволиво е на спортски натпревари да се случуваат вакви инциденти и случајот не треба да биде занемарен.

Канал 5 стапи во контакт и со еден од тренерите во клубот „Лирија“, кој не беше расположен да даде изјава, ниту да го коментира инцидентот.

Случајот бил пријавен во полиција. Напаѓачот бил веднаш приведен, а во текот на минатата недела приведени за сослушување биле уште тројца малолетници и еден возрасен човек. Од МВР за Канал 5 велат дека се уште се работи на случајот, има индиции дека во инцидентот учествувале и повеќе лица. Оттаму најавија кривична пријава за сторителите за насилство.

15годишниот спортист Арон Николов кој бил избоден е на домашно лекување и се уште заздравува од нападот, но е во добра состојба.

Кошарка

Почнува новата сезона во АБА лигата

Со дуелот меѓу Сплит и СЦ Дерби денеска почнува натпреварувачкиот дел во регионалната кошаркарска АБА лига во која по испаѓањето на МЗТ Скопје Аеродром сезонава нема да има претставник на македонската клупска кошарка.

Титулата ја брани белградски Партизан кој минатата сезона во финалето го совлада градскиот ривал Црвена ѕвезда со 3-2.

Преостанатите двојки од воведното коло кое ќе финишира в понеделник се Цедевита – Мега, Будуќност – Задар, Игокеа – Црвена ѕвезда, Борац – Цибона, ФМП – Крка и Партизан – Морнар.

Пласман во плејофот ќе обезбедат првите осум пласирани екипи.

Четвртфиналните и полуфиналните серии ќе се играат до две победи, а финалната серија до три победи.

Автомобилизам

Зошто такси возилата во Германија се во беж боја?

Германските таксиња се беж - но не отсекогаш.

Првично, такси возилата во Германија не биле беж, туку црни, но на тоа му дошло крајот во 1971 година. Такси возилата во многу земји се жолти, во некои црвени или дури светло сини, додека во други земји воопшто нема регулативи.

Ова го наредил тогашниот сојузен министер за транспорт Георг Лебер, а новата боја требало да биде „светла слонова коска“. По петгодишен преоден период, сите црни такси возила требало да исчезнат од германските улици, што и се случи.

Кои се причините за таа одлука? Нечистотиите и малите дамки не паѓаат во око толку брзо на беж како на црно, таксито изгледа поуредно, а во годините пред да се постави клима во автомобилите, било доста жешко во црните такси возила, пишува „RevijaHak“.

Сепак, уште поважно е што оваа боја, за разлика од црната, дотогаш не се користела за лични автомобили. Како и да е, се чини дека една од големите грижи на Лебер е решена, бидејќи тој успеал да ја зголеми безбедноста на патиштата со беж такси возилата.

Извор: Б92

Фудбал

Фламенго по само пет месеци го отпушти Сампаоли

 Бразилскиот прволигаш Фламенго објави синоќа дека ја раскина соработката со аргентинскиот фудбалски стратег Хорхе Сампаоли по неуспехот во финалето на бразилскиот куп против Сао Паоло (0-1, 1-1).

-Тренерот Хорхе Сампаоли и неговиот стручен тим веќе нема да го водат црвено – црниот тим, објави Фламенго на социјалните мрежи, посакувајќи му на аргентинскиот стратег „среќа“ во продолжението на кариерата.

Сампаоли е отпуштен по само пет месеци откако дојде во Фламенго од редовите на шпанска Севиља, каде, исто така, претходниот ангажман му траеше пет месеци.

Сампаоли со Фламенго потпиша договор до крајот на 2024 година, и според локалните медиуми, клубот поради предвремениот раскин на соработката ќе треба да плати обесштетување од 1,8 милиони евра.

Медиумите наведуваат дека главен кандидат за наследник на Сампаоли на клупата на клубот од Рио де Жанеиро е поранешниот бразилски селектор Тите.

притисни ентер