Македонија

Книжевно-филозофска вечер посветена на Владимир Јанкелевич

Францускиот институт, Институтот за филозофија на Филозофскиот факултет во Скопје и Филозофското друштво на Македонија вечер во ЕУ Инфоцентарот организираат книжевно-филозофска вечер посветена на францускиот естетичар и музиколог Владимир Јанкелевич.

Со настанот ќе почне Месецот на франкофонијата и новиот циклус предавања за француската модерна филозофија. Ќе биде промоворан преводот на естетичката студија „Музиката и неискажливото“ од Јанкелевич, која ја објави „Македоника“ од Скопје, а од француски на македонски ја преведе Марија Паунова.

- Музиката во исто време е и изразна и неизразна, сериозна и лекомислена, длабока и површна; таа има смисла и во исто време нема своја смисла. Дали музиката е забава без значење? Или, пак, е еден шифриран јазик како што се мистериозните хиероглифи? Или може да се каже дека е двете заедно? Но, таа суштинска двосмисленост, исто така, има свој збунувачки контраст, една иронична и скандалозна диспропорција помеѓу магичната моќ на музиката и неочигледната цврста основа на музичката убавина, пишува авторот на книгата.

Владимир Јанкелевич (1903-1986) е француски естетичар, филозоф, музиколог, пијанист. Бил професор на повеќе француски универзитети, а најдолго на Сорбона, каде бил и шеф на катедрата за морална филозофија. Автор е на голем број дела од филозофијата и музиката и поврзани со Бергсон, Форе, Дебиси, Лист, Равел, Римски-Корсаков, Чајковски... Иако се теориски, неколку негови дела се објавувани во повеќе изданија, односно се многу читани и преведувани. На Јанкелевич му се припишуваат голем број естетички и антиестетички разјаснувања на заблуди за музиката.

За животот и делото на Јанкелевич на книжевно-филозофската вечер во ЕУ Инфоцентарот ќе зборува Денко Скаловски, професор на Филозофскиот факултет во Скопје.




Шоу биз

„Спајс грлс“ повторно заедно за 50. роденден на Викторија Бекам

Познатиот женски поп-состав од 90-тите - „Спајс грлс“ (Spice Girls) повторно се обедини за 50-от роденден на Викторија Бекам - една од девојките во групата.

Популарните „Спајсици“ сѐ уште се во добри односи. Џинџер, Спорти, Бејби, Скери и славеничката Пош Спајс прославија и со својата позната песна „Стоп“, а видеото од изведбата на Инстаграм го објави сопругот на Викторија, Дејвид Бекам. Забавата се случила викендов во клубот „Освалдс“ во Лондон, а од познатите гости, забележани се и Том Круз, Селма Хајек, Ева Лонгорија и Гордон Ремзи, меѓу другите.

„Пријателството никогаш не завршува“, гласи натписот до заедничка фотографија објавена на „Инстаграм“ страницата на „Спајсиците“.

Инаку, годинава се навршуваат и 30 години од основањето на „Спајс грлс“. Составот првично постоеше од 1994. до 2000 година, но имаше повторни собири и за неколку посебни поводи потоа. Тие се собраа и на затворањето на Олимписките игри во Лондон, 2012 година.

Други спортови

Бонмати и Ѓоковиќ добитници на спортските оскари за 2023

Шпанската фудбалерка Аитана Бонмати и српскиот тенисер Новак Ѓоковиќ се добитници на наградата Лауреус, таканаречените Оскари за најдобра спортистка и спортист во 2023 година.

Минатата година Бонмати беше избрана за најдобар играч во изборот на ФИФА, а беше прогласена и за најкорисен играч (МВП) на Светското првенство на кое Шпанија ја освои шампионската титула.

Новак Ѓоковиќ ја освои наградата Лауреус по петти пат во кариерата, откако минатата година освои три од четирите грен - слем турнири (Австралија Опен, Ролан Гарос, УС Опен) и играше во финалето на четвртиот (Вимблдон).

Спортистите за наградата Лауреус се номинирани од претставници на светските медиуми, а победниците ги избираат 69 членови на Светската спортска академија Лауреус. Наградата е основана во 2000 година.

Добитници на наградата Лауреус за 2023 година:

Спортистка на годината: Аитана Бонмати

Спортист на годината: Новак Ѓоковиќ

Тим на годината: Шпанска женска фудбалска репрезентација

Најголем напредок: Џуд Белингем

Повратничка на годината: Симон Белс

Најдобра спортистка со попреченост: Диде де Грот

Спортистка на година во акциски спортови: Ариса Трев

Награда за хуманитарна работа: Фондација Рафа Надал. /МИА

Македонија

Гласањето на болните и изнемоштените во десетте општини од Југоистокот почна без проблеми

Најмногу болни и изнемоштени се пријавени во Општина Струмица - 356.

Вкупно 1.547 болни и изнемоштени лица денеска гласаат во првиот круг од претседателските избори во десетте општини во Југоисточниот плански регион - Струмица, Радовиш, Василево, Босилово, Ново Село, Конче, Богданци, Гевгелија, Дојран и Валандово. Гласањето се одвива без проблеми и според општинските изборни комисии се очекува да заврши во попладневните часови.

Најмногу болни и изнемоштени се пријавени во Општина Струмица - 356, а заедно со нив гласат и затвореници од Затворот во Струмица. Утрово од 07:30 почна подигањето на избирачкиот материјал и процесот тече без проблеми.

Претседателите на изборните комисии од другите општини, исто така, информираат дека гласањето се одвива нормално и без пробеми.

Во Општина Ново Село се пријавени 299 болни и изнемоштени лица, Босилово-172, Гевгелија-175, Валандово-78, Василево-186, Радовиш-123, Конче-48, Дојран-44, Богданци-66 избирачи.

Во избирачкиот список во десетте општини вкупно се запишани вкупно 147167 граѓани со право на глас, кои ќе гласаат на 273 избирачки места.

притисни ентер