Претседателот на собранието Талат Џафери вели дека нема никаков проблем собранието итно да се состане, но за тоа треба да стигне предлог од владата или група пратеници.

-Доколку има итна потреба, собранието може да работи во било кое време според нашите прописи. Доколку има консензус меѓу политичките субјекти кои што учествуваат во работата на собранието и излегуваат со таков усогласен предлог, во контекст на собранието не е пречка да можат да работи собранието и евентуално да донесе нова одлука, тоа е во рацете на политичките партии доколку се усогласат со тоа, изјави Џафери.

Денешните проценки на ДЗС се дека до четврток на полноќ, статистичката операција може да биде завршена. Јасмина Ѓеорѓиева од статистика вели дека во дел од земјава пописот е речиси сосема завршен, додека пак во Скопје се подига темпото на терен.

-Активностите се интензивирани во оние општини каде што се уште сметаме дека има население кое што не е попишано, вклучени се и дополнителен број попишувачи, а исто така одлично функционираат и овие локации кои што ги објавивме во кои што граѓаните можат да одат и сами да се попишат доколку досега не ги посетил попишувач.- Ѓеорѓиева

Во текот на вчерашниот ден во дел од реонските канцеларии имаше поголема гужва, што предизвика и нервоза кај граѓаните, денеска сликата далеку поразлична.

Посетивме неколку регионални пунктови за попишување, по вчерашната гужва, денеска ситуацијата е поразлична, граѓаните задоволни од темпото на статистичката операција на овие места.

Најголемиот дел од оние кои што ги затекнавме во пунктовите се повозрасни лица, што се пожалија дека не биле посетени на домашна адреса.

-Никој не дојде дома да не попише/ Зошто не идат попишувачиве по улици не знам../Ги немаше досега да дојдат дома и моравме да дојдеме тука, ги чекавме дома до денеска, велам ќе помине рокот.

Досега во земјава се попишани око 1,7 милиони граѓани, над 520 илјади домаќинства и околу 750 илјади станови.

Во дијаспора бројот на самопопишани изнесува речиси 200.000 лица.