Немало ограничувања за движење на граѓаните, а работните места од рестораните до фризерите останале отворени. Ниту една апликација за следење на граѓаните не е развиена.

Во Јапонија нема центар за контрола и превенција на болести, а тестиран е само 0,2 проценти од населението во земјата, што е една од најниските стапки кога станува збор за развиените земји.

Сепак, кривата се израмни, а бројот на починати е помалку од 1.000. Во Токио, една од најгусто населените области во Јапонија, бројот на заразени е претежно едноцифрен.

Затоа, анализата на причините што и овозможија на Јапонија да го победи коронавирусот не придржувајќи се кон мерките воведени од другите, стана прашање на национална дебата. Сите се согласуваат за една работа - немало „сребрен куршум“, односно еден фактор што ја направил разликата.

„Само гледајќи го бројот на починатите, јасно е дека Јапонија е успешна. Но, дури и експертите не знаат зошто“, изјави Микихито Танака, професор по комуникација на универзитетот Васеда и член на советодавната група за коронавирус.

Медиумите објавија список од 43 можни причини зошто Јапонија била успешна во борбата против коронавирусот, а вклучува и различни фактори, од културата на носење маски, ниското ниво на дебелина до релативно раната одлука за затворање на училиштата, па дури и претпоставката дека карактеристиката на јазикот на Јапонците е да исфрла помалку капки плунка.

Експертите интервјуирани од Блумберг исто така се согласуваат дека одговорот на прашањето од каде потекнува успехот во борбата против коронавирусот е од голем број различни фактори. Како и да е, мерките преземени од Јапонија би можеле да послужат како долгорочна лекција за земјите со епидемија.

Еден од поважните фактори е фактот дека Јапонија започнала да ги бара контактите многу брзо, а тоа било можно затоа што во јапонските здравствени центри повеќе од половина медицински сестри имаат искуство во набљудување на заарзите. Јапонија се концентрира да бара т.н. кластери на одредени локации, како што се клубови и болници, за да ја лоцираат инфекцијата пред спиралата да излезе надвор од контрола.

Покрај тоа, друг настан и помогна на Јапонија да се подготви добро за епидемијата. Закотвувањето на крузерот ,,Diamond Princess” во февруари, каде стотици луѓе се заразиле, им помогнало на јапонските експерти многу рано да добијат вредни информации за тоа како се шири вирусот и да сфатат дека станува збор за опасност што може лесно да се пренесе во Јапонија.

Покрај тоа, во Јапонија, експертите успешно воспоставија едноставна порака за тоа како да се избегнат затворените, пренатрупани простори и блиските контакти. Се верува дека ова било многу поуспешно отколку да се изврши целосна физичка изолација. Друг фактор е развиената здравствена свест на јапонските граѓани.

И, иако Јапонија ги избегна најлошите сценарија во однос на здравјето, мерките за слаби ограничувања не успеаја да ја спасат земјата од негативните економски ефекти. Во првите три месеци од оваа година Јапонија падна во рецесија, а економистите предвидуваат дека вториот квартал ќе биде најлош досега.

И иако Јапонија наскоро ќе ги укине сите мерки, властите предупредуваат дека нема враќање во старата нормала. Покрај тоа, ако се појави втор бран на инфекција, ризикот во Јапонија, која што има најстара популација, останува голем.

„Мора да претпоставиме дека вториот бран ќе биде полош и ќе се подготвиме за тоа“, рече Јошихито Ники, професор по заразни болести на Универзитетот Шоу.