Европската комисија денеска усвои Работна програма за инструментот „Дигитална Европа“ за периодот 2025-2027 година, со која се предвидени 1,3 милијарди евра за поддршка на клучните технологии кои се од стратешка важност за иднината на Европа и за технолошкиот суверенитет на континентот, јави дописникот на МИА од Брисел.

Како што соопшти ЕК, Работната програма се фокусира на примената на вештачката интелигенција во бизнис секторот и јавната администрација, на зајакнување на кибер безбедноста и за зголемување на дигиталните вештини.

Се очекува во текот на следниот месец ЕК да почне со распишување на конкурси за користење средства од Програмата за конкретни проекти. Право на учество на конкурсите ќе имаат компании, јавната администрација и други субјекти од членките на ЕУ и ЕФТА, како и од трети земји опфатени со „Дигитална Европа“, меѓу кои е и Македонија.

Клучните приоритети на Работната програма се насочени кон подобрување на достапноста на генеративните апликации за вештачка интелигенција, вклучително и во здравствениот сектор, како и кон поддршка на европските центри за дигитални иновации, што ќе им овозможи на компаниите и јавниот сектор пристап до техничка експертиза и тестирање, совети, обуки и вештини за усвојување на најновите технологии.

Дополнително се предвидува надградба на иницијатива „Дестинација Земја“, насочена кон изработка на дигитален модел на Земјата за поддршка на климатската адаптација и управувањето со ризици од катастрофи, потоа зајакнување на кибер безбедност, пред се на критичната инфраструктура, проширување на капацитетите за образование и обука за дигитални вештини, усвојување на регулативите за „паричникот за дигитален идентитет“ од страна на земјите членки, како и стимулирање на трансформацијата на јавниот сектор преку развој на ефикасни, висококвалитетни и интероперабилни дигитални јавни услуги.

Со Работната програма се предвидува и поттикнување на иновациите за развој на стратешки технологии, преку подобрување на можностите за пристап до јавно и приватно финансирање.

„Дигитална Европа“ има за цел финансирање на проекти насочени кон доближување на дигиталната технологија до бизнисите и граѓаните. Со својот буџет од 8,1 милијарди евра за периодот 2021-2027 година, „Дигитална Европа“, се надоврзува на финансирањата преку другите иницијативи на ЕУ, како „Хоризонт Европа“, „ЕУ за Здравството“, „ИнвестЕУ“, „Поврзување на Европа“ или Механизмот за обнова и отпорност.

Командантот на здружената команда на сојузничките сили во Неапол, адмирал Стјуарт Манч денеска во Касарната Илинден се обрати на петгодишнината од членството на Македонија во НАТО.

- Македонија повеќепати покажа дека е силен и способен сојузник, придонесувач не само примач, рече адмиралот додавајќи дека со декади нашите војници се дел од операциите на НАТО во Авганистан, Ирак, Косово, БиХ...

За полигонот Криволак, кажа дека станал еден од првите во Европа за воени вежби. Адмиралот Манч рече дека НАТО знае дека може да се потпре на Македонија, и Македонија знае дека може да смета на НАТО.

Адмиралот Манч обраќањето го почна со едмноминутен молк за загинатите во трагедијата во Кочани изразувајќи сочувство и поддршка.

Потсети дека Македонија го започнала патот за членство во НАТО пред 30 години и покажала определба и заложба за реформи, ги надминала пречките и тргнала кон трансформација.

Во март 2020 вашата амбиција, посочи тој, стана реалност. Денес, како што кажа, не одбележуваме само годишнина туку и што може да се постигне со споделените вредности, способности, одговорноста и посветеноста на сите членки на НАТО.

-Овој регион и нашиот свет ќе продолжи да се соочува со комплекси предизвици причинети од зголемени тензии и влијанието на оние кои сакаат да ги поткопаат нашите вредности и начинот на живот. Заедно, 32-те нации во НАТО ќе останат обединети околу предизвиците бидејќи ние знаеме дека штитејќи го мирот е витално. Мирот е најдобар начин да се осигура долготраен одржлив мир и стабилност. Мирот е основа за прогрес и просперитет за сите, рече, меѓудругото, адмиралот Манч, Командантот на здружената команда на сојузничките сили во Неапол.

На свеченоста се обратија и началникот на Генералштабот на Армијата, генерал-мајот Сашко Лафчиски, претседателката Гордана Сиљановска Давкова, министерот за одбрана Владо Мисајловски, а присуствуваа и премиерот Христијан Мицкоски, претседателот на Собранието Африм Гаши, претставници од воено–дипломатскиот кор во земјава и други гости.

Поради сообраќајната несреќа која се случила пред УСО Орце Николов сообраќајот на оваа фреквентна сообраќајница во Скопје се одвива по една лента, бидејќи лентата во која се случила сообраќајката во правец кон Центар е во прекин.

Засега нема информации за повредени лица.