Свет

Италијанските десничари потврдија: Го сакаме Берлускони за претседател на државата

Италијанските централно-десничарски партии потврдија дека сакаат Силвио Берлускони да биде следниот претседател на државата и во заедничката изјава рекоа дека ќе бараат поширока поддршка за него во парламентот.

„Лидерите на коалицијата се согласија дека Силвио Берлускони е вистинската личност за оваа висока функција во овие тешки времиња“, изјавија шефовите на десниот центар по состанокот во римската вила на Берлускони.

Левичарската италијанска демократска партија (ПД), која категорично ја отфрли можноста за поддршка на кандидатурата на Берлускони за шеф на државата, соопшти дека е разочарана и загрижена поради одлуката.

Над илјада парламентарци и регионални делегати ќе почнат да гласаат на 24 јануари, а Берлускони потенцијално му застанува на патот на премиерот Марио Драги, кој исто така се чини дека ја сака престижната позиција.

Ниту еден од двата главни блока нема доволно поддршка за да го протурка кандидатот за шеф на државата, а ПД ги повика сите партии да се обидат да постигнат консензус за личност која не предизвикува толку поделеност како 85-годишниот Берлускони.

Движењето пет ѕвезди, кое има најголем број парламентарци, повтори дека никогаш не може да го поддржи Берлускони, кој беше осуден за даночна измама и сè уште се соочува со судење поврзано со бунга-бунга на развратни забави.

„Денес е неопходно да се остави настрана партиската припадност, сите политички сили мора да се соберат околу личност која може да ги претставува Италијанците и земјата“, рече потпретседателот на движењето Марио Турко.

Централно-десниот блок ги вклучува Лигата, Италијанските браќа и партијата Напред Италија на Берлускони. Иако некои од нивните поддржувачи изразија сомневања за Берлускони, во изјавата ветија дека ќе се обидат да добијат широка поддршка за него меѓу пратениците.

Тие го повикаа и поранешниот премиер отворено да каже дека ја сака функцијата. Зад сцената, Берлускони неуморно води кампања за да ги убеди пратениците да гласаат за него. За таа цел ја мобилизирал и својата медиумска империја.

Свет

Рускиот свештеник кој држеше опело за Навални отстранет од црквата на три години

Тој ќе биде префрлен и во друг храм во Москва, каде што ќе ги извршува должностите на црковен помошник.

Рускиот православен свештеник кој во март одржа комеморација во спомен на починатиот руски опозициски лидер, Алексеј Навални е суспендиран на три години од извршувањето на неговите духовни должности, соопшти Московската епархија на Руската православна црква, цитирана од британските медиуми.

Во соопштението, кое беше објавено вчера на веб-страницата на епархијата, не е наведена причината за казната за отец, Дмитриј Сафронов, со која му се одзема правото да дава благослов и да носи расо и свештенички крст до 2027 година.

Тој ќе биде префрлен и во друг храм во Москва, каде што ќе ги извршува должностите на црковен помошник.

-По истекот на периодот на покајание (казна - забелешка изд.), врз основа на повратните информации од местото на послушанието, ќе се донесе одлука дали е можно тој да продолжи со свештеничката служба, наведуваат од епархијата.

На 26 март, Сафронов одржа комеморација на која присуствуваа илјадници луѓе за Навални, кој беше најжесток критичар на руската територија на претседателот Владимир Путин и кој почина во февруари на 47-годишна возраст во казнена колонија на Арктикот. /МИА

НБА

Тајрис Макси е играчот со најголем напредок во НБА

Како што се ближи крајот на натпреварувањето во НБА лигата, така се повеќе се зборува за индивидуалните награди. Првата веќе пристигна.

Кошаркарот на Филаделфија, Американецот Тајрис Макси е добитник на наградата за играч кој најмногу напредувал во изминатиот период, објавено е на веб-страницата на НБА.

Мекси (23) доби повеќе гласови во финалниот избор од Коби Вајт од Чикаго и Алперен Шенгун од Хјустон. Наградата се доделува од 1985 година.

Минатата сезона победник беше Лаури Марканен од Јута, а меѓу оние кои досега ја освоија оваа награда се Горан Драгиќ, Паскал Сиакам, Јанис Адетокумбо, Пол Џорџ, Трејси Мекради, Зек Рендолф, Хидает Туркоглу итн. /MИА

Фудбал

Де Бруин ќе му се придружи на Роналдо ова лето?

Манчестер Сити не успеа во мисијата да ја одбрани тројната круна.

Во четвртфиналето на Лигата на шампионите беа поразени од Реал, но затоа Сити се уште е во конкуренција за двојната круна во Англија и шестата шампионска титула во последните седум години.

Сепак, ова лето Манчестер Сити би можел да остане без својот најдобар играч Кевин де Бруин.

Фантастичниот триесет и тригодишен Белгиец под водство на Гвардиола освои се и остави голема трага во Премиер лигата.

Актуелниот договор на Де Бруин истекува во летото 2025 година, а саудиски Ал Наср сака да ја искористи таа ситуација. Белгиецот моментално вреди 60 милиони евра на пазарот, но доколку клубот на Роналдо го сака играчот на Манчестер Сити, ќе мора да плати многу поголема отштета.

Во Манчестер Сити Де Бруин заработува околу 21 милион евра по сезона. /МИА