Италија одбива да прими 180 мигранти , ги праќа во карантин на друг брод

Италија ќе премести околу 180 мигранти од спасувачкиот брод Ocean Viking во карантин на бродот Moby Zaza, откако со денови одбиваше да ги прифати, пренесува Dpa.

Преселбата на мигрантите е планирана за понеделник, откриваат извори од Министерството за внатрешни работи.

Мигрантите биле спасени во четири одделни операции. Првите две операции се спроведени минатата недела и ги спасија мигрантите кои избегаа од насилство и злоупотреба во Либија, објави СОС Медитеран.

Ситуацијата на бродот станала неподнослива, мигрантите почнале да штрајкуваат со глад и се закануваат со самоубиство, предупредува организацијата.

Ocean Viking во неколку наврати бараше од Италија и Малта да ги прифатат мигрантите, но без успех.

Во екот на пандемијата на коронавирус, двете земји веќе не дозволуваат спасените мигранти да се оддалечуваат од морето.

Откако екипажот на Ocean Viking побарал итен прием на 45 мигрантите, италијански психијатар и медијатор за култура вчера поминал неколку часови со мигрантите.

Потоа, Рим го одобри нивниот трансфер во карантин на бродот Моби Заза.

Во меѓувреме, состојбата на бродот за спасување се смирила, тврдат извори, а мигрантите денеска ќе бидат тестирани за коронавирус.

Туристичките работници повторно на протест ако не се укине одлуката за превоз на 50 проценти во автобусите

Туристичкиот сектор, еден од најпогодените од пандемијата со Ковид-19, најавува нови дејствувања и протести ширум државата, со комплетна блокада на патиштата, доколку под итно не се преземат мерки за помош.

Бараат најдоцна до 15 август да се промени одлуката за превоз на 50 проценти во автобусите и да продолжи мерката за субвенционирање на платите во овој сектор во кој спаѓаат туристичките агенции, водичите и превозниците.

Нема никаква логика, како што велат, да остане протоколот за патување со автобуси затоа што со почитување на безбедносните мерки може да се организира патување.

– Бараме под итно да се промени одлуката за превоз на 50 проценти на патници во автобусите. Ниту една земја од Балканот, па и светот нема ваков протокол, авионите летаат со комплетен и полн капацитет. Додека сите агенции во светот добија прилика колку толку да закрепнат, помогнати од државата, како нивен столб и помош, кај нас како таа да прави се за намерно да останеме на улица. Нема никаква логика да остане овој протокол кога со почитување на безбедносните мерки, може да се организира патување.Поставуваме ултиматум, најдоцна до 15-ти август да дојде до измена на оваа нелогична одлука за превозот со автобуси и да се продолжи мерката за субвенционирање на платите на нашиот сектор во кој спаѓаат туристичките агенции, водичите и превозниците, стои во соопштението од секторт туризам.

Им била ветувана помош по завршување на изборите, но, посочуваат, сега се чека да се формира Влада и така во недоглед. Реагираат на изјавата на министерот за здравство во заминување Венко Филипче кој препорачува да не се патува и посочуваат дека во таков случај државата треба да им помогне.

-Како сектор кој се уште е најзагрозен поради пандемијата, наведуваат, направивме секакви напори за да допреме до совеста и човечноста на државата, но како и пред изборите кога имаше ветувања дека веднаш ќе се преземат дејствија по нивното завршување, сега чекаме Владата да се формира и така до недоглед. Како тоа да не е доволно, министерот Венко Филипче дополнително ни ја отежна работата, која и онака е речиси непостоечка, со изјавата: Препорачувам воопшто да не се патува, граѓаните да седат дома и пожелно е границите да не се отворат. Најостро ја осудуваме оваа негова изјава и сметаме дека не само што не ни помагаат, туку дополнително ни ја отежнуваат работата. Агенциите бидејќи немаат никаква финансиска поддршка, оставени сами на себе, се обидуваат и со најмалите расположливи услови да направат каква било продажба. Доколку министерот препорачува да не се патува за да се заштитат граѓаните, тогаш државата нека помогне на овој сектор и да не заштити и нас од пропаста која веќе пристигна!, стои во соопштението од туристичкиот сектор.

Туристичките работници организираа мирен протест во центарот на Скопје на 29. минатиот месец. Повторно побараа помош и предупредија дека ако државата не реагира веднаш, секторот ќе колабира. Околу 5.000 семејства, рекоа тогаш, ќе останат без приходи и исто толку лица ќе треба да се пријават во Агенцијата за ваботување./МИА

СДСМ:Новата Влада на СДСМ ќе обезбеди прочистување на правосудството и проверка на потеклото на пари и имот на секој функционер

СДСМ води сериозни преговори за формирање на влада со полн четиригодишен мандат, која ќе обезбеди прочистување на правосудството и проверка на потеклото на пари и имот на секој функционер.

Новата влада посветено ќе се зафати со борба со криминалот и корупцијата на сите нивоа – без разлика дали некој доаѓа од партија, од општина, од институција, дали е експерт, функционер, познат или непознат.

Приоритет е прочистување на правосудството, а заедно ќе договориме и ќе воспоставиме систем за проверката на потекло на пари и капитал кај секој функционер.

Судиите и обвинителите имаат обврска да испорачаат владеење на правото во кое законот е еднаков за сите. Судиите кои застаруваат предмети ќе бидат разрешени по автоматизам. Ќе биде извршена темелна ревизија на 5% од сите судски пресуди во последните 5 години, по случаен избор.

Следува разрешница на сите предмети отворени од Специјалното јавно обвинителство.

Изминатите две и пол години ги создадовме сите услови, го донесовме Законот за јавно обвинителство, кој гарантира дека политиката не може да се меша во судските одлуки, а сите предмети за висока корупција мора да имаат судска разрешница.

Во следниот, четиригодишен мандат ќе покажеме дека можеме уште повеќе и уште подобро да работиме во интерес на граѓаните.

СДСМ

ВМРО-ДПМНЕ:Заев и СДСМ го исцицаа народот. Нивниот луксуз граѓаните го плаќаат со последниот денар

СДСМ преку РКЕ удира по џебот на граѓаните. Чекаа да поминат изборите па да ја донесат одлуката, која ја одлагаа од почетокот на јули.

СДСМ уште пред изборите тргнаа со умисла да го ограбуваат народот.

Во цела Европа цената на струјата се намалува, само во Македонија со Заев се зголемува.

За жал наместо РКЕ да се грижи сите играчи на пазарот да бидат заштитени и рамноправни меѓу себе, како што стои во Законот за енергетика, таа се грижи само за профитот на енергетските компании.

Ова резултираше со незадоволство кај граѓаните. Револтот е јасен во време на корона криза, економски колапс во најава, зголемено задолжување и осиромашување на народот, оваа одлука е само капак на сите промашувања во енергетскиот сектор го направи власта на Заев. Затоа на самопрогласените „шампиони“ во енергетиката им порачуваме: Енергетиката не се гради преку ноќ, но може лесно да се уништи преку ноќ, а за жал РКЕ и СДСМ се „експерти“ во уништување!

Центар за комуникации на ВМРО-ДПМНЕ

притисни ентер