Судот во Хаг оваа недела одржува рочишта за да утврди дали има надлежност за случајот што Иран го предаде пред МСП, тврдејќи дека санкциите на САД го нарушуваат договорот за пријателство на двете земји.

Одлуката на судиите по ова прашање ќе биде објавена подоцна.

Портпаролот на Техеран, Хамидреза Олумиазди пред судот изјави дека повторното воведување санкции претставува јасно кршење на договорот за пријателство меѓу двете земји од 1955 година, по што немаат дипломатски односи веќе 40 години.

Вашингтон, кој го поништи договорот, рече дека текстот нема никаква врска со спорот и дека Иран се повикал само за да ја утврди јурисдикцијата на МСП, највисокото судско тело на Обединетите нации.

„Американските мерки и политики на максимален притисок не ја земаат предвид самата основа на меѓународното право“, рече Олумијазди.

Санкциите создаваат „проблеми и страдања, вклучително и рекорден пад на иранската трговија, со скоро двојно зголемување на цените на храната и сериозни удари врз здравствениот систем“, додаде тој.

„Единствено што и е важно на американската администрација сега, е дали нејзините мерки ќе успеат да ја уништат иранската економија и милиони ирански животи“, продолжи Олумијазди.

САД во понеделникот побараа од МСП да го отфрлат барањето на Иран за укинување на санкциите, нарекувајќи го однесувањето на Техеран „сериозна закана“ за светската безбедност.

Претставници на Вашингтон тврдат дека МСП не е надлежен да одлучува за постапката иницирана од Иран во 2018 година по повлекувањето на Соединетите држави од меѓународниот договор за нуклеарното вооружување на Иран, придружено со повторно воспоставување еднострани строги санкции за Исламската Република.

Техеран започна со интензивирање на своите нуклеарни активности минатата година по повторното воведување на санкциите од САД.