Институтот за радиологија одбележа 75 години постоење

ЈЗУ Институт за радиологија – Скопје денеска во Музејот на македонска борба за самостојност одбележа 75 години од постоењето.

Пред присутните се обрати министерот за здравство Беким Сали, а обраќање имаше и ректорот на УКИМ, проф д-р Никола Јанкуловски, како и медицинскиот директор на Универзитетескиот институт, д-р Гордана Антулеска – Белческа.

– Токму овој Универзитетски институт е референтен центар во националната скрининг програма, организирана и спроведена од Министерството за здравство. За таа цел, оваа институција обезбедува двајца радиолози и двајца радиолошки технолози. Од Министерството за здравство ќе биде обезбеден мамограф со томосинтеза и стереотаксична биопсија, како и ултразвучен апарат за дојка, кои секако ќе се користат и за редовно закажаните пациенти преку Мој термин, со цел подигнување на нивото и квалитетот на прегледот, истакна министерот Сали.

Ректорот Јанкуловски рече дека денешниов ден претставува исклучително важен датум во календарот на историјата на македонското здравство, но и на развојот на високото образование и научната мисла во нашата држава.

– Во оваа пригода не можеме, а да не се потсетиме и на институционалните зачетоци на националниот образовен систем во Македонија, бидејќи токму Медицинскиот факултет е еден од неговите први конститутивни и најважни основни столбови. Преку постојаната комуникација со водечките европски и светски медицински факултети и универзитетски клиники, интенцијата е да се подигне квалитетот како на едукативната и научната дејност, и едновремено, перманентно да ја развиваме и усовршуваме и здравствената дејност, истакна ректорот Јанкуловски.

Медицинскиот директор на Универзитетскиот институт, д-р Антулеска – Белческа посочи дека здравствената дејност што ја вршат Медицинскиот факултет и Клиниката за радиологија е високо диференцирана и претставува столб на македонското здравство.

– Сакам во оваа прилика да изразам благодарност на сите оние кои не штедејќи се себеси се вградиле во развојот и респектабилност на оваа установа, пензионерите, кои својот работен век го посветиле на развојот на истата, имплементирајќи ги етапно процедурите, а со тоа и себе во развојот на радиологијата, придонеле таа да се вброи во редот на установи со високо реноме во земјата, но и надвор од неа. Да се заблагодарам на вработените кои секојдневно се соочуваат со проблеми од преголемиот наплив на пациенти, горда сум што сум дел од тимот, благодарност до организацискиот директор и неговата поддршка, благодарност до нашите соработници со кои долги години успешно соработуваме и заедно напредуваме, додаде д-р Антулеска – Белческа.

За историјатот на институтот зборуваше проф Д-р Миодраг Врчаковски. Меѓу присутните гости беа и пензионирани професори, специјалисти и останат медицински кадар и друг кадар кој има значаен белег во континуираниот напредок на Универзитетскиот институт за радиологија. Модератор на настанот беше Сашко Коцев.

Захарова: САД и НАТО уништуваа енергетски мрежи, потсетете се на нападите на Србија

Рускиот претседател Владимир Путин не е искрен за мировните преговори со Украина и ја носи војната на ново ниво на варварство обидувајќи се да ги изгаси светлата на цивилите, изјави вчера висок американски дипломат.

Американскиот потсекретар за политички прашања Викторија Нуланд се состана со претседателот Володимир Зеленски и други високи украински претставници во Киев за да покаже поддршка додека Русија се обидува да ја уништи енергетската инфраструктура на земјата.

„Дипломатијата очигледно е цел на сите, но мора да имате подготвен партнер“, им рече таа на новинарите. „И многу е јасно, без разлика дали станува збор за нападите врз енергетската инфраструктура, дали се работи за реториката од Кремљ и општиот став, дека Путин не е искрен или подготвен за тоа„.

Американскиот претседател Џо Бајден изјави во четвртокот дека е подготвен да разговара со Путин доколку рускиот лидер е заинтересиран да стави крај на војната. Но, идејата беше брзо закопана кога Кремљ рече дека Западот мора да ја признае анексијата на четири украински региони од Москва. Ваквата реакција на Русија, рече Нуланд, покажа „колку тие се несериозни“.

Русија агресивно ја напаѓа украинската инфраструктура за пренос на електрична енергија и греење од октомври, за која Киев и нејзините сојузници велат дека е намерна кампања против цивилите, воено злосторство.

„Путин ја однесе оваа војна на ново ниво на варварство, внесувајќи ја во секој дом на Украина додека се обидува да ги исклучи светлата и водата и да го постигне она што не можеше да го направи на бојното поле“, рече Нуланд.

Портпаролката на руското Министерство за надворешни работи Марија Захарова брзо одговори.

„Не е до Нуланд да го учи светот - САД и НАТО уништуваа енергетски мрежи“, реагира Захарова на каналот Телеграм, потсетувајќи на нападите врз Србија во 1999 година.

За време на нападот, воените авиони во Србија ја исклучија електричната енергија на повеќе од 70 отсто од областа, според НАТО. Нуланд се сретна и со Андриј Јермак, шеф на канцеларијата на Зеленски, кој изрази благодарност за помошта вредна милијарди долари од Вашингтон за Украина.

„Победата на Украина, во која сме сигурни, ќе биде наша заедничка победа“, ја цитираше неговата изјава од канцеларијата на Зеленски.

Трет дел од хитот на Марвел, трејлерот прегледан 10 милиони пати за еден ден (ВИДЕО)

По долго чекање, последното поглавје од трилогијата на Чуварите на Галаксијата е на пат да се појави во кината.

Првиот трејлер за филмот Guardians of the Galaxy Vol. 3 беше објавен вчера, по премиерата на Brazil Comic Con, а за помалку од еден ден собра над 10 милиони прегледи на YouTube. Третиот дел го означува враќањето во авантурите на група неверојатни херои кои - благодарение на водството на режисерот Џејмс Ган - станаа една од најомилените групи во филмскиот универзум на Марвел.

Трејлерот покажува висока драма меѓу галактичките авантуристи, вклучувајќи ги Старлорд (Крис Прат), Гамора (Зои Салдана), Дракс (Дејв Баутиста), Небула (Карен Гилан), Мантис (Пом Клементиеф), Грут (гласот на Вин Дизел) и Ракет Ракун (глас позајмен од Бредли Купер).

Ракет Ракун често се гледа во трејлерот, вклучително и ретроспективна сцена кога тој е многу мал вселенски ракун, кој им ветува на гледачите приказна за саканиот херој. Помалку присутна е Гамора, која преку настаните од Avengers: Endgame од 2019 година повеќе не е свесна за нејзината поврзаност со тимот.

Првите два филма од трилогијата претежно прикажуваа популарна музика од 60-тите и 70-тите, а изборот на музика во овој трејлер може да биде навестување дека саундтракот на високоочекуваниот трет дел може да биде малку посовремен, со мелодии од 80-тите и 90-тите .

Филмот пристигнува во кината на 5 мај 2023 година.

Германски амбасадор: Наскоро очекуваме нов бран бегалци од Украина

Германскиот амбасадор во Велика Британија, Мигел Бергер, денеска изјави за „Скај њуз“ дека во наредните недели очекува нов бран украински бегалци, што ќе се совпадне со ниските температури.

„Путин продолжува да го тероризира цивилното население. Ние сме многу загрижени поради тоа, бидејќи овие напади врз енергетската инфраструктура значат дека многу луѓе кои се смрзнуваат на ниски температури би можеле да бидат принудени да ја напуштат Украина“, рече Бергер, додавајќи дека очекува „нова бран на бегалци“ како резултат на тоа.

Снег веќе падна во голем број украински градови, вклучувајќи го и главниот град Киев, а жителите се борат со ниските температури и руските напади врз енергетската инфраструктура, што предизвикуваат периодични прекини на струјата, водата и греењето. Од почетокот на војната, стотици илјади украински бегалци избегаа во Германија.

Во однос на дипломатијата, Бергер вели дека Германија не гледа суштинска промена во позицијата на Русија, што не го прави оптимист за преговорите меѓу Москва и Киев: „Не само што не гледаме суштинска промена во позицијата на Русија, туку и нема подготвеност за дипломатско решавање на конфликтот“.

притисни ентер