Вчера Јусаф ги победи двајцата ривали од СНП и ја освои највисоката позиција во партијата.
Тој ја презема партијата со главна цел - да внесе нов живот во препознатливата политика на СНП, независност на Шкотска од Обединетото Кралство. 37-годишникот ќе биде најмладиот премиер од формирањето на шкотскиот парламент во 1999 година и првиот лидер на национална партија во Обединетото Кралство од етничко малцинство.
Јусаф, секретар за здравство во заминување на Шкотска, освои 52,1 отсто од гласовите на изборите, додека неговиот главен ривал, министерката за финансии во заминување Кејт Форбс, освои 47,9 отсто од гласовите. Тој е исто така вториот муслиман кој води политичка партија во Обединетото Кралство, по лидерот на шкотските лабуристи Анас Сарвар.
Тоа е кулминација на речиси метеорскиот раст на политичарот роден во Глазгов, во пакистанско семејство. Неговиот татко и дедо емигрирале од Пакистан во 60-тите години на минатиот век. Како член на СНП, Јусаф првпат бил избран во шкотскиот парламент во 2011 година, како 26-годишен. Тој тогаш беше најмладиот претставник во историјата на шкотскиот парламент.
Беше на важни функции, од министер за правда до министер за здравство и не беше поштеден од остри критики. По победата на партијата, тој рече дека „како лидер на СНП, партијата во која се приклучи пред речиси 20 години и која толку многу ја сака, се чувствува како најсреќниот човек на светот“.
„Служењето на мојата земја како премиер ќе биде најголемата привилегија и чест во мојот живот“, рече тој. Откако победи со само 51.000 гласови од членовите на партијата, тој вети дека ќе биде „премиер на цела Шкотска“. Јусаф е муслиман и активно ја живее својата вера. По победата тој нагласи и дека „бојата на кожата и религијата не се пречка за водење на државата која сите ја нарекуваме наша татковина“.
Тој, исто така, рече дека ќе „влезе во петта брзина“ за да постигне независност на Шкотска. „Ние ќе бидеме генерацијата што ќе постигне независност на Шкотска“, рече тој. По потврдувањето во Парламентот, тој утре ќе положи заклетва како премиер на Шкотска. Партиската кампања ја одбележаа лични напади на тројцата кандидати.
Единството на СНП, кое отсекогаш беше најсилното оружје на партијата, беше поткопано од несогласувањето околу тоа како да се спроведе вториот референдум за независност на Шкотска и социјалните реформи, вклучувајќи ги и правата на трансродовите. Во меѓувреме, поддршката за независноста на Шкотска опадна.
Според последните анкети, околу 45 отсто од Шкотите ја поддржуваат идејата. Ова е иста бројка забележана на референдумот во 2014 година, кога мнозинството сè уште беше за останување во Обединетото Кралство. Јусаф најави продолжување на политиката и сака да организира втор референдум.
Но, највисокиот суд на Обединетото Кралство (Велика Британија) на крајот на минатата година пресуди дека шкотскиот парламент не може да одобри втор референдум за независност без согласност на Вестминстер.