Груби: Владата уште денеска може до Собранието да ги достави францускиот предлог

Собранието ќе одлучува за францускиот предлог и ќе ја задолжи Владата за следните активности во однос на целиот пакет.

Првиот вицепремиер и министер за политички систем и односи со заедниците Артан Груби изјави дека е можно уште денеска Владата до Собранието да ги проследи францускиот предлог за деблокада на европскиот пат на земјава, заедно со билатералниот протокол со Бугарија и другите придружни документи.

– Владата нема да одлучува за францускиот предлог, туку само ќе ги проследи до Собранието. Владата нема да одлучи по однос на овие прашања без тие документи да дојдат во Собранието, да се усогласат и Собранието да ја заложи Владата да постапува по однос на тие документи, рече Груби.

Ние, потенцира тој, како владејачко мнозинство сметаме дека сите документи кои што се доставени од Брисел и сите билатерални документи кои што се усогласуваат со Софија треба да се поднесат во Собранието каде што парламентарните политички партии треба да отвораат конструктивен дијалог и да одлучуваат по овие документи и потоа да ја заложат Владата со заклучоци по однос на информацијата што ќе ја добијат да постапува. Груби посочи дека во заклучоците стриктно се забранува на оваа и на било која идна влада да донесе било каква одлука и да преговара по било какви услови по однос на историските, културните, јазичните особености на македонскиот народ, но и на сите други заедници во Република Северна Македонија.

Тој рече дека во францускиот предлог не е содржан билатералниот протоколот со Бугарија и дека преговарачката рамка не задира во македонскиот идентитет и јазик и културна посебност. Посочи дека протоколот не е потпишан, туку е усогласуван веќе подолго време и тоа откако е потпишан Договорот за добрососедство на 1 август 2017 година.

– Јас нема да гласам за нешто што би го спорел македонскиот идентитет, култура, јазик, историска особеност. Јас ќе бидам првиот што ќе биде против и убеден сум дека ниту СДСМ, ниту премиерот Ковачевски ќе дозволи да се усвојува било каков документ во било кое време во кој што се спори македонската особеност и во кои што има било какви елементи кои што ја ризикуваат оваа особеност. И знам дека никогаш ниту Ковачевски, ниту било кој друг министер од Владата би донел одлука која што е во спротивност на интересите на Македонците, на Албанците и на другите заедници и на Македонија како држава, рече Груби.

Во однос на инцидентите на вчерашните протести, Груби упати апел до институциите да постапат веднаш кон сите кои што се огрешиле кон законот.

– Тоа што се случи вчера е апсолутно за секоја осуда, неприфатливо и наликува на сценарио помеѓу ВМРО-ДПМНЕ, Левица и Алијанса за Албанците. Овие се последици од таа коалиција од 5 ноември минатата година токму тука во Собранието за време на тој состанок. Ги повикувам институциите, а посебно Министерството за внатрешни работи и Јавното обвинителство да постапуваат ревносно и веднаш по однос на сите овие инциденти кои што се случуваат деновиве и кои што се испровоцирани од странски агенти кои функционираат во Република Северна Макеоднија и наликуваат на сценаријата во Црна Гора против членството на таа земја во НАТО. Гледаме дека се мобилизираат неколку стотина луѓе кои што го киднапираат легитимното право на протест на искрени граѓани кои се загрижени по однос на нашата заедничка држава, намерно за да испровоцираат инциденти и за да ја оттргнат нашата држава од патот кон Европската унија. Тоа не е целта на сите тие граѓани кои што протестираат, туку само на стотици кои се инструментализирани, инструирани од странски агенти за да го направат истото како што го направија на 27 април, рече Груби.

Двегодишно девојче од Турција гризнало змија, животното ѝ вратило (ВИДЕО)

На истокот на Турција, во село во близина на градот Бингол, змија каснала двегодишно девојче, по што детето ја каснало змијата, пишуваат турските медиуми.

Девојчето е пренесено во болница и е во добра состојба.

Таткото на девојчето за локалните медиуми изјавил дека инцидентот се случил во дворот на семејната куќа.

„Додека бев на работа ми се јавија и ми рекоа дека моето дете го каснало змија. За среќа, додека стигнав детето веќе беше пренесено во болница. Како што ми кажаа соседите, детето ја држело змијата во рака и си играла со неа кога го каснала.Им благодарам на моите соседи и Господ нека ги благослови“, изјавил таткото Мехмет Еркан.

Соседот кој го видел малото девојче како ја гризе змијата го оддалечил животното од двегодишното дете и повикал помош. Змијата ја каснала за долната усна.

"Лекарите ми рекоа дека наодите се чисти и дека таа треба да биде под опсервација 24 часа. Би ги повикал родителите да внимаваат на своите деца. Секогаш внимавајте на нив", рекол таткото на девојчето.

Инцидентот се случил минатата среда.

На изборите во Бразил на Болсонаро ќе му се спротистави претходникот, излезен од затвор

Изборната трка за бразилски претседател, официјално започнува денеска, а ќе ја одбележи борбата меѓу актуелниот Жаир Болсонаро и поранешниот левичарски претседател Луис Инасио Лула да Силва.

Главните кандидати, Болсонаро и Лула, кои всушност водат кампања со месеци, на настани како дел од кампањата, ќе ги покажат своите сосема спротивни стилови. Болсонаро (67) планира да ја започне својата кампања со митинг во Јуиз де Фора, малиот југоисточен град каде што беше избоден и за малку убиен од напаѓач за време на неговата кампања во 2018 година.

Нападот го зацементира имиџот на Болсонаро меѓу поддржувачите како борец против политичкиот естаблишмент. Неговиот имиџ е нарушен од серија кризи што го погодија Бразил - од пандемијата на „Ковид-19“ до зголемената инфлација.

Лула (76), кој води во анкетите, ќе ја започне својата кампања со посета на фабриката на Фолксваген во Сао Бернардо до Кампо, во индустриското срце на државата Сао Паоло, каде што ја започна својата политичка кариера како синдикален лидер.

Двата настани се полни со симболика, рече политичкиот аналитичар Адријано Лаурено, кој ја нарече трката „најполаризирачки претседателски избори од враќањето на демократијата“ во Бразил кон крајот на 1980-тите.

„Болсонаро се обиде да изгради божествено избран наратив за неговото претседателствување во која преживувањето откако беше прободен одигра централна улога“, рече Лаурено од консултантската компанија „Проспектива“.

„Лула секогаш се обидува да се врати во Сао Бернардо во клучните моменти од неговата политичка кариера, претставувајќи се себеси како човек на народот“, изјави тој за АФП. Според последната анкета на Институтот „Ипек“, објавена вчера, Лула моментално води со 44 отсто од гласовите, додека Болсонаро може да смета на 32 отсто од гласовите.

Доколку ниту еден кандидат не освои повеќе од 50 отсто од важечките гласови на изборите на 2 октомври, вториот круг ќе се одржи на 30 октомври.

Од март минатата година изборот се сведе на Болсонаро и Лула откако Врховниот суд ја укина пресудата за корупција против Лула, поради што тој заврши во затвор и ја напушти политиката. Лула беше уапсен како дел од операцијата „Car Wash“, масовна истрага за системска корупција околу државната нафтена компанија „Петробрас“.

Лула, претседател од 2003 до 2010 година, ја напушти функцијата како најпопуларен претседател во историјата на Бразил, а неговиот мандат доживеа економски бум кој извлече 30 милиони луѓе од сиромаштија.

Болсонаро смета на нова голема програма за благосостојба за да ја зголеми својата популарност и да го намали јазот со Лула. Сè уште е рано за целосниот ефект на програмата да се види на анкетите. Многу Бразилци стравуваат дека доколку Болсонаро загуби, ќе ги следи стапките на неговиот политички модел, поранешниот американски претседател Доналд Трамп, кој не ги признава резултатите од претседателските избори во САД.

Болсонаро, кој редовно тврди дека има измами во електронскиот систем на гласање во Бразил, сака да каже дека „само Бог“ може да го отстрани од функцијата.

Откриена е неверојатна молекула, уништува 300 бактерии отпорни на антибиотици

Бактериите со текот на времето стануваат сè поотпорни на антибиотици, што им предизвикува проблем на многу научници и здравствени организации.

Имено, современата медицина се соочува со проблемот на развој на бактерии отпорни на сите постоечки лекови, вклучувајќи ги и оние кои се сметаат за последна линија на одбраната.

Но, неодамна научниците пронајдоа молекула која може ефикасно да ги контролира бактериите отпорни на сите видови антибиотици. Станува збор за соединение наречено фабимицин, кое доколку ги помине клиничките тестови (тестови на луѓе), би можело да се користи во борбата против некои од најупорните инфекции.

Новиот потенцијален третман ги таргетира грам-негативните бактерии, група на патогени кои тешко се уништуваат и кои најчесто се причина за инфекции на уринарниот тракт, пневмонија, па дури и крвотокот, пишува Science Alert.

Овие типови на бактерии се отпорни на антибиотици поради заштитната надворешна мембрана која создава еден вид ѕид кој не дозволува да минуваат супстанции штетни за нив. Според истражувањето објавено во 2022 година во „Лансет“, отпорноста на бактериите на антибиотици секојдневно одзема околу 3.500 животи, што ја прави водечка причина за смрт во светот.

Студијата спроведена во англиска болница имала слични обесхрабрувачки резултати, кои покажале дека повеќе од една третина од луѓето со инфекции на крвта со грам-негативни бактерии починале во рок од една година.

Во текот на истражувањето, Фабимицин успеал да го пробие тој проблематичен надворешен слој, притоа не предизвикувајќи премногу штета на здравите бактерии, односно бактериите кои ни се потребни.

Научниците прво анализирале антибиотик за кој било познато дека е ефикасен против грам-позитивни бактерии и направиле неколку структурни промени во него за да ѝ дадат на молекулата способност да се инфилтрира низ моќната одбрана на грам-негативните соеви.

Кога се тестирало во лабораторија и на глувци, ова соединение било ефикасно против повеќе од 300 видови бактерии отпорни на лекови. Згора на тоа, кај глувците со пневмонија или инфекции на уринарниот тракт, тоа дури и ги намалило нивоата на штетни бактерии.

„Со оглед на ветувачката активност на фабимицинот кај моделите на инфекција на глувци и охрабрувачките податоци дека фабимицинот е драматично постабилен во плазмата на стаорци и луѓе, разумно е да се верува дека неговата ефикасност може да се подобри при лекување на повисоки организми“, пишуваат експертите.

Откривањето на антибиотици кои би можеле да делуваат против грам-негативни бактерии не е нешто што се случува секој ден, така што биосинтезата на фабимицин е всушност многу значаен чекор. Како што поминува времето, сè повеќе разбираме како функционираат грам-негативните бактерии и ни е појасно на кои начини можеме да ги потиснеме.

Се разбира, ќе биде потребно време пред фабимицинот да се користи како лек. За да биде одобрен, лекот мора да помине низ три фази на клинички испитувања. Во првата фаза учествуваат помал број субјекти, обично помеѓу 20 и 100 (или поретко неколку стотици) и таа одредува прелиминарна проценка за безбедноста и ефективноста на лекот.

Во втората фаза, ефективноста се тестира на поголем број субјекти, обично помеѓу 50 и 300 и се анализираат различни начини на администрирање на дозите. Во третата фаза учествуваат најголем број учесници - од стотици до десетици илјади; во зависност од болеста за која се развива лекот или вакцината. Во овој момент, конкретен кандидат се споредува со плацебо за да се тестира вистинскиот успех на развиениот лек, а безбедноста дополнително се тестира и се утврдуваат несаканите ефекти.

Истражувањето, насловено како An Iterative Approach Guides Discovery of the FabI Inhibitor Fabimycin, a Late-Stage Antibiotic Candidate with In Vivo Efficacy against Drug-Resistant Gram-Negative Infections е објавено во списанието ACS Central Science.

притисни ентер