Македонија

Грчки медиуми: Европските дипломати се повеќе за зајакнување на македонско-грчката граница

Додека Македонија гради втора ограда на границата со Грција, европските дипломати, како австрискиот министер за надворешни работи Себастијан Курц, отворено зборуваат во корист на утврдување „европска одбранбена линија“ против мигрантите во Македонија, пишува денеска „Катимерини“.

Една од главните вести во Грција денеска е вчерашната изјава на Курц во интервјуто за српската агенција Танјуг, за испраќање на војници на македонско-грчката граница.

Во интервјуто, Курц истакна дека на Австрија и понатаму и е потребен ефикасен, сеопфатен, а во исто време флексибилен систем за гранично управување, како и блиска соработка со соседните земји и засегнатите земји долж балканската рута.

- Србија досега во бегалската криза имаше многу позитивна улога. ЕУ не смее Србија или Македонија да ги остави сами. Се надевам дека наскоро повторно ќе успееме да ги обезбедиме надворешните граници на ЕУ и оти Грција ќе дозволи да и помогнеме во тоа. Поради тоа го поддржувам предлогот на министерот за одбрана на Австрија Ханс Петер Доскоцил, на надворешните граници на ЕУ, или во Македонија и Србија да се испратат припадници на армијата, истакна Курц во интервјуто за Танјуг.

„Катимерини“ коментира дека Курц е на турнеја низ Западен Балкан, во чии рамките ќе ја посети и Македонија, токму „со цел да ја промовира оваа конкретна идеја“. „Етнос“ пак, пренесува дека Курц напишал статус на Фејсбук во кој, наводно, вели дека „Австрија нема да ја чека Грција, туку ќе се обиде да најде решение со Македонија за да се запрат бегалците“.

Во исто време, официјална Атина тврди дека ја зајакнала контролата на протокот на бегалците при што се приведени повеќе стотици илегални мигранти.

„Етнос“ јавува дека само вчера, од Македонија се вратени три автобуси со бегалци кои од Идомени ќе се вратат кон Атина. „Во исто време, Австрија продолжува да враќа се повеќе и повеќе илегални мигранти во Словенија, кои сега по обратен пат се очекува повторно да пристигнат во Грција“, пишува весникот. /МИА

Свет

Десет загинати во судар во воздух и уривање на два малезиски воени хеликоптери

Воената морнарица на Малезија соопшти дека два воени хеликоптери се судриле и се урнале за време на денешните вежби, при што загинале 10 лица во него.

Хеликоптерите биле на обука во поморска база во државата Перак за прославата на 90-годишнината од морнарицата, што ќе се одржи во мај, пишуваат француските медиуми.

„На лице место беше потврдено дека сите се мртви“, соопшти морнарицата, додавајќи дека посмртните останки се испратени во болница за идентификација.

Според снимките објавени на социјалните мрежи, едниот хеликоптер го фатил роторот на другиот, а потоа и двата се урнале.

Инцидентот се случил во 9:30 часот по локално време во градот Лумут, каде се наоѓа поморската база, јави Би-Би-Си.

Надлежните наведуваат дека ќе формираат комисија која ќе ги истражи причините за несреќата./МИА

Живот

Европа лани претрпе рекорден број денови со „екстремен топлотен стрес“

Европа се повеќе се соочува со интензивна топлина што човечкото тело не може да ја поднесе, предупредуваат набљудувачите на климата.

Континентот претрпе рекорден број денови на „екстремен топлотен стрес“ во 2023 година, објавија вчера службата за мониторинг на климата на Европската унија - Коперник и Светската метеоролошка организација (WМО).

Во својот последен извештај, Коперник и WМО ги забележаа минатогодишните екстремни услови, вклучително и топлотниот бран во јули кој турна 41 процент од јужна Европа во сериозен, многу тежок или екстремен топлотен стрес - најголемата област на Европа под такви услови во било кој ден на мерење.

Континентот претрпе и катастрофални поплави, големи суши, силни бури и најголеми шумски пожари досега.

-Гледаме тренд на зголемување на бројот на денови на топлотен стрес низ Европа и 2023 година не беше исклучок, при што Европа забележа рекорден број денови на екстремен топлотен стрес, изјави Ребека Емертон, климатска научничка во Коперник.

За нивната најнова студија, Коперник и WMO го користеа универзалниот индекс на топлинска клима, што го мери ефектот на животната средина врз човечкото тело.

Индексот ги зема предвид не само високите температури, туку и влажноста, брзината на ветерот, сончевата светлина и топлината што ја испушта околината.

Тој има 10 различни категории на топлотен и студен стрес, при што единиците степени Целзиусови ја претставуваат „чувствената“ температура.

Делови од Шпанија, Франција, Италија и Грција доживеале дури 10 дена екстремен топлотен стрес во 2023 година, дефиниран како температура што „се чувствува“ како да е поголема од 46 степени Целзиусови, во кој момент мора да се преземат итни мерки за да се избегне услови како што е топлотен удар.

Екстремната топлина претставува особен ризик за луѓето кои работат на отворено, постарите лица и оние со медицински состојби како што се кардиоваскуларни болести и дијабетес.

Делови од Италија забележаа седум проценти повеќе смртни случаи од вообичаено минатиот јули. Еден 44-годишен маж кој сликал ознаки на патишта во северниот град Лоди е меѓу оние кои загинале откако колабирал на работното место.

-Гледаме зголемена смртност кога ќе видиме екстремни топлотни бранови како оној во 2023 година, изјави Алваро Силва, климатолог во WMO.

„Ова зголемување на смртноста... влијае на (огромното) мнозинство европски региони. Ова е голема грижа“.

Смртните случаи поврзани со жештините во Европа се зголемени за околу 30 отсто во текот на изминатите 20 години, се наведува во извештајот.

За светот како целина, минатиот месец беше најтоплиот март досега, одбележувајќи го 10-тиот месец по ред на рекордна топлина, бидејќи емисиите на стакленички гасови, главно од фосилните горива, продолжија да ги зголемуваат температурите.

Температурата на површината на светските океани, кои апсорбираат 90 отсто од вишокот топлина произведена од емисиите, исто така, достигна ново високо ниво, наведува Европската агенција за следење на климата.

Во нивниот последен извештај, научниците предупредија дека Европа се загрева двојно побрзо од глобалниот просек и дека топлотните бранови најверојатно ќе станат подолги и посилни во иднина.

„Тековните интервенции на топлотниот бран наскоро ќе бидат недоволни за да се справиме со очекуваниот здравствен товар поврзан со топлината“, се наведува во извештајот, истакнувајќи дека населението во Европа старее и исто така станува поурбано.

Ал Џезира Балкан

Свет

Видео: Во руски ракатен напад урната ТВ кулата во украинскиот град Харков

Телевизиска кула, висока 240 метри, во украинскиот град Харков вчера се преполови и се урна на земја по рускиот ракетен напад врз телевизиската инфраструктура, соопштија локалните власти,.

Во прекин е емитувањето на ТВ сигналот во вториот по големина украински град, што во последните неколку недели беше цел на серија руски напади со ракети и беспилотни летала.

-Во моментов има прекин во дигиталниот телевизиски сигнал, изјави регионалниот гувернер Олех Синијехубов. Тој додаде дека нема жртви бидејќи работниците биле во засолниште.

На снимката од местото на настанот се гледа како главниот столб на кулата се крши и паѓа додека облак чад се крева на небото.

Од снимката не е јасно што ја погодило кулата, но властите во Харков рекоа дека Русија најверојатно во нападот користела крстосувачка ракета „Кх-59“.

Русија првпат ја нападна телевизиската кула во Харков на почетокот на март 2022 година, непосредно по почетокот на инвазијата врз Украина. Сигналот, и тогаш, беше во прекин. /МИА

притисни ентер