Член на извршниот одбор на Друштвото за Македонско-Јапонско пријателство и соработка и претседател на АОТС Македонија и АОТС Европа, Горан Антевски по повод одбележувањето на 35 години од постоењето на ова друштво, беше гостин во утринската програма на телевизија Канал 5 и ексклузивно одговори на неколку прашања за нашиот портал.
Фото: Друштвото за Македонско-Јапонско пријателство и соработка
Скромен почеток, а потоа дочекаа 35 години
Не заинтересира како дошло до идејата за формирање на вакво друштво, а Горан ни објасни дека почетоците биле навистина скромни.
- Формирањето на Друштвото за македонско-јапонско пријателство на 26 Април 1990 година пред точно 35 години произлезе од искрена желба да се изградат мостови на разбирање, културна размена и соработка меѓу Македонија и Јапонија. Во тоа време, вакви иницијативи беа ретки, но група ентузијасти, интелектуалци , спортисти и пријатели на јапонската култура препознаа потенцијал за создавање платформа што ќе ги поврзе двата народа. Почетоците се скромни,но полни со ентузијазам – организиравме предавања, мали изложби, јазични курсеви, и од таму сè почна да се развива. Подоцна друштвото активно учествува во започнување на Дипломатската активност помеѓу Македонија и Јапонија, и до ден денес е еден од чинителите на зближување и добра соработка помеѓу двете држави. Како прв претседател е избран Коста Балабанов кои многу години успешно го водеше друштвото, а воедно и беше почесен конзул на Јапонија во Македонија - Антевски ни рече.
Фото: Друштвото за Македонско-Јапонско пријателство и соработка
Првите проекти на ова здружение се покажале како многу успешни, а интересот на јавноста бил голем и покрај скромните ресурси.
- Првите проекти беа насочени кон запознавање на македонската јавност со богатата јапонска култура. Организирани се јазични курсеви за учење на Јапонскиот јазик , проекции на јапонски филмови, работилници за оригами и калиграфија, како и на изложби на традиционални јапонски предмети , слики , бонсаи и др. Иако ресурсите беа ограничени, интересот беше голем. Секоја активност будеше љубопитност и почит, што дополнително ја засили нашата мотивација да продолжиме и развиваме активноста на ова друштво- изјави тој за портал Канал 5.
Со помош на ова друштво, многу деца научија јазик и отидоа да студираат во Јапонија
Не’ интересираше и колку проекти успешно се реализирани благодарение на Друштвото за Македонско-Јапонско пријателство и соработка.
- Во изминатите 35 години реализиравме повеќе проекти, од мали културни настани до големиедукативни иницијативи. Многу од нив беа во соработка со јапонската амбасада, универзитети, НВО-секторот и локални институции. Особено сме горди на 5 годишното училиште за учење на јапонскиотјазик низ кое поминаа многу ученици од кој дел го продолжија своето студирање во Јапонија , организирање на изложбите , работилниците за оригами и јапонската уметност, како и долгогодишното издавање на весникот АКЕБОНО – Мугри кое се издаваше во над 2.000 тираж. Денес го активираме и првото дигитално издание на обновеното Акебоно и се надеваме дека ќе го зголемиме интересот кон Јапонската култура и традиција- одговори Антевски
Фото: Друштвото за Македонско-Јапонско пријателство и соработка
„Јапонија е долгогодишен пријател на Македонија“
- Јапонија е долгогодишен пријател на Македонија и е една од земјите кои најмногу имаат вложено финансиски средства за помош на Македонија и тоа повеќе од 700 милиона евра во изминатите години, најповеќе во инфраструктурни, но и во културни и спортски проекти во кој нашето друштво активно учествува. Таа помага во неколку насоки – културна дипломатија, едукација, и хуманитарни донаци , благодарение на Јапонија, многу основни училишта, здравствени установи и локални заедници добија поддршка , било во форма на опрема, обука или финансиска помош. Но можеби највредна е нематеријалната помош – инспирацијата од јапонските вредности: дисциплина, иновација, почит и одржлив развој- изјави то тој за нашиот портал.
Фото: Друштвото за Македонско-Јапонско пријателство и соработка
Знаеме дека за една ваква организација е многу важна и поддршката од институциите, па го запрашавме господинот Антевски каква поддршка добива од нашите – државни институции.
- Организацијата е активна нај повеќе благодарение на нас ентузијастите кои имале и имаат соработка со Јапонија, секако со голема помош и на Јапонската Влада и Амбасада, како и Македонските компании кои имаат соработка со Јапонија. Поддршката од домашните институции е присутна, иако секогаш има простор за унапредување. Министерството за култура, Министерството за образование и општините со кои соработуваме често покажуваат интерес и поддршка, особено кога станува збор за културни манифестации и едукативни програми - изјави тој и додаде дека верува дека со заеднички напори може уште повеќе да се продлабочи соработката.
И за крај, потврди нам сè она што сме и очекувале од една ваква успешна организација, а тоа е поглед во иднината која е позитивна и полна со нови можности и идеи.
- Нашите идни цели се амбициозни, но реални. Планираме да ја зголемиме видливоста на јапонската култура во Македонија, да иницираме повеќе програми за млади и размена на знаење, како и да продолжиме да посредуваме во проекти што носат конкретни придобивки за нашата заедница. Би сакале да воспоставиме и посистемска соработка со јапонски универзитети и бизниси, што би можело да донесе нови можности за образовна и економска соработка- заклучи Горан Антевски."