Македонија

Ѓоргиев: Улогата на Бугарија во 1941 не може да се дефинира поинаку, освен како окупатор

Првиот човек од македонскиот тим историчари во мешовитата Комисија Драги Ѓоргиев, не сака да ги коментира ставовите на премиерот Заев во вчерашното интервју.

Во разговор за Канал 5 вели - тоа се лични позиции на политичар, чија цел веројатно била да покрене некакви иницијативи во двете општества. Сепак, за Ѓоргиев улогата на Бугарија во Втората Светска Војна е јасна и таа не била само од административен карактер.

-Ставот на Комисијата за присуството на бугарската војска овде е окупација. Бугарија влегува како окупатор, влегува со воена сила и окупира делови од кралството Југославија. Не може поинаку да се дефинира освен како окупација. Секоја сила нели носи и своја администрација, но самиот чин на тогашната бугарска држава не може да се дефинира поинаку., вели за Канал 5, Драги Ѓоргиев, копретседател со мешовитата комисија за историја

Во однос на терминот „заедничка историја“ со Бугарија, Ѓоргиев вели дека е поим кој што бара и повеќе време и повеќе простор да се образложи. Смета дека историјата на Балканот знаела да биде и испреплетена и заедничка, но дека не може да се прифатат интерпретации дека под заедничка историја се подразбира само постоење на една бугарска нација до 1944-тата.

-Таквото толкување е неиздржано. Процесите, настаните и фактите ни дозволуваат ние да се препознаеме како посебна нација и народ, чиј процес на формриање почнува во втора половина на 19 век. Имаме личности и настани со кои може да се препознае нашата историја, додава Ѓоргиев.

Вчера двајца членови на Комисијата за историски прашања, Љубица Спасковска и Огнен Вангелов на Фејсбук се оградија од дел од ставовите на Заев, со порака политичарите да не коментираат теми што не ги разбираат. Ѓоргиев вели како Комисијата го чувствуваат притисокот на јавноста во пресрет на новата рунда разговори со бугарските колеги следната недела, но дека немаат намера да отстапат од историските факти.

Регион

За европските избори во Хрватска пријавени 25 листи

Хрватската Државна изборна комисија (ДИК) доби 25 кандидатски листи за европските избори во Хрватска, што е за осум помалку од 2019 година, јави Хина.

На 9 јуни во Хрватска ќе се одржат избори за Европскиот парламент, а на нив треба да се изберат 12 европратеници со мандат од пет години.

Со предавањето на списокот се означува и официјалниот почеток на изборната кампања, што ќе трае до 7 јуни, кога почнува изборниот молк.

Листата на ХДЗ ја предводи премиерот Андреј Пленковиќ, Божо Петров ќе биде на чело на листата на Мост, Иван Пенава на Татковинското движење ( Домовински покрет), додека листата на коалицијата собрана околу СДП ќе ја предводи Билјана Борзан.

Јунските избори за Европскиот парламент ќе бидат четврти по ред од влезот на Хрватска во Европската унија, при што првата постава на хрватски европратеници избрана во 2013 година имаше мандат од само една година, бидејќи веќе следната година се одржаа редовни европски избори.

Европските избори во Хрватска се втор изборен циклус годинава во земјата, по парламентарните избори одржани на 17 април, а на крајот на годината ќе се одржат и претседателските избори. /МИА

Свет

Германија наскоро ќе ја продолжи соработката со УНРВА

УНРВА - главниот обезбедувач на хуманитарни услуги во Газа - се соочи со голема криза .

Германската влада планира да ја продолжи соработката со Агенцијата на ОН за помош и работа за палестинските бегалци на Блискиот Исток (УНРВА) во Појасот Газа во блиска иднина, соопштија денеска германското Министерство за надворешни работи и Сојузното Министерство за економска соработка и развој.

УНРВА - главниот обезбедувач на хуманитарни услуги во Газа - се соочи со голема криза откако Израел обвини десетина нејзини вработени дека се вклучени во нападите на 7 октомври во кои загинаа околу 1.200 луѓе.

Неколку вработени беа отпуштени поради обвинувањата. Во деновите и неделите што следеа, 16 земји донатори - вклучувајќи ги и двата најголеми донатори, Соединетите Американски Држави и Германија - го суспендираа или паузираа финансирањето, оставајќи го со финансиска празнина од околу 450 милиони американски долари.

Откако се појавија наводите, генералниот секретар на ОН, Антонио Гутереш вети сеопфатен преглед.

Експертите задолжени за истрага на неутралноста на ОН во светлината на наводите дека вработени на ОН биле вмешани во нападите врз Израел на 7 октомври денеска препорачаа заострување на заштитните мерки во „осум критични области“.

Во исто време, во нивниот извештај се вели и дека Израел досега не доставил докази дека одредени вработени биле членови на терористички организации.

Независната група, предводена од поранешната француска министерка за надворешни работи Катрин Колона, беше формирана на почетокот на февруари. /MИА

Шоу биз

Фестивалот „Коачела“ казнет со 28.000 долари поради Лана Дел Реј

Популарниот музички фестивал, на којшто настапија светски ѕвезди како Шакира, Доџа Кет и „Ноу даут“, „Коачела“ (Coachella) заврши, но една од изведувачките ги прекрши правилата.

Се работи за американската поп-пејачка Лана Дел Реј, поради која организаторите на фестивалот ќе треба да платат казна од 28.000 долари... Имено, пејачката настапила 13 минути подолго од предвиденото и со тоа го прекршила договорот што организаторите го имаат со Градот Индио, каде што се одржува фестивалот, пишува „Ти-ем-зи“ (TMZ).

На фестивалот, имено, му се наплаќа дневна казна од 20.000 долари за првите пет минути од пречекорувањето на времето и дополнителни 1.000 долари за секоја минута потоа. /МИА