Во Париз демонстрантите започнаа прошетка со синдикатите кои ја водеа поворката носејќи голем транспарент со натпис „Велиме НЕ за пензиските реформи и подолг работен век“. Тој транспарент беше и на првата голема средба одржана на 19 јануари.
На првиот голем митинг против непопуларната пензиска реформа, повеќе од милион луѓе се собраа ширум Франција, пренесе агенцијата Франс прес.
Синдикатите, како и опозициските партии, левицата и екстремната десница, го отфрлаат предлогот да се пензионира на 64, наместо на 62 години.
Претседателите на двата најголеми синдикати CFDT и CGT, Лоран Бергер и Филип Мартинез, очекуваат дека денеска ќе има повеќе луѓе отколку на 19 јануари.
На состанокот во Париз има и политички фигури на левицата кои се многу познати во Франција, меѓу кои и комунистката Фабиен Русел, членовите на левичарската партија Неосвоена Франција, Франсоа Руфин и Клементин Отен, социјалистот Оливие Фор и Ана Идалго која е градоначалничка на Париз.
На протестот се и членови на еколошки партии.
Според француската онлајн телевизија BFMTV, околу 19 отсто од вработените во јавните служби штрајкуваат.
Таа телевизија објави дека неколку лица се приведени во Париз поради обид за оштетување на фасада на банка. Се додава дека од утрово во главниот град има превентивни проверки на граѓаните за да не се наруши јавниот ред и мир.
Весникот Ouest France објави дека многу училишта денеска се затворени и дека многу ученици сè уште оделе на училиште за да ги поддржат своите професори и наставници кои штрајкуваат.
Собирите се големи и во другите градови. Околу 28.000 луѓе излегоа на улиците во Нант, а околу 100.000 луѓе во целата област Нормандија, објавија локалните медиуми.
Сообраќајот, особено железничкиот и јавниот превоз денеска беше во прекин низ целата држава.
Француските железници предупредија дека некои возови на долги релации ќе сообраќаат со намален обем или ќе бидат целосно суспендирани.
Француската премиерка Елизабет Борн неодамна изјави дека нема да има преговори за поместување на старосната граница за пензионирање.
Предлог-законот за пензиските реформи пристигна вчера во парламентот, каде прво се разгледува на комисија. Поднесени се над 7.000 амандмани, главно од левицата.