Собранието процедурално е подготвено во секое време да ја почне постапката за уставни измени, вели собранискиот спикер Африм Гаши, но според него, за тоа потребни се политичка волја и договор за да не се почне со нешто, како што рече, што нема да успее. На денешниот брифинг со новинарите посочи дека се надева на политички консензус што поскоро, без да прецизира како тој би се постигнал.
– Собранието во смисла на процедурата е подготвено во секое време тоа да го отпочне. Но, за да се отпочне тој процес треба политичка волја и договор за да имаме јасна перцепција, за да не почнеме нешто што нема да ни успее. Во однос на Собранието, службите и процедурата ние сме спремни. Се надеваме дека што побргу ќе дојдеме до тој политички договор за да се отпочне тој процес. Јас би сакал тоа да биде што побрзо затоа што навистина мислам дека е од стратешко значење и од битно значење да ги започнеме преговорите што побргу и да станеме полноправна членка на ЕУ, изјави претедателот на Собранието.
Гаши е генерално задоволен од Извештајот на ЕК кој му беше врачен вчера. Кажа дека има мал напредок во однос на работата на Собранието и најави засилена реформска агенда и имплементација на сите препораки од Извештајот што побрзо. Се нотира, како што кажа, дека Собранието не го злоупотребува повеќе европското знаме, но дека се повторуваат скратените постапки за законите. Кажа дека лично се залага за тоа да се промени и ги советуваше министрите законите да ги предлагаат во редовна постапка.
-Во Извештајот се нотира дека Собранието не го злоупотребува повеќе европското знаме, но ни се повторуваат скратените постапки. За жал, на почетокот на овој наш мандат, заради новиот закон за управа и работење на владата, повеќето закони кои ни додјода од владата, заради усогласување на имиња на институции и министерства, беа со скратена постапка. Правам максимални напори со сите пратенички партии и пратеници, но и со владата и министрите, бидејќи повеќето од предлагачите се министерствата, ги убедуваме да не предлагаат закони по скратена постапка, рече спикерот.
Во извештајот од ЕК се нотира дека Собранието ги извршува своите овластувања на претежно задоволителен начин, но и оваа година забележува за носењето закони по скратена постапка и злоупотреба на „ЕУ знамето“, нагласувајќи дека тие мора да бидат ограничени. ЕК нотира и дека политичката поларизација на Парламентот е присутна и понатаму и нагласува дека меѓупартиската соработка е од суштинско значење за да се забрза спроведувањето на реформите поврзани со ЕУ.