Запрашан да ги коментира турските критики за карикатурите објавени од списанието „Шарли Ебдо“, Атал рече дека постои големо европско единство во однос на поддршката за Франција и принципите и вредностите што ги брани Франција.
Тој рече дека неодамнешните напади на турски официјални лица на неделникот се полни со омраза.
Говорот на омраза против новинарите е одговорен за терористичките напади во Франција во последниве години, рече Атал, очигледно мислејќи на нападот во канцелариите на Шарли Ебдо во јануари 2015 година, кога беа убиени 12 лица, извршен од двајца исламисти.
Турција го осуди неделникот Шарли Ебдо за „културен расизам“, по насловната страница на сатиричното списание објавена деенска, во кое се исмева турскиот претседател Реџеп Таип Ердоган.
„Слушнав дека ова списание во Франција, кое објавува за презир вредни и неморални карикатури на нашиот пророк, сега ме изненади со карикатура на насловната страница“, рече Ердоган и додаде дека не ја видел.
На насловната страница на неделникот стои карикатурата на Ердоган во бела маица и долна облека како седи во фотелја. Во едната рака држи конзерва пијалок, а во другата го крева фустанот на жена облечена во хиџаб и го открива голиот задник и вели „Ох, пророку!“
Насловот на изданието е: „Ердоган - приватното е многу забавно“.
„Не сум тажен и лут заради овој одвратен напад врз мене, туку затоа што истото тоа списание е извор на бесрамен однос кон нашиот сакан пророк“, рече Ердоган.
Ердоган им се обрати на членовите на владејачката Партија на правдата и развојот во Анкара, кои го поддржаа неговиот говор со одобрување и неколку минутен аплауз.
„За жал, минуваме низ период кога омразата кон исламот и муслиманите и непочитувањето кон нашиот пророк се шири како рак, особено меѓу лидерите во Европа“, рече Ердоган пред парламентарната група на неговата партија.
Ердоган рече дека западните земји кои го напаѓаат исламот сакаат да ги започнат крстоносните војни.
Во меѓувреме, државниот правобранител на Анкара започна истрага против администрацијата на „Шарли Ебдо“, а адвокатите на Ердоган поднесоа кривична пријава против неделникот, објави новинската агенција Анадолија.
Истрагата и тужбата важат според турскиот закон затоа што навредите биле упатени кон претседателот.
Кризата меѓу Франција и Турција изби откако Макрон вети, оддавајќи му почит на Самуел Пети, професор кој беше обезглавен на 16 октомври за прикажување карикатурите на пророкот Мухамед на час, дека Франција ќе продолжи да го брани правото на слобода во изразувањето.
Ердоган, кој го доведе во прашање менталното здравје на Макрон, го обвини во понеделникот дека водел кампања на омраза кон муслиманите.
Ердоган во понеделникот повика на бојкот на француските производи заради ставовите на Макрон во врска со карикатурите на пророкот Мухамед, што муслиманите ги сметаат за богохулни, по сличните постапки во земјите со муслиманско мнозинство.
Фахретин Алтун, советник на Ердоган, рече дека „антимуслиманската агенда на Макрон е плодна“.
„Очигледно е производ на ксенофобично, исламофобично и нетолерантно културно опкружување што се чини дека француското раководство го посакува за својата земја“, рече Алтун.
Турција и Франција, исто така, се разликуваат во ставовите за истражувањата и поморските права на истокот на Средоземното море, конфликтот во Либија и последниот конфликт меѓу Азербејџан и Ерменија за регионот Нагорно Карабах.
Непријателите на исламот и Турција „ќе се удават во мочуриштето на огорченост и омраза“, рече Ердоган, додавајќи дека тоа се знаци дека Европа се враќа во „периодот на варварството“.