ФИТР: 123 домашни компании влегоа во финална фаза на јавниот повик

Вкупно 123 домашни компании продолжуваат во фазата на финална селекција во рамките на Јавниот повик за брзо прилагодување од последиците од Ковид 19 на Фондот за иновации и технолошки развој .

Овие компании планираат инвестиции од 237 милиони денари, од кои 97 милиони денари се нивен влог, додека од ФИТР побаруваат безмалку 139 милиони денари. На повикот кој беше отворен од 29.05 до 03.07.2020 година , аплицираа вкупно 166 компании.

Од овие 123 компании, 74 аплицираат по првпат во Фондот, 17% аплицираат по втор или повеќе пати без претходно добиена поддршка, додека само 9% се претходни корисници на средства. Според анализите во најголем дел се работи за мали (67) и микро (47) компании, како и 9 средни претпријатија.

Најголем дел на инвестициските планови се од областа на здравството, ИТ, трговијата но и категориите како машинство, креативната индустрија, угостителство и текстилната индустрија.

Во процесот на примарната селекција на инвестициските планови Фондот ангажираше соодветни надворешни стручни лица. Оценувањето се врши врз основа на следните критериуми: технолошки напредок и степен на дигитализација, односно во кој степен проектот ќе придонесе за дигитализација во процесите, развивање на нов или значајно подобрен производ, услуга или работен процес кај апликантот, потоа квалитет на проектот, капацитет на проектниот тим и влијание. Како новина во овој повик е воведено и дополнително бодување за компании со жени во управувачката односно сопственичката структура и компании што доаѓаат од помалку развиените региони, кои ќе имаат и предност при селекцијата.

Анализите покажуваат дека со воведувањето на овие критериуми, само со првиот циклус е поттикнато учество на компании управувани или во сопственост на жени, и тоа 46%, а зголемен е и бројот на компании со седиште во помалку развиените региони. Споредено со претходните повици, регистриран е пораст во југоисточниот (11%), источниот (10%) и полошкиот регион (4%).

Процесот на финална селекција продолжува онлајн, а конечната одлука за ко-финансирање ќе ја донесе Комитетот за одобрување на инвестиции, според горепсоменатите критериуми.

Во фаза на подготовка е нов циклус на аплицирање за финансиска поддршка за економско заздравување. За таа цел, Фондот во соработка со стопанските комори достави посебен прашалник до широк број на домашни компании. Со прашалникот, компаниите имаат можност за директен придонес во креирањето на условите за вториот циклус што Фондот планира да го реализира веднаш по завршување на тековниот.

За реализација на втор и следни циклуси на јавни повици за економско заздравување Фондот иницира дополнителни средства од Владата, над веќе обезбедените 200 милиони денари, од кои поголем дел ќе бидат искористени уште со првиот циклус.

Програмата за економско заздравување е дел од третиот пакет економски мерки на Владата на Македонија и е наменет за поддршка на микро, мали и средни компании кои имаат потврден потенцијал за успешно работење.

Белорускиот опозициски лидер почна штрајк со глад во затворот

Водечкиот лидер на белоруската опозиција, Максим Заник, започна штрајк со глад во затворот, откако беше обвинет за обид за загрозување на националната безбедност.

Адвокатот Заник е еден од седуммината лидери на опозицискиот координативен совет кои се во затвор или во егзил. Тој тврди дека започнал штрајк со глад затоа што сака да го обелодени „апсурдот на гонење луѓе за слободно изразување на нивните мислења“.

Советот за човекови права на ООН донесе одлука во Женева да ги следи повнимателно злоупотребите на моќта во Белорусија, каде протестите траат веќе пет недели, собирајќи повеќе од 100.000 луѓе. Имено, граѓаните на Белорусија сметаат дека е време долгогодишниот претседател Александар Лукашенко да се повлече, бидејќи сметаат дека неодамнешните избори биле наместени.

Специјалниот известувач на ООН, Анаис Марин, рече дека има информации за обвинувања за силување, употреба на електрични шокови и други форми на ментална и физичка тортура.

Роден е без раце и нозе , па сепак вози комбе низ целиот свет(ВИДЕО)

И покрај големиот хендикеп Американецот може да вози и да патува каде што сака.

Џанис Мек Дејвид е роден без раце и нозе, но тоа не го спречува да се обиде да го живее животот во потполност. Покрај тоа што може да се справи со секојдневните животни предизвици како нормална личност без попреченост, Џанис успева да управува и со автомобил.

Тој вози специјално прилагоден Мерцедес Спринтер. Комбето е целосно прилагодено на неговите потреби. Почнувајќи од задниот дел, има автоматски рампи за влегување во инвалидска количка, до начинот на отклучување, палење на моторот и возење на самото возило. Специјално прилагодените контроли му овозможуваат да управува со ова големо возило целосно независно.

По качувањето во седиштето и врзувањето на автономниот систем, тој ги контролира сите команди. Контролниот екран од десната страна се користи за избор на функции и избор на брзини, додека лево е менувач што се врти, забрзува и сопира.

„Во животот, не треба да се фокусираме на проблемите, туку на можностите“, вели МекДејвид. Без сомнение, технологијата му овозможи не само да вози возило, туку и да биде независен и слободен во неговите животни потреби.

Жителите на сиромашните квартови на Мадрид,зафатени со корона:Заборавени сме

Жителите на најсиромашните квартови во Мадрид денеска изјавија дека се чувствуваат напуштено и жигосано додека ја чекаат одлуката на политичарите да воведат карантин поради повисоките стапки на инфекција со корона отколку во другите населени места.

Јазот меѓу богатите и сиромашните населби е во центарот на жестоката дебата во Шпанија за тоа како да се запре растот на нови инфекции. Висок официјален претставник во средата рече дека властите предвиделе карантин за повеќето погодени области.

Локалната политичарка Изабел Дијаз Ајузо порано оваа недела рече дека „начинот на живот на мигрантите“ е делумно виновен за ширењето на инфекцијата, предизвикувајќи бран критики.

„Тие создадоа стигма“, вели Натаниел Елиот, наставник по англиски јазик од Бостон, кој живее во мадридскиот кварт Пуенте де Валекас веќе 15 години.

Валекас, јужна населба во која живеат луѓе со пониски примања и има многу мигранти, е со една од највисоките стапки на инфекција во Мадрид. Тоа е скоро шест пати поголема отколку во Шамбери, една од побогатите населби на северот на градот.

Регионалните власти објавија дека ќе одлучат за мерките подоцна во текот на денот. Засега е непознато дали ќе се стави во карантин Валекас и околните населени места, но жителите се чувствуваат понижено.

Здравствениот систем тука е „уште попарализиран, пренатрупан, редици има насекаде“, рече пензионерката Мари Паз Гонзалес. „Ние сме напуштени, сега сме во рацете на Бога.

"Штом ќе го поминете мостот, сè се менува. Веднаш штом ќе преминете во соседното соседство, сè се менува", додаде Кармен Ибара, исто така пензионерка.

Хуан Антонио, пензионер, кој живее малку надвор од Валекас, но оди таму секој ден да се грижи за својата 93-годишна мајка, е уште подиректен и вели дека карантинот е глупост.

Шпанија е најпогодената западноевропска земја со повеќе од 625 000 заразени и повеќе од 30 000 починати од ковид-19.

Едно од најголемите жаришта е главниот град Мадрид, а јазот меѓу сиромашните и богатите е жешко прашање и во Барселона, вториот по големина град во земјата.

притисни ентер